Էսկալացիայի վտանգ կա, բայց էսկալացիայի առիթ ու պատճառ չկա, այսօր Ազգային ժողովում, «Ազատության» հարցին ի պատասխան, հայտարարեց Ազգային ժողովի նախագահ Ալեն Սիմոնյանը։
«Էսկալացիայի պատճառներ ստեղծելու հետ կապված՝ մենք միշտ պետք է ամեն ինչ անենք, որ նման առիթ և պատճառ չլինի», - ասաց Սիմոնյանն՝ ընդգծելով՝ Հայաստանի Հանրապետությունը որևիցե տարածքային պահանջ չունի և իր ստանձնած պարտավորությունների և համաձայնագրերին շատ ուժեղ հետևում է ու հետևողական շարունակելու է աշխատանքները՝ բոլոր խնդրահարուց հարցերը լուծելու ուղղությամբ։
«Եվ էսկալացիայի վտանգ կա, բայց էսկալացիայի առիթ և պատճառ, կարծում եմ, չկա և պետք է չլինի», - ասաց Սիմոնյանը։
Վարչապետ Նիկոլ Փաշինյանն էր այսօր հոդված հրապարակել Հայաստանի և Ադրբեջանի միջև հաղորդակցության ուղիների մասին՝ նշելով, որ Բաքուն մերժում է այդ ուղիների բացման Երևանի առաջարկները։ «Անհասկանալի է, թե ինչու են այս առաջարկները մերժվում Ադրբեջանի կողմից: Հույս ունեմ՝ ոչ էսկալացիայի կեղծ առիթ կառուցելու համար», - գրել էր վարչապետը:
