Իսրայելն անցած գիշեր ակտիվացրել է Սիրիայի ուղղությամբ ավիահարվածները՝ դրանք որակելով որպես նախազգուշացում՝ Դամասկոսի նոր իսլամիստ կառավարությանը և ուղերձ նրանց աջակցող Անկարային։
«Թուրքիան բացասական դեր է խաղում տարածաշրջանում․ նրանք անում են հնարավորը՝ Սիրիան թուրքական պրոտեկտորատ դարձնելու համար», - հայտարարել է Իսրայելի արտգործնախարար Գիդեոն Սաարը, հավելելով՝ «մենք դա թույլ չենք տա»։
Գիշերային հարվածների թիրախում են եղել մայրաքաղաք Դամասկոսի մոտ տեղակայված օդային ռազմակայանները։ Ավելի վաղ՝ Սիրիայի նախագահ Բաշար ալ Ասադի տապալումից հետո, Իսրայելի բանակը Սիրիայի հարավարևմտյան շրջաններից տարածքներ էր օկուպացրել՝ պնդելով, թե սիրիացի գրոհայիններն այդ շրջաններից կրակ են բացել իսրայելական բանակի վրա։
«Մեր բանակը կմնա այդ տարածքներում», - հայտարարել է պաշտպանության նախարար Իսրայել Կացը։
Սիրիայի արտգործնախարարը պնդել է, թե իսրայելական հարվածները նպատակ ունեն ապակայունացնել երկիրը՝ կոչ անելով միջազգային հանրությանը ճնշում գործադրել Իսրայելի վրա՝ «ագրեսիան դադարեցնելու համար»։
