Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը ժամանել է Վաշինգտոն, հաղորդում է CNN-ը՝ վկայակոչելով իր աղբյուրները։
Դմիտրիևը բանակցություններ կունենա ԱՄՆ նախագահի հատուկ բանագնաց Սթիվեն Ուիթքոֆի հետ։
Ուկրաինա Ռուսաստանի ներխուժումից ի վեր Դմիտրիևը ռուսաստանցի առաջին բարձրաստիճան պաշտոնյան է, որ այցելում է Վաշինգտոն։
Նախատեսվում է, որ Դմիտրիևը Վաշինգտոնում կքննարկի ԱՄՆ-ի և Ռուսաստանի միջև հարաբերությունները։
Ամերիկյան լրատվամիջոցների փոխանցմամբ, պետքարտուղարությունն օրերս սառեցրել է պաշտոնյայի դեմ սահմանված պատժամիջոցները, որպեսզի նա կարողանա ԱՄՆ մուտքի վիզա ստանալ։
Նա փետրվարի 18-ին ռուսական պատվիրակության կազմում Էր-Ռիյադում մասնակցել է ամերիկյան պատվիրակության հետ բանակցություններին։ Կիրիլ Դմիտրիևը հայտնել էր, որ Մոսկվան Վաշինգտոնին է փոխանցել ներդրումային և տնտեսական ոլորտում համագործակցության մի քանի առաջարկներ։
Վաշինգտոն Դմիտրիևի ժամանման պաշտոնական հաստատում դեռ չկա։ ԱՄՆ ֆինանսների նախարարությունը մերժել է այդ հարցով մեկնաբանություն տալու CNN-ի խնդրանքը։
