Հայաստանի և Ռուսաստանի միջև դիվանագիտական հարաբերությունների հաստատման 33-ամյակի կապակցությամբարտգործնախարարներ Արարատ Միրզոյանը և Սերգեյ Լավրովն ուղերձներ են փոխանակել։
Իր ուղերձում Միրզոյանը կարևորել է գործընկերային փոխգործակցության շարունակությունը՝ հիմնված Երևանի և Մոսկվայի շահերի վրա և ի բարօրություն երկրների ու ժողովուրդների։
«Մենք որպես ուղենիշ ունենք քաղաքական, սոցիալ-տնտեսական, մարդասիրական և այլ ոլորտներում երկարաժամկետ փոխշահավետ համագործակցությունը և նպատակ ունենք շարունակել ու ընդլայնել բովանդակալից, մեր երկրների շահերին ամբողջությամբ համապատասխանող երկխոսություն», - ասված է Միրզոյանի ուղերձում։
Լավրովն իր հերթին շնորհավորել է Միրզոյանին, մասնավորապես նշելով՝ «չնայած ռուս-հայկական դաշինքը խարխլելու դրսի փորձերին»՝ Երևանին ու Մոսկվային հաջողվել է պահպանել քաղաքական երկխոսության բարձր մակարդակն, ինչպես նաև ընդլայնել առևտրատնտեսական համագործակցությունը։
«Մենք պատրաստ ենք շարունակել համատեղ աշխատանքը՝ խորացնելու և բարելավելու գործընկերության արդյունավետությունը՝ ի շահ մեր երկրների քաղաքացիների, ի շահ Հարավային Կովկասում խաղաղության և անվտանգության ամրապնդման», - ասված է Ռուսաստանի արտաքին քաղաքական գերատեսչության ղեկավարի ուղերձում։
Հայ-ռուսական հարաբերությունները սրվել էին, մասնավորապես, 2022 թվականի սեպտեմբերին Ադրբեջանի հարձակումից հետո, երբ չնայած Երևանի պահանջներին՝ ՀԱՊԿ-ը չդատապարտեց դաշինքի անդամ Հայաստանի դեմ այդ հարձակումը և չարձանագրեց, որ Ադրբեջանը Հայաստանից տարածքներ է օկուպացրել։ Երևանը դաշինքին անդամակցությունը դե ֆակտո սառեցրեց, չբացառելով նաև դե յուրե սառեցումը։
Սակայն հայ-ադրբեջանական խաղաղության պայմանագրի մարտի 13-ի համաձայնեցումից հետո վարչապետ Փաշինյանը զանգահարեց Ռուսաստանի նախագահին, որպեսզի Վլադիմիր Պուտինին պատմի Ադրբեջանի հետ բանակցությունների ավարտի մասին: Գրեթ մեկ շաբաթ անց էլ Մոսկվայում Հայաստանի և Ռուսաստանի արտաքին գործերի նախարարությունները քաղաքական խորհրդակցություններ անցկացրին: Երեք օրում երկու հեռախոսազրույց ունեցան արտգործնախարարներ Սերգեյ Լավրովն ու Արարատ Միրզոյանը, մայիսի 9-ին էլ Նիկոլ Փաշինյանը կմեկնի Մոսկվա՝ մասնակցելու տոնակատարություններին:
Ընդդիմության կարծիքով Հայաստանի իշխանությունը փորձում է մեղմել Ռուսաստանի հետ լարվածությունը։ Ազգային ժողովի նախագահ Ալեն Սիմոնյանն էլ արձագանքել է՝ հայ-ռուսական հարաբերություններում առկա հարցերին դեռ պատասխաններ չեն տրվել, խնդիրներից խոսել են նախկինում, այժմ էլ կշարունակեն խոսել, իսկ արտաքին քաղաքական վեկտոր փոխելու մասին պնդումներն, ըստ Սիմոնյանի, իրականությանը չեն համապատասխանում:
