Աբխազիայի ինքնահռչակ հանրապետության նախագահ Ասլան Բժանիան կողմնակիցներին հայտարարել է, որ մտադիր չէ հրաժարական տալ։
Նա շեշտել է՝ Աբխազիայի ղեկավարությունն իր տեղում է և կշարունակի աշխատել։
Ավելի վաղ ընդդիմությունը հայտարարել էր, որ բանակցություններ են սկսվել նախագահի հնարավոր հրաժարականի դեպքում նրան փոխարինող թեկնածուների շուրջ։
Աբխազիայում ներքաղաքական իրադրությունը կտրուկ սրվել է Մոսկվայի և Սուխումիի միջև կնքված ներդրումային համաձայնագրի ֆոնին։ Ընդդիմադիրները պահանջում են հրաժարվել գործարքից, պնդելով, որ տնտեսական օգուտներ խոստացող այդ փաստաթղթով Սուխումին Մոսկվային է հանձնում «սեփական շահերը»։
- Այսօր փաստաթղթի չեղարկման պահանջով բողոքի ցույցի մասնակիցները քանդել են կառավարական շենքերի համալիրի պարսպի մի մասը և ներխուժել խորհրդարանի շենքի հարակից տարածք, այնուհետև խորհրդարան և նախագահի նստավայր։ Ցուցարարները ձվեր ու շշեր են նետել ոստիկանների ուղղությամբ, ուժայիններն իրենց հերթին արցունքաբեր գազ են կիրառել ակցիայի մասնակիցների դեմ։
- Ռուսաստանյան աղբյուրների փոխանցմամբ՝ բախումների ընթացքում 8 մարդ վնասվածքներ է ստացել։ Ցույցերի ֆոնին Աբխազիայի առաջնորդ Ասլան Բժանիայի մամլո ծառայությունը հայտարարել է, որ նախագահը որոշել է չեղարկել վիճահարույց փաստաթուղթը, սակայն ցուցարարներն այդ քայլը բավարար չեն համարել՝ շարունակելով ակցիան Բժանիայի հրաժարականի պահանջով։
