Курулуш ишин кыска мөөнөттө, сапаттуу бүткөрүп эми минтип Бишкекте эмгек акысын доолап, ар кайсы эшикти жыртып жүргөн жумушчулар аткаминерлердин аларга жасаган кайдыгер мамилесине нааразы.
Дене тарбия жана спорт агенттигинин алдындагы Улуттук оюндар борборунун жетекчиси Алмаз Касенов курулуштун наркы сметада көрсөтүлгөн баадан ашып кетип, курулушчулардын акысын төлөөгө акча жетпей калганын белгиледи.
Маянаны маалкаткан “Темир канат”
Чолпон-Атадагы ат майданын тез арада оңдоп-түздөө милдетин жалгыз өзүнө алган “Темир канат” компаниясы келишимдин негизинде жумушчуларды жалдаган. "Көчмөндөр оюнун" өткөрүүгө убакыт тар болгондуктан курулуш ишин жүргүзүүгө тендер жарыяланган эмес. Курулушка жеке тарап катары жалданган жумушчулар тобу күнү-түнү иштеп, ат майданын бир айдын ичинде оюн өткөрүүгө даяр кылган.
Бул курулушка жалданып иштегендердин бири - алайлык Мурат Тилекеев. Ал эмгек акынын берилишин күтүп, эки жумадан бери Бишкекте жүргөнүн белгиледи:
- Эл аралык деңгээлде көкбөрү оюну болот дегенинен ат майдандын курулушуна топтолуп барып, иштеген болчубуз. Намыс үчүн жан үрөп, күнү-түнү эмгектендик. Анан курулушту өз учурунда кечиктирбей тапшырдык. Эмгек акыбызды Бишкекке барганда, 10-сентябрда беребиз деп жөнөтүшкөн. Биз ага ишенип бул жакка келгенбиз. Мына ошондон бери акчаны качан берет экен деп күтүп отурабыз. Ар кимибиз ар жактан келгендиктен Бишкекте акчабыз жок, кыйналып атабыз. Үй-бүлөбүз айылда калып, биз алып бара турган акчаны күтүп отурат. Анан бизди жалдаган Эркинбек деген жигит телефон чалсак албай, биз менен сүйлөшмөк турсун тоготпой жатат.
Ат майданынын курулушун оңдоп-түздөп, аргымактар турган атайын жайларга жаңыдан бетон куюп берген жумушчулар алардын акчасы атайын эле создуктурулуп жатат деп нааразы. Анткени алардын айтымында, компания сметадан сырткары ашыкча акча коротуп, чыгымга деле учураган эмес. Жумушчу Алишер Ноорузбаев “Темир канат” компаниясынын жетекчиси Эркин Мергенбаев азыр алар менен жолугушуудан качып жатканына токтолду:
- Биз келишимде көрсөтүлгөн шарттардын бардыгын ойдогудай аткарып, курулушту сапаттуу тапшырганбыз. Алар бизге ыраазылыгын айтып, акча өкмөттөн төлөнөрү менен эле эмгек акыбызды Бишкектен беребиз деп узатышкан болчу. Бул жакка келгенде алардын бирин дагы таппай калдык. Телефондору өчүк.
Ат майдандын курулушунда иштеген жумушчулар.
Бүтөр-бүтпөсү арсар ат майдан
Жетпей калдыбы же желип кеттиби?
Чолпон-Атадагы ат майданын оңдоого өлкөнүн ар кайсыл бурчунан өз ыктыяры менен жүздөн ашуун жумушчу тартылган. Алардын айтымында, көпчүлүк жумушчулар Кыргызстанда "Көчмөндөр оюну" өтүп жатканына байланыштуу арзан эмгек акыга макул болгон. Бул маселе боюнча “Темир канат” компаниясынын жетекчиси Эркин Мергенбаев менен байланышууга мүмкүн болгон жок. Курулуштун буюртмачысы, Улуттук оюндар борборунун директору Алмаз Касенов эмгек акыны төлөп берүү эмнеге кармалып жатканын мындайча түшүндүрдү:
- Түзүлгөн курулуш долбоорунун сметасын кайра эсептегенде мурдагыдан айырмачылык чыгып калды да. Ошондон улам жумушчулардын эмгек акыларын төлөй албай калышты. Курулушка жооптуу компаниянын айтымында, жалпысынан төрт миллион сом жетпей калыптыр. Эми ал компания эмне үчүн акча жетпей калганын негиздеп берүүгө тийиш. Мына ошондо билинет, чын эле акча көп кетип жетпей калдыбы же жеп койдубу. Бирок ал өзүмдүн чөнтөгүмдөн да акча короттум деп айтты. Учурда ИИМ кызматкерлери текшерип жатат. Текшерүүнүн жыйынтыгы боюнча чын эле акча жетпей калганы аныкталса, анда мамлекетке ошол сумманы бериши керек деп кайрылабыз. Эгерде акча жетип, бирок ал киши жок кылып койгон болсо, анда башы менен жооп берет.
Көчмөндөрдүн дүйнөлүк оюнун өткөрүүгө жалпысынан казынадан 102 миллион сом жумшалган. Демөөрчүлөрдүн кошумчасы менен жалпысынан чыгымдалган каражаттын өлчөмү 138 миллион сомду түзгөн. Анын ичинен Чолпон-Атадагы ат майданын оңдоого эң ири сумма - 72 миллион сом каралган. Каржы министрлигинин эсеби боюнча бул сумманы эки чоң мектептин курулушуна жумшаса болот.
