Արդեն հինգերորդ օրն է Զանգեզուրի պղնձամոլիբդենային կոմբինատի աշխատակիցները գործադուլ են անում՝ պահանջելով ղեկավարությունից աշխատավարձերի բարձրացում և աշխատանքային պայմանների բարելավում։
«Ողջույն բոլորին, իհարկե գործադուլը շարունակվում է։ Կոմբինատի մուտքի մեր մշտական հավաքի վայրում, գիշերել ենք, շատ ջերմ մթնոլոտում», - «Ազատությանն» ասաց գործադուլը համակարգող խորհրդի անդամ Վահե Մխիթարյանը։
Գործադուլի դուրս եկած աշխատակիցները երեկ կոմբինատի պատմության մեջ առաջին անգամ փակ, գաղտնի քվեարկություն էին կազմակերպել՝ ցույց տալու, որ տնօրինությունը «ստում է», երբ պնդում է, թե աշխատակիցների ընդամենը 7-8 տոկոսն է պահանջում աշխատավարձի բարձրացում։ Կոմբինատի աշխատողների կեսից ավելին՝ 2 հազար 448-ը, երեկ «այո» ասաց գործադուլի պահանջներին։
Վահե Մխիթարյանն «Ազատությանը» փոխանցեց, որ քվեարկության արդյունքներն արձանագրելուց հետո այսօր ստեղծվելու է հաշտեցման հանձնաժողով, որտեղ համակարգող խորհրդից ընդգրկվելու է հինգ անդամ, ինչպես նաև ճյուղային արհմության ներկայացուցիչ Էդուարդ Փահլևանյանը՝ որպես իրենց օրինական շահերի ներկայացուցիչ։ Մխիթարյանը, որը նույնպես մասնակցելու է կոմբինատի ղեկավարության հետ սպասվող բանակցություններին, շեշտում է՝ բաց են երկխոսության համար, բայց եթե իրենց պահանջներին տնօրինությունը ընդառաջ չգնա, գործադուլը շարունակելու են։
«Պահանջները հետևյալն են՝ գործադուլի մասնակցած աշխատակիցներին պատժի չենթարկելու երաշխիքներ, աշխատավարձի բարձրացման նախնական առաջարկ և բաց հարթակի կազմակերպում՝ կուտակված խնդիրները արդյունավետ լուծելու համար», - նշեց գործադուլը համակարգող խորհրդի անդամը;
Աշխատավարձի բարձրացման՝ իրենց պահանջած կոնկրետ չափի վերաբերյալ հարցին Մխիթարյանն արձագանքեց. - «Քանի որ բավականին մեծ արտադրություն է ԶՊՄԿ-ն, այնտեղ գործում են տարբեր սկզբունքներ, և փորձել ենք հնարավորինս այնպես անել, որ մեր ի սկզբանե նշված պահանջը 50 տոկոսի արտացոլվի բոլորի մոտ»: Միաժամանակ նա ընդգծեց, որ կարող են բանակցություններում որոշակի փոխզիջումների գնալ. - «Բնականաբար, դա բանակցությունների տրամաբանությունն է, իհարկե»:
«Իսկ դուք տեսնո՞ւմ եք որոշակի ազդակներ ղեկավարության կողմից, որ նրանք կլսեն ձեզ, կգնան որոշակի փոխզիջումների, թե՞ սպառնալիքներ հնչում են, օրինակ, որ ձեզ աշխատանքից կազատեն, վերադարձեք աշխատանքի», - այս հարցին էլ Վահե Մխիթարյանը պատասխանեց. - «Իհարկե, կան այդպիսի սպառնալիքներ, բայց կարծում եմ՝ բանակցային գործընթացում արդեն իսկ առաջին հանդիպման ժամանակ պարզ կդառնա, թե որքան կառուցողական է տրամադրված բանակցող կողմը»:
Գործադուլը համակարգող խորհրդի անդամը վստահեցրեց, որ եթե իրենց պահանջները որևէ կերպ չլուծվեն, գործադուլը շարունակելու են. - «Այո, միանշանակ»: