Մյանմարում երկրաշարժի զոհերի թիվը հասել է 3354-ի, ևս 4850 մարդ վիրավոր է, 220-ը՝ անհետ կորած, հաղորդում է Reuters-ը։ Ապրիլի 1-ից երկրում մեկշաբաթյա սուգ է հայտարարվել։
ՄԱԿ-ի Մարդու իրավունքների գերագույն հանձնակատարի գրասենյակի հաղորդմամբ՝ երկրում իշխող ռազմական խունտան սահմանափակում է օգնության մատակարարումները տուժած տարածքներին, որտեղ մարդիկ չեն աջակցում իշխանությանը:
Ավելի վաղ Մյանմարում իշխանությունը զավթած զինվորականները հրադադար էին հայտարարել մինչև ապրիլի 22-ը՝ երկրաշարժից տուժածներին օգնություն ցուցաբերելու համար:
ՄԱԿ-ի Մարդու իրավունքների հարցերով գերագույն հանձնակատար Ֆոլքեր Թյուրքն ասել է, որ ռազմական գործողությունների դադարեցումը պետք է ուղեկցվի փրկարարների և մարդասիրական աշխատողների անարգել մուտքով տուժած բոլոր շրջաններ։
7,7 մագնիտուդով երկրաշարժը տեղի էր ունեցել մարտի 28-ին, էպիկենտրոնը Մյանմարի մեծությամբ երկրորդ քաղաքն էր՝ Մանդալայը, որտեղ ավելի քան մեկ միլիոն մարդ է ապրում։
