Իրան-Հայաստան ցամաքային սահմանը 24 ժամ փակ մնալուց հետո բացվել է, այսօր հայտարարել է Հայաստանում Իրանի դեսպանը:
«Իրանի սահմաններից երկուսը, սահմանին գործող համակարգերի խնդիրներով պայմանավորված, 24 ժամ փակ են եղել, դրանցից մեկը հենց Իրան-Հայաստան սահմանն էր: Այսօր առավոտյան ժամը 9:30 այդ խնդիրը լուծվեց, և այժմ երկու կողմից երթևեկությունը առանց խնդրի տեղի է ունենում», - այսօրվա ասուլիսում հայտնեց Խալիլ Շիրղոլամին:
Պաշտոնական Երևանը Հայաստան-Իրան ցամաքային փակման մասին ոչինչ չի հաղորդել:
Դեսպանի փոխանցմամբ՝ Կապանում Իրանի գլխավոր հյուպատոսը սահմանին է, որտեղից վստահեցրել է, որ այժմ կուտակումներ չկան:
«Ինձ նաև հաղորդվեց, որ սպասման մեջ էին 30-40 քաղաքացիներ, նրանք բոլորն ունեին միջազգային տոմսեր, և նրանց թռիչքը պետք է տեղի ունենար Երևանից: Եվ կա այս գործընթացի հակառակ տարբերակը, այսինքն՝ մեր քաղաքացիներից շատերը Իրան վերադառնալու ճանապարհին ընտրում են ավիաչվերթով դեպի Երևան ժամանել, այստեղից ցամաքային ճանապարհով հասնել Թեհրան», - նշեց դեսպանը՝ հավելելով, որ երեկ մոտ 20 հոգի է ցամաքային ճանապարհով ուղևորվել Իրան, ևս 15 հոգի էլ կհասնեն Երևան, հետո՝ Իրան:
Հայաստանի արտգործնախարար Արարատ Միրզոյանը հեռախոսազրույց է ունեցել ԵՄ ընդլայնման հարցերով հանձնակատար Մարթա Կոսի հետ։ Միրզոյանն ու Կոսը քննարկել են Մերձավոր Արևելքում ստեղծված իրավիճակը։
Նրանք անդրադարձել են նաև ՀՀ-ԵՄ առաջիկա բարձրաստիճան միջոցառումների և այցերի օրակարգային հարցերի:
Իսրայելական բանակը հայտարարել է, որ գիշերը սպանել է «Հեզբոլլա»-ի հետախուզական շտաբի պետ Հուսեյն Մաքլեդին։
Զինվորականները հայտարարել են, որ նա սպանվել է Լիբանանի մայրաքաղաք Բեյրութում հասցված ճշգրիտ հարվածի արդյունքում։
«Հեզբոլլա»-ն չի մեկնաբանել լուրը:
Իրանի անվտանգության գլխավոր պատասխանատու Ալի Լարիջանին X սոցիալական ցանցում հայտարարել է, որ Իրանը պատրաստ է երկարատև պատերազմին՝ Միացյալ Նահանգների և Իսրայելի հետ ընթացող հակամարտության մեջ, ընդ որում շեշտել է, որ իր երկիրը, ի տարբերություն ԱՄՆ‑ի, «դեռ վաղուց է պատրաստվել երկարատև պատերազմի» համար։
Լարիջանին ավելի վաղ հայտարարել էր, որ Իրանը չի լինելու բանակցությունների կողմը ԱՄՆ‑ի հետ այս փուլում։
Թուրքիան անվտանգության նկատառումներից ելնելով դադարեցրել է թռիչքները Մերձավոր Արևելքի որոշ երկրներ՝ Իրանի և ԱՄՆ-ի ու Իսրայելի միջև ընթացող պատերազմի պատճառով։
«Թռիչքները դեպի Իրան, Իրաք, Սիրիա, Լիբանան և Յորդանանի ուղղությամբ դադարեցվել են մինչև մարտի 6-ը, իսկ նախատեսված բոլոր թռիչքները դեպի Քաթար, Քուվեյթ, Բահրեյն և Միացյալ Արաբական Էմիրություններ՝ մինչև մարտի 3-ը», - հայտարարել է փոխադրումների նախարար Աբդուլքադիր Ուրալօղլուն X սոցիալական ցանցում։
ԱՄՆ պաշտպանության նախարարը հայտարարել է, որ Վաշինգտոնը կհետապնդի և կսպանի ԱՄՆ քաղաքացիների մահվան համար պատասխանատուներին։
Քիչ առաջ տեղի ունեցած մամուլի ասուլիսի ժամանակ Փիթ Հեգսեթը նշել է, որ Իրանին չպետք է թույլատրվի միջուկային զենք ձեռք բերել: Նա նաև քննադատել է նախկին նախագահ Բարաք Օբամայի օրոք 2015-ին կնքված միջուկային համաձայնագիրը՝ ասելով, որ այն ձախողված գործարք էր։
Հեգսեթը նշել է, որ «Էպիկական զայրույթ» գործողության նպատակն է ոչնչացնել իրանական հրթիռների, հրթիռների արտադրության օբյեկտների, ռազմածովային ակտիվների և անվտանգային այլ ենթակառուցվածքներ։
ԱՄՆ պաշտպանության նախարարը նաև դիմել է Իրանի անվտանգության ուժերին՝ զգուշացնելով, որ նրանք պետք է լավ մտածեն իրենց հաջորդ քայլերի մասին։ Վաշինգտոնը հույս ունի, որ իրանցի ժողովուրդը կօգտվի ստեղծված «անհավանական» հնարավորությունից՝ իշխանությունը վերցնելու համար, ասել է Հեգսեթը:
Արբանյակային լուսանկարները ցույց են տալիս ԱՄՆ-ի և Իսրայելի հարվածներից հետո Իրանում ավերածությունների չափը:
Թեհրանիից արված կադրերում երևում է Ալի Խամենեի նստավայրը հարձակումից առաջ, որի հետևանքով Իրանի Գերագույն առաջնորդն ու զինվորական մի շարք ղեկավարներ սպանվեցին:
Հնդկաստանի կողմից կառավարվող Քաշմիրում ոստիկանությունն արցունքաբեր գազ է օգտագործել հազարավոր ցուցարարների դեմ, որոնք փողոց էին դուրս եկել Իրանի գերագույն առաջնորդ այաթոլլա Ալի Խամենեիի սպանության դեմ բողոքելու համար։
Ցույցեր են կազմակերպվել Քաշմիրի տարբեր հատվածներում, որտեղ ցուցարարները ցուցադրել են Խամենեիի, սպանված իրանցի գեներալ Քասեմ Սոլեյմանիի և լիբանանյան «Հեզբոլլահ» մարտական խմբավորման ղեկավար Հասան Նասրալլայի դիմանկարները։
Քաշմիրը, որտեղ մեծ շիիթական համայնք կա, սերտ կապեր ունի Իրանի հետ։ Խամենեիին առանձնակի ջերմությամբ են այստեղ ընդունել 1980-ականներին՝ նրա միակ այցելության ժամանակ։
Խամենեին և բարձրաստիճան ռազմական ղեկավարները սպանվել են փետրվարի 28-ին՝ Իսրայելի և ԱՄՆ ուժերի հարձակման հետևանքով։
Ավիաընկերությունները կոչ են արել Մերձավոր Արևելքում ընթացող հակամարտության բոլոր կողմերին չհարվածել քաղաքացիական օդանավերին։
«Շատ կարևոր է, որ պետությունները պահեն իրենց պարտավորությունը և չվնասեն քաղաքացիներին ու քաղաքացիական ավիացիան», - հայտարարել է Միջազգային Օդային Տրանսպորտի Ասոցիացիայի (IATA) նախագահ Վիլի Ուոլշը, որի ասոցիացիան միավորում է ավելի քան 360 ավիաընկերություններ, որոնք էլ իրենց հերթին ապահովում են առևտրային ուղևորափոխադրումների 85 տոկոսը։