Ռոբերտ Դավթյանը այսօր Գնունու տոնավաճառում օգտագործված էլեկտրական ապրանքների իր վաճառքի կետը թողել, հասել էր կառավարության շենքի մոտ՝ պահանջելու կասեցնել հարկային փոփոխությունը, որ ուժի մեջ է հունվարի մեկից: Շրջանառության հարկը 5 -ի փոխարեն 10 տոկոս դարձնելը՝ իր գործին շատ է հարվածել:
«Ես էլ չեմ կարողանալու տուն հացի փող տանել», - ասում է նա:
Լալա Թևոսյանը, որ տոնավաճառներից մեկում հագուստ է վաճառում, համամիտ է՝ պահանջում է կառավարությունցի կասեցնել ուժի մեջ մտած օրենքն ու ականջալուր լինել իրենց. - «Ոչ մեկը չի հրաժարավում հարկերից, բայց հասկացեք՝ առևտուրն այն վիճակում չէ, որ մեզ կարողանում են այսքան սեղմել: Չի կարելի այսքան մանր բիզնեսին խեղդել»:
Կառավարությունից հակադարձում են՝ շրջանառության հարկը կարող է անգամ նվազել, եթե վաճառողները ներկայացնեն փաստաթղթեր ապրանքի ձեռքբերման մասին:
«Այս դրույքաչափը բարձրացել է, բայց զուգահեռաբար շատ լայն ազատական հնարավորություններ են տրվել շրջանառության հարկ վճարողներին, որպեսզի իրենց ձեռքբերումները փաստաթղթերով հիմնավորեն և կարողանան հարկը համապատասխան չափով նվազեցնեն: Այստեղ կարևոր է, որ ձեռքբերումները պատշաճ փաստաթղթավորող, հարկ վճարողների համար վերջնարդյունքում ոչ միայն հարկային բեռի բարձրացում կարող է չլինել, այլ հակառակը», - ասաց ֆինանսների փոխնախարար Արման Պողոսյանը:
Առևտրականներն ասում են՝ հեշտ է ասելը, բայց ոչ անելը: Շատերն արդեն իսկ ունեն ձեռք բերված ապրանքներ, որոնց համար փաստաթղթեր չեն վերցրել, շատերի համար փաստաթղթեր ձեռք բերելը հնարավոր չէ:
Շրջանառության հարկը բարձրանում է ոչ միայն առևտրականների, այլ նաև շատ ծառայությունների համար, օրինակ՝ գեղեցկության սրահները, որ տարեկան մինչև 120 միլիոն շրջանառություն ունեն, դարձյալ պիտի վճարեն իրենց շրջանառության 10 տոկոսը: Մինչ այս, սակայն, կային միկրոբիզնեսներ, դրանք տարեկան մինչև 24 միլիոնի շրջանառություն ունեցողներն էին, որ շրջանառության հարկ չէին վճարում, իսկ մյուսները վճարում էին 5 տոկոս: Այժմ հատկապես միկրոձեռնարկատերերի համար հարկային բեռը կտրուկ աճում է:
Շատ գեղեցկության սրահներ արդեն բարձրացրել են իրենց ծառայությունների գները, մյուսները դեռ հաշվարկում են՝ ինչքան պետք է բարձրացնեն, որ գոյատևեն:
ՓՄՁ համագործակցության ասոցիացիայի ղեկավար Հակոբ Ավագյանն ասում է՝ կառավարությունը չի գնահատել կատարվող փոփոխության հնարավոր հետևանքները:
Արման Պողոսյանը այսօր հայտարարեց, որ հարկման նոր կարգը վերանայելու պատճառ չկա: Իսկ շաբաթներ շարունակ կառավարության դուռը թակող տնտեսվարողները պատրաստվում են նոր ցույցի երկուշաբթի օրը:
Մանրամասները՝ «Ազատության» ռեպորտաժում.
