Алматының "Қайрат" командасы Чемпиондар лигасының негізгі кезеңінде Испанияның "Реал Мадрид" командасынан жеңілді. Бірақ бұл матч қазақстандық жанкүйерлердің есінде ұзаққа дейін сақталмақ.
"Қайрат" Чемпиондар лигасына жолдама алып, "Реал Мадрид" командасы қарсылас ретінде түскенде қазақстандық жанкүйерлерде де, алматылық клубтың ойыншыларында да эйфория болған. Себебі Чемпиондар лигасын 15 рет жеңген "Реалмен" ойнау кез келген команданың арманы әрі мақсаты.
Бұған қоса, Қазақстанда да "Реалдың" фанаттар армиясы жетеді. Құрамында Килиан Мбаппе, Винисиус, Джуд Беллингем, Тибо Куртуа, Арда Гүлер сынды футбол жұлдыздары бар. Осы факторлардың барлығы "Реалмен" ойынға деген қызығушылықты арттырды. 23 мың орындық стадионға билет те бірнеше сағатта сатылып кетті. Билет саудаға шыққанда сайттарда 200 мыңдай адам кезек күтіп отырды.
Ал "Реал" ойыншылары Алматыға келгенде жүздеген жанкүйер әуежайды, команда тоқтаған қонақ үйді торуылдады. 28-30 қыркүйек Қазақстанда үлкен футбол мерекесіне айналды. Бұл матч Қазақстанда ғана емес Орталық Азия елдерінде де үлкен қызығушылық тудырды.
Дегенмен ойынның өзінде күтпеген жағдай болған жоқ. Фаворит "Реал Мадрид" "Қайратты" 0:5 есебімен жеңді. Франциялық Килиан Мбаппе үш гол салып, Чемпиондар лигасындағы голдарының санын алпысқа жеткізді. Қалған екі голды "Реал" сапындағы франциялық Эдуардо Камавинга мен марокколық Браим Диас соқты.
Ойын ірі есеппен аяқталса да "Қайраттың" ойыны төмен болған жоқ. Куртуа қорғаған қақпаға гол салатын бірнеше мүмкіндік те болды. Дегенмен "Реалдың" ойын деңгейі алматылық клубтан бірнеше есе жоғары екенін барлық жанкүйер байқады. Ал қазақстандық жанкүйерлер "Қайраттың" 18 жастағы қақпашысы Шерхан Қалмұрзаны қолдап жатыр. Жас голкипер матчта бірнеше соққыны қайтарды.
Алматыдағы бұл матч Қазақстан футболының тарихына енбек. Себебі "Реалдай" гранд клуб Қазақстанға жиі келе бермейді. Жанкүйерлер мұндай атақты клубтар Қазақстанға жиі келеді деп үміттенері анық.
"ҚАЙРАТТЫҢ" ҚАЛҒАН ОЙЫНДАРЫ
Бұл – "Қайраттың" Чемпиондар лигасының негізгі кезеңіндегі екінші ойыны. Алматылықтар алғаш ойынын сырт алаңда португалиялық "Спортингпен" өткізіп, 4-1 есебімен жол берген еді. Рафаэль Уразбахтин жаттықтыратын "Қайрат" Чемпиондар лишасында әлі алты ойын өткізеді:
21 қазан – "Қайрат" – "Пафос" (өз алаңында)
5 қараша – "Интер" – "Қайрат" (сырт алаңда)
26 қараша – "Копенгаген" – "Қайрат" (сырт алаңда)
9 желтоқсан – "Қайрат" – "Олимпиакос" (өз алаңында)
20 қаңтар – "Қайрат" – "Брюгге" (өз алаңында)
28 қаңтар – "Арсенал" – "Қайрат" (сырт алаңда).
"ҚАЙРАТТЫҢ" ЧЕМПИОНДАР ЛИГАСЫНДАҒЫ ЖОЛЫ
"Қайрат" Чемпиондар лигасының негізгі кезеңінде алғаш рет ойнап жатыр. Команда жарысты бірінші іріктеу кезеңінен бастап, словениялық "Любляна" командасын (1:1, 2:0) жеңді. Ал екінші кезеңде финляндиялық КУПС командасымен ойнап, сырт алаңда 0:2 есебімен жеңіліп қалған. Алматыдағы қарымта матчта 3:0 есебімен басым түсті. Екі матчтың қорытынды есебі – 3:2.
Үшінші кезеңде словакиялық "Слован Братислава" клубынан пенальтиден жеңіске жетті. Братиславада "Слован" 1:0 есебімен, Алматыда "Қайрат" 1:0 есебімен жеңген еді. Осыдан соң қос команда пенальти теуіп, "Қайрат" 4:3 есебімен ұтты.
Ал шешуші плей-офф кезеңінде шотландиялық "Селтикпен" ойнап, екі матч та 0:0 есебімен тең аяқталған. Алматыдағы ойында пенальти сериясы тебіліп, "Қайрат" 3:2 есебімен жеңіске жетті. Осылайша "Қайрат" Чемпиондар лигасының негізгі кезеңіне жолдама алған.
ЧЕМПИОНДАР ЛИГАСЫ ҚАНДАЙ ЖАРЫС?
Чемпиондар лигасының негізгі кезеңі былтырдан бері жаңа форматта өтеді. Клубтар бұрынғыдан төрт командалық топқа түспей, сегіз түрлі командамен ойнайды. Негізгі кезеңге өткен 36 команданың жоғары ұпай алған сегіз командасы бірден 1/8 финалға өтеді. 9-24 орындағылар 1/16 финалда бір-бірімен ойнап, жеңгендері 1/8 финалға өтеді.
Чемпиондар лигасы – Еуропадағы ғана емес, әлемдегі ең беделді клубтық турнир. Жыл сайын өтетін додаға Испания, Франция, Германия, Италия, Англияның гранд клубтары қатысады. Турнирдің жеңген команда 25 млн доллар алады.