Վրաստանի նախկին նախագահ Միխեիլ Սաակաշվիլին դատապարտվեց 9 տարվա ազատազրկման։ Դատարանը նրան մեղավոր ճանաչեց բյուջեի միջոցներն ռանձնապես խոշոր չափերով յուրացնելու համար։
Թբիլիսիի դատարանը Հատուկ անվտանգության ծառայության նախկին պետ Թեյմուրազ Ջանաշիային էլ մեղավոր ճանաչեց պաշտոնեական լիազորությունները չարաշահելու համար և տուգանեց 300 հազար լարիով։
Սաակաշվիլին և Ջանաշիան նախկինում բազմիցս հերքել են մեղադրանքները՝ նշելով, թե դատավարությունը քաղաքական բնույթ ունի։
Ըստ դատախազության՝ 2009-ի մայիսի 1-ից մինչև 2013-ի փետրվարի 25-ը Սաակաշվիլիի հանձնարարությամբ և կազմակերպմամբ պետական բյուջեից նրա անձնական նպատակների համար ծախսվել է շուրջ 9 միլիոն լարի (այն ժամանակ մոտ 5,4 միլիոն դոլար)։
Սաակաշվիլին ներկայումս երկու այլ գործերով վեց տարվա ազատազրկման է դատապարտված։ Դատարանը Վրաստանը 9 տարի ղեկավարած Սաակաշվիլիին մեղավոր էր ճանաչել սպանության համար ազատազրկման դատապարտված ոստիկանության նախկին աշխատակիցներին համաներում շնորհելու, ինչպես նաև նախկին պատգամավոր Վալերի Գելաշվիլիին ծեծի ենթարկելու գործերով։
Վրացական դատարանը 2018-ին պնդել էր, որ Սաակաշվիլին ծանր հանցագործությունների համար դատապարտված ոստիկաններին ներում շնորհելով գերազանցել է իր լիազորությունները։
Ազատազրկման նոր ժամկետը կհաշվարկվի Միխեիլ Սաակաշվիլիի ձերբակալության պահից՝ 2021-ի հոկտեմբերի 1-ից և նա ազատ կարձակվի 2030-ի հոկտեմբերի 1-ին։
Վրաստանի նախկին նախագահի նկատմամբ երկու դատական գործեր էլ դեռ ընթացքի մեջ են՝ 2007-ի ընդդիմության ցույցը ցրելու և սահմանն ապօրինի հատելու վերաբերյալ։
