Եվրամիությունը Միացյալ Նահանգներից մի շարք արդյունաբերական և գյուղատնտեսական ապրանքների ներմուծման համար 26 միլիարդ եվրոյի մաքսատուրք կսահմանի՝ ի պատասխան ԵՄ-ից պողպատի ու ալյումինի ներմուծման նկատմամբ ԱՄՆ սահմանած 25-տոկոսանոց մաքսատուրքի, հայտարարում է Եվրահանձնաժողովը։
Հանձնաժողովն ամերիկյան նոր մաքսատուրքերը համարում է անհիմն, ընդգծում են՝ պատրաստ են աշխատել Նահանգների հետ, բանակցություններով լուծում գտնել։
«Քանի որ Միացյալ Նահանգները 28 միլիարդ դոլարի մաքսատուրքեր է սահմանում, մենք պատասխանում ենք 26 միլիարդ եվրոյի հակամիջոցներով», - հայտարարել է Եվրահանձնաժողովի ղեկավար Ուրսուլա ֆոն դեր Լայենը։
Միաժամանակ, նա ընդգծել է․ - «Սրանք ավելացած հարկեր են, այս ամենը վնաս է բիզնեսի համար, էլ ավելի վատ է սպառողների համար, գները կաճեն թե՛ Եվրոպայում, թե՛ Միացյալ Նահանգներում»։
Եվրոպական նոր մաքսատուրքերը կգործեն ապրիլի 1-ից։
