Աշխարհի գրեթե բոլոր երկրների համար նոր մաքսատուրքեր սահմանելու նախագահ Դոնալդ Թրամփի քայլը չի շրջանցի նաև Հայաստանը: Մի քանի օրից հայկական ապրանքները Միացյալ Նահանգների շուկա հասցնելու համար պետք կլինի ապրանքների 10 տոկոսի չափով տուրք վճարել: Միացյալ Նահանգներում վաճառվող հայկական ապրանքներն այս որոշմամբ առնվազն 10 տոկոսով կթանկանան, ընդգծում են հայ գործարարները:
Կոնյակի արտադրությամբ ու արտահանմամբ զբաղվող Կարեն Խաչիկյանն իրենց ոլորտից է օրինակ բերում. ամերիկացի սպառողը թանկացած հայկական կոնյակի փոխարեն այլ տարբերակ կփնտրի:
«Տեղական գնորդն արդեն նախապատվությունը կտա տեղական արտադրանքին, իսկ տեղում բուրբոններն են արտադրվում բավականին մեծ քանակի, և դրանք արդեն կլինեն շատ ավելի գերադասելի գնային առումով», - «Ազատության» հետ զրույցում ասաց նա:
Ըստ Պետական եկամուտների կոմիտեի՝ Հայաստանից Միացյալ Նահանգներ արտահանվող հիմնական ապրանքներն են ալկոհոլային խմիչքները, կաթնամթերքը, բանջարեղենի պահածոները, ջրերը, ծխախոտը, թանկարժեք քարերը և այլն: Վիճակագրական կոմիտեի տվյալներով՝ 2024-ին Հայաստանից Միացյալ Նահանգներ 60 միլիոն դոլարի ապրանք է արտահանվել: Փոխադարձ առևտուրն էլ 410 միլիոն դոլար է կազմել: Ամերիկյան վիճակագրությունը, մինչդեռ, տարբերվում է հայկականից: ԱՄՆ առևտրի ներկայացուցչի գրասենյակի տվյալներով՝ անցած տարի Հայաստանից ներմուծումը 121 միլիոնի է հասել: Թվերի այս ահռելի տարբերության պատճառը պարզ չէ:
Կոնյակ արտադրող Կարեն Խաչիկյանն ընդգծում է՝ տարիներ առաջ դրամի արժևորման պատճառով Միացյալ Նահանգներում իրենց արտադրանքի իրացման ծավալներն արդեն իսկ կրկնակի նվազել են: Նախագահ Թրամփի որոշումից հետո հերթական անկումն է կանխատեսվում. «Տեղից վաճառքն էլ արդեն դժվարացել է դրամի արժևորման պատճառով, որովհետև նույն գնային սեգմենտում շատ ավելի շքեր խմիչքներ կան»:
Գործարարի գնահատմամբ հայկական կոնյակն Ատլանտյանից այն կողմ այժմ էլ մրցունակ չէ, հիմնականում հայաշատ Լոս Անջելեսում է վաճառվում, այն էլ հատուկ խանութներում:
Ինչպե՞ս կանդրադառնա այս ամենը ԱՄՆ արտահանվող այլ հայկական ապրանքների վրա. Կալիֆորնայում գրանցված օնլայն առևտրի հարթակներից մեկում «Չանախ» կամ «Լոռի» տեսակի պանրի մոտ կես կլիոգրամը տասը դոլարով է վաճառվում, նույն տրամաբանությամբ սրանք կթանկանան առնվազն մեկ դոլարով: Ապակյա շշով հայկական «Ջերմուկ» հնարավոր է պատվիրել 1.80 դոլարով, սա էլ կվաճառվի շուրջ երկու դոլարով:
Մեկ տարրա խորոված բանջարեղենը վաճառվում է մոտ հինգ դոլարով, կարող է թանկանալ մոտ կես դոլարով: Տեղական շուկայում նման ապրանքներ ավելի մատչելի գներով կարելի է գտնել:
Միացյալ Նահանգների առևտրի ներկայացուցչի գրասենյակի տվյալներով՝ այժմ արդյունաբերական ապրանքների ներմուծման միջին մաքսատուրքը 2 տոկոս է կազմում: Դրանց կեսն ընդհանրապես առանց մաքսատուրքի է Ամերիկա մտնում:
