Аида Салянова УКМКда беш саат суракта болду

Дээрлик беш саатка созулган тергөө сурагынан кийин Жогорку Кеңештин депутаты, “Ата Мекен” фракциясынын мүчөсү Аида Салянова Улуттук коопсуздук комитетинин имаратынан чыгып, ал жерге чогулган элүү чакты тарапташтары менен кездешти. Аида Саляновага юстиция министринин милдетин аткарып турган кезде, 2010-жылы Максим Бакиевдин санаалашы Алексей Елисеевге адвокаттык лицензиясын мыйзамсыз узартып берген деген негизде Башкы прокуратура кылмыш ишин козгогон. Бул ишти тергөөнү УКМК өз колуна алган. Салянова мыйзамды бузбаганын айтып, айыпты четке кагып келет. Анын партиялаштары муну оппозиция өкүлүнө карата бийликтин кысымы деп баалашууда.