Սիրիայում Ասադի վարչակազմի տապալումից 4 ամիս անց երկիրը փաստացի առաջնորդող Ահմեդ ալ-Շարաան նոր, անցումային կառավարություն է ձևավորել։ 23 անդամ ունեցող կաբինետում վարչապետի պաշտոն չկա, այդ պարտականությունները կկատարի գլխավոր քարտուղարը։
Փոխարենը առաջին անգամ ստեղծվել է Սպորտի նախարարություն, նախարարություններից մեկը վստահվել է ալավիական համայնքի ներկայացուցչին, իսկ աշխատանքի նախարար էլ առաջին անգամ նշանակվել է կին քրիստոնյա։
«Նոր կառավարության ձևավորումը նոր պետություն ստեղծելու մեջ ընդհանուր կամքի հռչակագիրն է»,-հայտարարել է ալ -Շարաան։
Ավելի վաղ նա հրամանագիր էր ստորագրել, ըստ որի անցումային կառավարությունը պետք է աշխատի հինգ տարի։
