Նման կետեր խաղաղության պայմանագրում չեն քննարկվում, «Ազատությանը» փոխանցել է Հայաստանի խորհրդարանի փոխխոսնակը՝ արձագանքելով Ադրբեջանի Մեջլիսի փոխնախագահի պնդմանը, թե հայ - ադրբեջանական խաղաղության պայմանագրի երկու չհամաձայնեցված հոդվածներից մեկը «Զանգեզուրի միջանցքի», մյուսն էլ ՀՀ սահմանադրության մասին է:
«Նշվածը բացարձակապես չի համապատասխանում իրականությանը: Ինչպես հրապարակայնորեն նշել է վարչապետ Փաշինյանը` 2 դեռևս չհամաձայեցված կետերը վերաբերում են մեկը սահմանին երրորդ ուժերի տեղակայման թեմային, մյուսը` միմյանց դեմ միջազգային իրավական կառույցներում ներկայացրած բողոքների թեմային: Սա հաստատել է նաև պաշտոնական Բաքուն», - ասել է Ռուբեն Ռուբինյանը:
Ըստ ադրբեջանական «Թրենդ»-ի՝ Ադրբեջանի խորհրդարանի փոխնախագահ Զիյաֆեթ Ասկերովն ավելի վաղ ասել էր, թե «այս պահի դրությամբ խաղաղության համաձայնագրի 17 կետերից 15-ն է համաձայնեցված, չհամաձայնեցված երկու կետերից մեկը վերաբերում է Զանգեզուրի միջանցքի բացմանը, երկրորդ կետը տարածքային պահանջներն են, որոնք ամրագրված են Հայաստանի Սահմանադրությամբ»:
Մինչդեռ տարեվերջին հենց նախագահը Իլհամ Ալիևն էր ասել, թե Երևանն ու Բաքուն խաղաղության պայմանագրի տեքստում դեռևս չեն համաձայնեցրել միմյանց նկատմամբ միջազգային հայցերից ձեռնպահ մնալու և սահմանին երրորդ երկրների ներկայացուցիչներ չտեղակայելու մասին կետերը։ Իսկ անցած տարվա ամռանը Ադրբեջանի գլխավոր բանակցողներից մեկը՝ հատուկ հանձնարարություններով դեսպան Էլչին Ամիրբեկովը հայտարարել էր, որ Երևանն ու Բաքուն պայմանավորվել են հաղորդակցության ուղիների հարցը լուծել խաղաղության պայմանագրի ստորագրումից հետո միայն։
Ադրբեջանի խորհրդարանի փոխնախագահը նաև ասել է, որ Բաքուն «ուզում է պայմանագիր կնքել հայկական պետության հետ, ոչ թե վարչապետի»։
Նա հիշեցրել է, որ Ադրբեջանը բարձրացրել է նաև ԵԱՀԿ Մինսկի խմբի լուծարման հարցը՝ պնդելով, թե «Մինսկի խումբը շահագրգռված է երկարաձգելու հակամարտությունը»։
Ամիսներ առաջ Հայաստանի վարչապետն ուղիղ ասում էր, որ այդ խումբը կարող է լուծարվել միայն խաղաղության պայմանագրի ստորագրումից հետո։ Սակայն այս տարվա հունվարի սկզբին Փաշինյանը Բաքվին առաջարկեց լուծարել ղարաբաղյան հակամարտության կարգավորման միջազգային մանդատով օժտված միակ մարմինը՝ չհստակեցնելով՝ հնարավո՞ր է լուծարմանը համաձայնեն մինչ պայմանագրի ստորագրումը:
Ինչ վերաբերում է Հայաստանի սահմանադրությանը, որտեղ Ադրբեջանը իր նկատմամբ տարածքային պահանջ է տեսնում, ապա պաշտոնական Բաքուն այն համարում է խաղաղության կնքման գլխավոր խոչընդոտներից մեկը:
Նախօրեին Հայաստանի արդարադատության նախարար Սրբուհի Գալյանը չէր բացառել, որ նոր Սահմանադրության նախաբանից հանվի Անկախության հռչակագրի հղումը, որտեղ Լեռնային Ղարաբաղի ու Հայաստանի միավորման մասին հիշատակում կա:
