Ուրբաթ օրը տասնյակ հազարավոր ցուցարարներ հավաքվել են Սլովակիայի մայրաքաղաք Բրատիսլավայի կենտրոնական հրապարակում: Նրանք կոչ են արել վարչապետ Ռոբերտ Ֆիցոյին դադարեցնել մերձեցումը պուտինյան ռեժիմի հետ։ Ինչպես նշում է Reuters գործակալությունը, ցույցը տեղի է ունենում կառավարության և ընդդիմության միջև լարվածության սրման հետ միաժամանակ:
Հանրահավաքի մասնակիցները վանկարկել են «Բավական է, Ֆիցո՛», և «Մենք Եվրոպա ենք»: Հանրահավաքներ են կայացել նաև Սլովակիայի 20 այլ քաղաքներում։ Բրատիսլավայում հանրահավաքի կազմակերպիչները հայտարարել են, որ հրապարակ է դուրս եկել մայրաքաղաքի մոտ 60 հազար բնակիչ: Պաշտոնապես այդ թիվը չի հաստատվել:
Վերջին շաբաթներին իշխանությունների և ընդդիմության միջև լարվածությունն աճել է։ Ֆիցոյի ձախ ազգայնական կառավարությունը ցուցարարներին մեղադրել է երկրում «քաոս առաջացնելու» փորձերի մեջ:
Բողոքի ցույցեր կազմակերպող ընդդիմադիր քաղաքական կուսակցություններն ու քաղաքացիական խմբերը հերքել են այդ մեղադրանքները:
Ֆիցոն չորրորդ անգամ վարչապետ է դարձել 2023 թվականին։ Նրա քննադատները հայտարարում են, որ կառավարությունը թուլացնում է ժողովրդավարական արժեքները և հեռանում Եվրամիությունից ու ՆԱՏՕ-ի դաշնակիցներից՝ մերձենալով Ռուսաստանի հետ:
Բողոքի վերջին ալիքը երկրում տարածվել է անցյալ տարվա դեկտեմբերին Ֆիցոյի Մոսկվա կատարած այցից հետո։ Այն ժամանակ Սլովակիայի առաջնորդին ընդունել էր նախագահ Վլադիմիր Պուտինը։
