Վեդի համայնքի ղեկավար Գարիկ Սարգսյանը, որ իշխող «Քաղաքացիական պայմանագիր» կուսակցության անդամ է, ինքն իրեն մեկ աշխատավարձի չափով պարգևատրել է աշխատանքային պարտականությունները պատշաճ կատարելու համար:
Հարցը ավագանու տարեվերջյան նիստի օրակարգում է եղել, վարչապետ Փաշինյանի թիմակիցն ավագանու իշխանական մյուս անդամների պես ինքն էլ կողմ է քվեարկել ու ստացել երկու աշխատավարձ՝ մեկ միլիոն 200 հազար դրամ:
Որոշմանը կողմ քվեարկած Արամայիս Գրիգորյանը, որ նույնպես իշխող կուսակցությունից է, զարմանում է՝ ի՞նչ վատ բան է եղել: Առաջինը դու պետք է քո աշխատանքը գնահատես, որոշումը հիմնավորում է ՔՊ-ականը:
«Եթե մարդն ինքն իր աշխատանքը չգնահատի, էլ ո՞վ կգնահատի, կարծում եմ, առաջինը մարդը պիտի գնահատի իր աշխատանքը հետո մնացածը», - նշեց Գրիգորյանը:
Ընդդիմադիր «Իմ հզոր համայնք» խմբակցությունը դեմ է քվեարկել այս որոշմանը: Խմբակցության անդամ Հակոբ Թուրիկյանն ասում է՝ սա Գարիկ Սարգսյանի համար ավանդույթ է դարձել. կողմնակիցների քվեարկությամբ կրկնակի աշխատավարձով ամփոփել տարին:
«Մեր խմբակցությունն էլ դեմ է պարգևատրման մեխանիզմին, ես չեմ գտնում, որ համայնքապետը պետք է իրեն պարգևատրի, էն էլ աշխատավարձի 100 տոկոսի չափով: Մենք էլ ինչքան շփվում ենք բնակիչների հետ, հաստատ էդ գոհունակությունը չունի, որ իրեն 100 տոկոսով պարգևատրում նշանակի», - ասաց Հակոբ Թուրիկյանը:
Գարիկ Սարգսյանն իր աշխատանքը գնահատել էր նաև Արարատի մարզպետի պաշտոնում, նույնիսկ օրենքով սահմանված չափից ավելի, ինչը սկանդալ էր դարձել: Իրեն ու իր ենթականերին պարգևատրել էր 104,5 տոկոսով, մինչդեռ օրենքով, առավելագույնը աշխատավարձի 100 տոկոսն է:
Գարիկ Սարգսյանի հետ զրուցել չհաջողվեց, նա զանգերին չարձագանքեց, իսկ նրա թիմակիցը՝ Արամայիս Գրիգորյանն ասաց՝ եթե տարվա մեջ մի քանի անգամ էլ վերադասին պարգևատրելու նախագիծ լիներ, կողմ կքվեարկեր:
Ընդդիմադիր խմբակցության ղեկավար Վահագն Վարդանյանը, ի տարբերություն իշխանական անդամի, չի տեսել այնպիսի աշխատանք, որ Գարիկ Սարգսյանը պարգևի արժանանար:
Վեդու համայնքապետի աշխատանքը գնահատած իշխանականներից Սերոբ Ավետիսյանը անցած տարի հետաքննող լրագրողների ուշադրության կենտրոնում էր հայտնվել: Նրա հաշվից «Քաղաքացիական պայմանագրին» մեկուկես միլիոն դրամ նվիրատվություն էր արվել, շռայլ նվիրատվության մասին նա իմացել էր իրեն զանգահարած լրագրողից:
Վարչապետ Փաշինյանի թիմակիցը, որ կարծում է՝ իր պարտականությունները պատշաճ է կատարում ու պետք է պարգևատրվի, երկու տարի առաջ էլ իր քեռու հետ էր 280 միլիոն դրամի պայմանագիր կնքել, որով նախատեսված էր մի քանի բնակավայրի խմելու ջրագծեր կառուցել:
Գարիկ Սարգսյանը մամուլի էջերում հայտնվեց հատկապես կոկորդիլոսի բուծարան կառուցելու հայտարարությամբ: Ըստ նրա՝ Տանզանիայից ներդրող էր գալու Արարատի մարզ ու կոկորդիլոսի բուծարան էր հիմնելու:
