“Кырк чоро” коомдук бирикмесинин отуз чакты мүчөсү 28-декабрдын түнүндө “Таатан” соода борборунун жанындагы кытайлардын караоке-барын тинтүүгө алып, 22 кызды сойкулук менен алектенет деген шек менен милицияга өткөрүп беришкен.
Өздөрүн өлкөнүн мекенчил атуулдары санаган “Кырк чоро” тарткан видеотасма коомчулукта талаштарды жараткан.
23-январда “Кырк чоро” Бишкекте рейдге чыгып, “Люкс” караоке-барына кирип, видеого тарткан. Ушундан кийин “Люкстун” ээлери милицияга арыз менен кайрылган.
Бишкектеги караоке-барларды тинтүү аракеттерине байланыштуу “Кыргыз чоролору” бирикмесинин мүчөлөрү Бишкектин Биринчи май райондук милициясына сурак беришкен. Ички иштер министрлиги “чоролордун” аракетин мыйзамсыз деп баалап келет.
2010-жылы 40 уруудан 40 жигит Алтайга барып келгенин жар салышкан болчу. Алар ошол жылы эле “Кыргыз чоролору” коомдук бирикмесин негиздешкен.
