Իրանն է որոշելու, թե ինչպես և երբ կավարտվի այս պատերազմը, հայտարարել է Իրանի արտաքին գործերի նախարար Աբբաս Արաղչին:
«Մեր մայրաքաղաքում տեղի ունեցած պայթյունները ոչ մի կերպ չեն ազդել պատերազմ վարելու մեր կարողության վրա», - հավելել է նա X-ում գրառման մեջ:
Արբանյակային լուսանկարները, որոնք պատրաստվել են Planet Labs PBC ընկերության կողմից, ցույց են տալիս Թավրիզի հյուսիս-արևմուտքում իրանական հրթիռային բազային պատճառված վնասը: Ռազմակայանին հարված է հասցվել փետրվարի 28-ին:
Արբանյակային լուսանկարներ. իրանական հրթիռային բազան հարվածներից առաջ և հետո
Քուվեյթի պաշտպանության նախարարությունը հայտնել է, որ առավոտյան ամերիկյան մի քանի ինքնաթիռ է կործանվել, անձնակազմին հաջողվել է անվնաս փրկվել:
Ենթադրաբար իրանական անօդաչուի հարվածից Կիպրոսում վնասվել է բրիտանական բազայի թռիչքուղին:
Մերձավոր Արևելքում ստեղծված անկայունության պատճառով դադարեցված են տարածաշրջանով անցնող բազմաթիվ չվերթներ:
Իսկ Հորմուզի նեղուցով մատակարարումների ընդհատման պատճառով նավթի գները բարձրացել են:
Brent տեսակի նավթը թանկացել է առնվազն 13 տոկոսով՝ հասնելով 82 դոլարի մեկ բարելի դիմաց:
Սաուդյան Արաբիայի պետական նավթային հսկա Aramco-ն անօդաչուի հարվածից հետո փակել է իր նավթավերամշակման գործարաններից մեկը:
555 մարդ է զոհվել Իրանի տարբեր շրջաններում ԱՄՆ-ի և Իսրայելի հարվածների հետևանքով։ Լուրը հայտնում է Իրանի Կարմիր մահիկը՝ հավելելով, որ տուժել է նաև 131 քաղաք։
Ատոմային էներգիայի միջազգային գործակալությունը չունի որևէ ցուցում, որ Իսրայելի և ԱՄՆ-ի հարվածները Իրանում վնասել կամ թիրախավորել են միջուկային օբյեկտներ, սակայն դեռևս չի կարողացել կապ հաստատել Իրանի միջուկային ոլորտի պատասխանատու մարմինների հետ։ Գործակալության կառավարիչների խորհրդին հայտնել է կազմակերպության ղեկավար Ռաֆայել Գրոսսին։
Թուրքիան և Իրանը փոխադարձաբար դադարեցրել են սահմանը մեկօրյա անցումներով հատելու հնարավորությունը, այսօր հայտարարել է Թուրքիայի առևտրի նախարարը։
Օմեր Բոլաթը, սակայն, ընդգծել է, որ երկու երկրների միջև շուրջ 500 կմ երկարությամբ սահմանին գտնվող երեք անցակետերում արտակարգ իրավիճակ չկա:
Կիպրոսը հետաձգել է այսօր նախատեսված ԵՄ նախարարների հանդիպումն այն բանից հետո, երբ գիշերը անօդաչու սարքը հարվածել է կղզում գտնվող բրիտանական ռազմաբազային։ Կիպրոսը ներկայումս նախագահում է Եվրոպական միության նախագահությունը։