Ռազմական էսկալացիաների վտանգ միշտ լինելու է, քանի դեռ Հայաստանի և Ադրբեջանի միջև խաղաղության պայմանագիր չի ստորագրվել, հայտարարում է Հայաստանի փոխարտգործնախարարը։ Արդյոք խաղաղության համաձայնագրի կնքումը կբացառի պատերազմի հնարավորությունը, Վահան Կոստանյանը դրական պատասխան չի տալիս. - «Դա հավելյալ կերպով մեծացնելու է կայունության հնարավորությունները Հարավային Կովկասում»:
Որ Ադրբեջանը կփորձի նոր ռազմական ծրագրեր իրականացնել Հայաստանի և հայկական տարածքների դեմ, երեկ Վարշավայում արտգործնախարար Միրզոյանն էր հայտարարում՝ ընդգծելով, թե հայկական կողմն այդ առումով լուրջ մտահոգություններ ունի:
Փոխարտգործնախարար Կոստանյանն այսօր չպարզաբանեց՝ ո՞րն է լինելու հնարավոր ռազմական գործողությունների դեպքում Ադբեջանի գլխավոր նպատակը: Հնարավո՞ր է ճանապարհների ապաշրջափակման հարցում կողմերի տարաձայնությունները Բաքուն դարձնի պատրվակ Հայաստանի նկատմամբ ագրեսիայի:
ՔՊ-ական Արթուր Հովհաննիսյանը հարցն այսօր անպատասխան թողեց, փոխարենն առաջարկեց մինչ խաղաղության պայմանագրի կնքումը չմոռանալ պատերազմի ռիսկերի մասին:
«Պատերազմի կամ ռազմական գործողությունների վտանգի մասին խոսքին եթե անդրադառնանք, ապա այդ վտանգի վերացման մասին որևէ մեկը չի հայտարարել, որ այլևս վտանգներ չկան, բոլոր ռիսկերը վերացված են», - հայտարարեց խորհրդարանի իշխանական խմբակցության քարտուղարը:
Եթե այսօր խաղաղության պայմանագրի ստորագրումն է ՔՊ-ականը համարում պատերազմից խուսափելու կամ դրա հավանականությունը նվազեցնելու միջոց, ապա երկու շաբաթ առաջ, նույն՝ խորհրդարանական ճեպազրույցների ժամին Տավուշի հատվածական սահմանազատման մասին խոսելիս Արթուր Հովհաննիսյանն ասում էր. - «Սահմանները վերջնականապես գծելով՝ մենք վերջին ռիսկը Հայաստանի Հանրապետության վրա հարձակման՝ լեգիտիմ հարձակման, վերացրել ենք»:
Անկախ նրանից, որ հայկական կողմը չի հավատում Բաքվի խաղաղության ծրագրերին, պաշտոնական Երևանը, ինչպես փոխարտգործնախարարը ձևակերպեց, «շարունակելու է դրականորեն ներգրավված մնալ խաղաղության հաստատման գործընթացում»: Նույնը երեկ խորհրդարանի ամբիոնից վարչապետն էր ասել:
«Այն կետերը, որոնք արդեն իսկ համաձայնեցված են, մենք կարծում ենք, որ դա առնվազն բավարար է երկու երկրների միջև դիվանագիտական հարաբերություններ հաստատելու և մնացյալ հարցերի քննարկումը շարունակելու համար», - այսօր ասաց Վահան Կոստանյանը:
Վարչապետ Փաշինյանի փոխանցմամբ՝ խաղաղության պայմանագիրն ունի 17 կետ, որից 13-ը ամբողջությամբ, 3-ը՝ մասնակի համաձայնեցված են: Հայաստանի բանակցողները հենց այս տեսքով էլ պատրաստ են փաստաթղթի ստորագրմանը, Բաքուն, սակայն, կտրուկ մերժում է: