7 տարի առաջ կադրային հեղափոխություն խոստացած վարչապետ Նիկոլ Փաշինյանն այսօր խոստովանեց՝ Հայաստանի բոլոր ոլորտներում կադրային ճգնաժամ է: Կառավարության նիստում վարչապետը հայտարարեց՝ երեկ իր հռչակած իրական Հայաստանի մասին քննարկում է ունեցել, ու մասնակիցներով եզրակացրել են, թե վարորդների 95 տոկոսը լավ վարորդ չէ, սանտեխնիկների, դերձակների, ուսուցիչների ու անգամ պետական համակարգի կառավարիչների դեպքում նույն պատկերն է:
«Եկեք ի վերջո խոստովանենք, որ ամեն տեղ և ամենուր այդ նույն վիճակն է, ներառյալ կառավարման համակարգում, իսկ եթե կարելի է նույն կերպ մեքենա քշել, ինչի՞ չի կարելի նույն կերպ լինել կառավարության անդամ, պետական պաշտոնյա: Եվ մենք պետք է խոստովանենք՝ 7 տարվա մեջ ով վեր է կենում, առավոտից իրիկուն ասում է՝ էս կառավարությունը սխալ կադրային քաղաքականություն է վարում: Է հա, կառավարությունը սխալ կադրային քաղաքականություն է վարում, որովհետև երկրում կադրային ճգնաժամ է, մարդկային ռեսուրսի ճգնաժամ», - հայտարարեց նա:
Իշխանության գալուց մի քանի ամիս անց՝ 2018-ի նոյեմբերին, Նիկոլ Փաշինյանն իր ֆեյսբուքյան էջում գրառում էր արել, թե աշխատանքային, խորհրդատվական մեխանիզմ է ստեղծում: Հորդորել էր պետական համակարգում իրենց տեսնողներին ու բարեփոխումներ իրականացնելու ծրագծրեր և ընդունակություններ ունեցողներին կենսագրական տվյալներ ու նամակ ուղարկել, խոստացել էր անպայման արձագանքել: Դրանից առաջ էլ Ֆեյսբուքով պատասխանել էր քաղաքացիների հարցերին ու կադրային հեղափոխություն խոստացել, նշել, թե դրա համար «պետական մակարդակով կադրային բանկ ստեղծելու նպատակ կա»:
Այս հայտարարություններից գրեթե յոթ տարի անց՝ այսօր, երկրի ղեկավարն ասում է՝ լավ կադրերի փոքր խումբ կա, բայց նրանց համար պետական պաշտոնը գրավիչ չէ. «Որոնք 1-10 միլիոն դրամով աշխատում են Հայաստանում, Հայաստանից դուրս և չեն էլ գա, աշխատեն կառավարությունում, մի բան չի՝ 400-500 հազար դրամ ստանան, ամեն ստացած կոպեկի հետ էլ անեծքը հետը տանեն տուն»:
Կառավարության ղեկավարն այս համոզմանը եկավ կառավարության նիստում կրթության նախարար Ժաննա Անդրեասյանի ներկայացրած թվերից հետո, ըստ որոնց՝ Հայաստանի 437 դպրոցներում անցած երկու տարիներին փորձում են տնօրեն նշանակել ընդունված նոր չափորոշիչներով, բայց միայն 30 տոկոսում է հաջողվել: Զարգացման արժանահավատ ծրագրեր ներկայացրել է հավակնորդների ընդամենը 13 տոկոսը:
Վարչապետն այսօր ամենաշատը խոսում էր հենց վարորդների մասին, որոնք վարել չգիտեն: Ասաց՝ գրեթե բոլորը, սկսած իրենից, վարորդական իրավունք ստացել են ծանոթով, կաշառքով ու այլ հնարքներով. «Երբ ստանում էի, հայտնի լրագրող էի, ես որ ծնկաչոք աղաչեի էլ, ինձ չէին թողնի, որ ես քննություն տամ»:
Նիկոլ Փաշինյանը քննադատում էր վատ վարորդներին, որոնց օգտին կառավարությունն ու Ազգային ժողովը մեկ ամիս առաջ օրենսդրական փոփոխություն արեցին՝ տարվա ընթացքում 9 տուգանային բալի փոխարեն 13-ը սահմանեցին: Տուգանային բալերն ավելացնելը, ըստ կառավարության, քաղաքացիների հետ երկխոսության արդյունք էր, քայլ՝ ընդառաջելու նրանց խնդրանքին: Մինչդեռ օրինապահ վարորդները սա հետքայլ համարեցին:
«Դա ոչ թե վարորդներն են խնդրում, այլ վատ վարորդները, որոնցից օր առաջ պետք է մաքրել փողոցները, ոչ թե նրանց ընդառաջ գնան: Եթե իշխանություններն այս բալային համակարգը բերել էին, որպեսզի փողոցներում երթևեկությունը կարգավորվեր, նշանակում է ամեն հաջորդ քայլով պետք է խստացնել, ոչ թե թուլացնել այս կարգավորումները», - ասում է Արտակ Գաբոյանը:
Թե ի վերջո ում էր հասցեագրված գործադիրի ղեկավարի այսօրվա կոշտ քննադատությունը կադրային ճգնաժամի մասին, պարզ չէր, բայց նշեց, իր կարծիքով, դրա պատճառները՝ բնակավայրերի 70 և ավելի տոկոսում մանկապարտեզ չկա, դպրոցների 70 և ավելի տոկոսը՝ կիսաավերված է՝ ֆիզիկական և բովանդակային առումով:
