«Հայաստան» և «Պատիվ ունեմ» խմբակցությունների հանդիպումն ավարտվել է: Ըստ էության կողմերը հանգուցալուծման չեն եկել վարչապետին անվստահություն հայտնելու հարցի հետ կապված:
Դեռ քննարկման ընթացքում «Պատիվ ունեմ» խմբակցության ղեկավար Հայկ Մամիջանյանը սոցցանցում հրապարակեց իրենց 6 պատգամավորների ստորագրությունները՝ ակնհայտորեն ակնարկելով, որ ընդդիմադիր ամենամեծ՝ «Հայաստան» խմբակցությունը դեռ չի ստորագրել այդ ձևաթղթի տակ:
«Հայաստան»-ից Իշխան Սաղաթելյանը լրագրողների հետ զրույցում ասաց, որ իրենք պատրաստ են 28 ստորագրություն տալ, եթե հայտարարությունից բացի, զուգահեռ փողոցային պայքար սկսեն: Ըստ Իշխան Սաղաթելյանի՝ իրենց համար անորոշ է, թե երբ է սկսվելու այդ գործընթացը:
«Պետք է ջանքերը կենտրոնացնել և իրոք փորձել համապատասխան ստորագրություններն ունենալ, որ այս գործընթացը տարվի առաջ: Եթե բոլորի հասկացողությունը սա է, մենք պատրաստ ենք այդ ուղղությամբ քայլել», - նշեց նա:
Երրորդ նախագահ Սերժ Սարգսյանի թիմակիցներն առաջարկում են վարչապետ Փաշինյանին փոխարինել Մասիսի քաղաքապետ Դավիթ Համբարձումյանով: Նրան են առաջադրել վարչապետի թեկնածու:
«Հայաստան» դաշինքը առարկություն չունի «Պատիվ ունեմ»-ի թեկնածուի վերաբերյալ:
