Հարավային Կորեան պատրաստ է ընդունել ուկրաինական գերության մեջ հայտնված հյուսիսկորեացի զինվորներին, եթե գերիները նման ցանկություն հայտնեն, հաղորդում է Bloomberg-ը՝ վկայակոչելով Հարավային Կորեայի արտաքին գործերի նախարարությունը։
«Սահմանադրության համաձայն Հյուսիսային Կորեայի զինվորները մեր քաղաքացիներն են, և անհատների ազատ կամքի նկատմամբ հարգանքը համապատասխանում է միջազգային իրավունքին», - ասված է գերատեսչության հայտարարությունում։
Հարավային Կորեան նման առաջարկով հանդես է եկել, երբ գերեվարված հյուսիսկորեացի զինվորը Chosun Ilbo թերթին ասել է, որ ցանկանում է ապաստան ստանալ Հարավային Կորեայում: Ուկրաինացի զինվորականներից մեկն էլ, ում անունը չի հաղորդվում, ասել է, որ այդ ցանկության իրագործումը կախված է Հարավային Կորեայի կառավարության դիրքորոշումից։
Հարավային Կորեան հայտնել է, որ իրենց տեսակետը փոխանցել են ուկրաինացի գործընկերներին, և այդ ուղղությամբ խորհրդակցությունները շարունակվում են։
2025-ի հունվարին Կիևը հայտնել էր Կուրսկի շրջանում երկու հյուսիսկորեացի զինվորների գերեվարելու մասին։ Զելենսկին հայտարարել էր, որ Կիևը պատրաստ է նրանց հանձնել Հյուսիսային Կորեայի առաջնորդին, եթե նա կազմակերպի նրանց փոխանակումը ռուս գերության մեջ գտնվող ուկրաինացի զինվորների հետ։
