Իրանի նախագահ Մասուդ Փեզեշքիանը հայտարարել է, որ Հայաստան–Իրան վերջին բարձրաստիճան շփումները և իր պաշտոնական այցը Երևան նպաստել են Թեհրանում առկա անորոշությունների արդյունավետ հասցեագրմանը: Այս մասին, ըստ ՀՀ ԱԽ քարտուղարի գրասենյակի, Փեզեշքիանն ասել է Իրանում գտնվող Արմեն Գրիգորյանի հետ հանդիպմանը:
«Ոչ մի օտարերկրյա ուժ չպետք է խաթարի հայ -իրանական բարեկամական կապերը», - ըստ IRNA գործակալության՝ հայտարարել է Իրանի նախագահը։
Մասուդ Փեզեշքիանը նշել է, որ տարածաշրջանում վերջին զարգացումների, մասնավորապես օտարերկրյա ուժերի ներկայության վերաբերյալ Իրանի մտահոգությունները մեծապես փարատվել են հայ պաշտոնյաների հավաստիացումների շնորհիվ։
Նա նաև գոհունակություն է հայտնել Երևան կատարած այցի արդյունքներից, ինչպես նաև բարձր է գնահատել Հյուսիս-Հարավ միջանցքի ուղղությամբ առաջընթացը:
Իրանի նախագահն ու Հայաստանի ԱԽ քարտուղարը, ըստ Երևանի հաղորդագրության, բացի օգոստոսի 8-ին Վաշինգտոնում ձեռք բերված պայմանավորվածությունների քննարկում, ընդգծել են նաև, որ երկու երկրները հաստատակամ են զարգացնել երկխոսությունը՝ ռազմավարական գործընկերության հաստատման ուղղությամբ:
Արմեն Գրիգորյանին ընդունել է նաև Իրանի անվտանգության խորհրդի քարտուղար Ալի Լարիջանին:
ԱԽ գրասենյակի հաղորդմամբ՝ նրանք քննարկել են երկկողմ և տարածաշրջանային հարցեր: Գրիգորյանը նշել է, որ տարածաշրջանի տնտեսական ենթակառուցվածքների ապաշրջափակման գործընթացը տեղի է ունենալու բացառապես երկրների տարածքային ամբողջականության, ինքնիշխանության, իրավազորության, սահմանների անքակտելիության և փոխադարձության սկզբունքների լիակատար հարգման շրջանակներում:
Ալի Լարիջանին ողջունել է Հայաստանի և Ադրբեջանի միջև խաղաղության հաստատմանն ուղղված համաձայնությունները՝ կարևորելով կայունության և անվտանգության ապահովումը Հարավային Կովկասում:
Գրիգորյանը Թեհրան է մեկնել երեկ՝ օգոստոսի 29-ին:
Իրանի նախագահը նախորդ շաբաթ էր այցելել Հայաստան: Վարչապետ Փաշինյանի հետ նեղ ու ընդլայնված կազմով բանակցություններից հետո Մասուդ Փեզեշքիանը հայտարարել էր, որ Թեհրանի դիրքորոշումը սահմանների անփոփոխության մասին է ու «գտնում ենք, որ այդ փոփոխությունն աշխարահաքաղական մրցակցության պատճառ կարող է դառնալ»:
Իրանի ղեկավարը վերստին ընդգծել էր՝ դեմ են, որ տարածաշրջանի հարցերը արտապատվիրակեն տարածաշրջանից դուրս գտնվող երկրներին:
