«Ցանկանում ենք, որպեսզի բոլոր հակամարտությունները խաղաղությամբ ավարտվեն», - այսօր Երևանում՝ Հայաստանի նախագահ Վահագն Խաչատուրյանի հետ համատեղ ասուլիսում, հայտարարեց Լեհաստանի նախագահ Անջեյ Դուդան։
Նա Հայաստանի և Ադրբեջանի հարաբերությունների կարգավորման հարցում Լեհաստանի պատրաստակամությունը հայտնեց։
«Ես այս հարցը քննարկել եմ նաև Բաքվում՝ COP29-ի շրջանակներում, նախագահ Ալիևի հետ։ Ցանկանում ենք, որ հայերը խաղաղ ապրեն իրենց հողում՝ կովկասյան տարածաշրջանում ունենալով իրենց սուվերեն պետությունը՝ կայուն և հստակ նշված սահմաններով։ Այդ խաղաղությունը շատ կարևոր է նաև եվրոպական տարածաշրջանի համար։ Եթե մեր օգնության կարիքը լինի, մենք պատրաստ ենք այն ցուցաբերել», - հայտարարեց Լեհաստանի նախագահը։
Երեկ է մեկնարկել Անջեյ Դուդայի պաշտոնական այցը Հայաստան։
Հայաստանի նախագահական նստավայրում այսօր տեղի է ունեցել նրա դիմավորման պաշտոնական արարողությունը։ Երկու երկրների նախագահները նախ առանձնազրույց են ունեցել, ապա այն շարունակել ընդլայնված կազմով, ու արդյունքների մասին հանդես եկել համատեղ ասուլիսով։
Դուդան Խաչատուրյանին հրավիրել է Լեհաստան։
Օրվա երկրորդ կեսին Լեհաստանի նախագահը հանդիպումներ է ունեցել վարչապետ Նիկոլ Փաշինյանի, Ազգային ժողովի նախագահ Ալեն Սիմոնյանի հետ։
Բանակցությունների հիմնական թեմաներից մեկը տարածաշրջանում տիրող իրավիճակն ու Հայաստանի և Ադրբեջանի միջև խաղաղության գործընթացն է, ասել է Լեհաստանի նախագահի միջազգային քաղաքականության բյուրոյի ղեկավար Մեսկո Պավլակը։
«Հայաստանի և Ադրբեջանի միջև խաղաղության գործընթացը շարունակվում է, և մենք հուսով ենք, որ այն շուտով կավարտվի», - լրագրողների հետ ճեպազրույցի ժամանակ ասել է Պավլակն՝ ընդգծելով, որ երկու շաբաթ առաջ Դուդան Բաքվում մասնակցել է COP29 համաժողովին, հանդիպել Ադրբեջանի նախագահի հետ և քննարկել նաև հայ-ադրբեջանական հարաբերություններում տիրող իրավիճակը և խաղաղության գործընթացը։
«Այժմ հայկական կողմի հետ խոսելու ժամանակն է», - ասել է նախարարը՝ չմանրամասնելով ադրբեջանական կողմի հետ տեղի ունեցած զրույցները։
«ԵՄ ընդլայնումը Լեհաստանի նախագահության առաջնահերթություններից է»
Ընդգծելով, որ հունվարից Լեհաստանն է նախագահելու ԵՄ խորհուրդը, Պավլակը՝ շեշտել է՝ ԵՄ ընդլայնումը Լեհաստանի նախագահության առաջնահերթություններից է:
«Հայաստանը չի ձգտում անդամակցել ԵՄ-ին, սակայն վերջին տարիներին շատ ավելի բաց է դարձել Արևմուտքի և ԵՄ-ի հետ համագործակցության համար, և Լեհաստանի նախագահությունը կամրապնդի այդ միտումը», - նշել է նախարարը։
2023-ի հոկտեմբերին վարչապետ Նիկոլ Փաշինյանը հայտարարեց, որ Հայաստանը պատրաստ է մոտենալ Եվրամիությանն այնքան, որքան Բրյուսելը հնարավոր համարի: Եվրամիությունից արձագանքեցին՝ յուրաքանչյուր երկիր ազատ է որոշելու՝ արդյոք ցանկանում է անդամակցել Միությանը, թե ոչ:
Այս քննարկումներն է՛լ ավելի թեժացան, երբ Վրաստանը ստացավ Եվրամիությանն անդամակցության թեկնածուի կարգավիճակ, իսկ Եվրախորդարանը կոչ արեց Եվրամիության գործադիր իշխանությանը՝ նման հնարավրություն դիտարկել նաև Հայաստանի համար:
Սա Լեհաստանի նախագահի առաջին այցն է Հայաստան վերջին 13 տարվա ընթացքում։
Վաղը՝ նոյեմբերի 27-ին Դուդան կայցելի Երասխ՝ մասնակցելու Հայաստանում Եվրոպական Միության դիտորդական առաքելության հետ համատեղ պարեկությանը։
2023-ի փետրվարից ի վեր, երբ Հայաստան եկան եվրոպացի դիտորդներ՝ Կապանի, Գորիսի, Ջերմուկի, Եղեգնաձորի, Մարտունու և Իջևանի գրասենյակներից հայ - ադրբեջանական սահմանները դիտարկելու և սահմանամերձ շրջաններում կայունությանը նպաստելու առաքելությամբ, Ադրբեջանը պարբերաբար քննադատում է անզեն դիտորդներին, անգամ լրտեսության մեջ մեղադրում։ Առաքելության մանդատը երկու տարի է։ Ժամկետը երեք ամսից կավարտվի։ Եվրամիությունը դեռ չի հստակեցրել՝ ժամկետի ավարտից հետո ավելի քան 200 քաղաքացիական դիտորդները կշարունակեն մնալ այստեղ, թե ոչ։
