Իրանի առաջատար շիա հոգևորական այաթոլլա Մակարեմ Շիրազին մուսուլմաններին կարգադրել է պայքար սկսել ԱՄՆ-ի և Իսրայելի դեմ՝ գերագույն առաջնորդ այաթոլլա Ալի Խամենեիի սպանության համար վրեժ լուծելու։
Պետական Tasnim լրատվական գործակալության հաղորդմամբ՝ 99-ամյա հոգևորականն ասել է, որ Խամենեիի վրեժը «աշխարհի բոլոր մուսուլմանների կրոնական պարտականությունն է՝ աշխարհից վերացնել այս հանցագործների չարիքը»։
Մեկ այլ ականավոր կրոնական գործիչ՝ այաթոլլա Նուրի Համեդանին, ֆաթվա է արձակել, որով բոլոր մուսուլմանների պարտականությունն է հայտարարել «Խամենեիի արյան համար վրեժ լուծելը», հաղորդում է Tasnim-ը։
Երուսաղեմի մոտակայքում բնակելի շենքի վրա իրանական հրթիռի արձակման հետևանքով վիրավորվել է մոտ 20 մարդ, որոնցից երկուսը ծանր վիճակում են։
Ինչպես եղեկացնում է Իսրայելի արտակարգ իրավիճակների արձագանքման ծառայությունը, վիրավորների մեջ նաև մեկ տասնամյա երեխա կա։
Հորմուզի նեղուցի փակ լինելու պատճառով «առնվազն 150 տանկեր», այդ թվում՝ հում նավթ և հեղուկ բնական գազ տեղափոխող նավեր, խարիսխ են գցել հեղուցի մոտակայքում և առաջ չեն շարժվում, հաղորդում է Reuters-ը՝ վկայակոչելով Marine Traffic Monitoring կայքը։
Reuters-ի տվյալներով՝ տանկերները կանգ են առել նավթի և գազի խոշոր արդյունահանող երկրների մոտ, ինչպիսիք են Իրաքը, Սաուդյան Արաբիան և Կատարը։
Հռոմի պապը «խորը մտահոգություն» է հայտնել Իրանում և Մերձավոր Արևելքում ստեղծված իրավիճակի վերաբերյալ՝ կոչ անելով վերջ դնել «բռնության պարույրին», նախքան այն կվերածվի մի իրավիճակի, որի հետևանքններն անդառնալի կլինեն։
Կիրակնօրյա աղոթքից հետո Վատիկանի Սուրբ Պետրոսի հրապարակում հավաքված ամբոխին դիմելով՝ Լեո XIV-ն ասել է, որ «կայունությունն ու խաղաղությունը չեն կարող կառուցվել փոխադարձ սպառնալիքների կամ զենքերի միջոցով, որոնք բերում են ավերածություններ, ցավ և մահ, այլ միայն բանական, իսկական և պատասխանատու երկխոսության միջոցով»։
Նա հավելել է, որ կոչ է արել կողմերին դադարեցնել բռնությունը՝ զգուշացնելով «հսկայական մասշտաբների ողբերգության» հնարավորության մասին։
Քուվեյթի վրա Իրանի հարձակումների հետևանքով 1 մարդ զոհվել է, 32-ը՝ վիրավորվել, տեղեկացրել է երկրի առողջապահության նախարարությունը:
Երուսաղեմի մոտակայքում բնակելի շենքի վրա Իրանի հրթիռային հարվածի հետևանքով 8 մարդ է զոհվել, հայտնում է Իսրայելի ոստիկանությունը։
Ոստիկանության տվյալներով՝ Բեյթ Շեմեշ քաղաքում տեղի ունեցած հարվածի հետևանքով վիրավորվել է 18 մարդ։
«Ուղիղ հարվածի հետևանքով շենքը լուրջ վնաս է կրել և փլուզվել»,- հայտնել է գերատեսչությունը։
Սաուդյան Արաբիայի արտգործնախարարությունը հայտարարել է, որ կանչել Իրանի դեսպանին, այն բանից հետո, երբ երկիրը Թեհրանին մեղադրեց իր տարածքին հարվածելու համար։
«Արտաքին գործերի նախարարությունը կանչել է Թագավորությունում Իրանի դեսպանին՝ ի պատասխան Իրանի կողմից թագավորության և մի շարք եղբայրական երկրների դեմ ուղղված անամոթ հարձակումների»,- ասվում է X-ում նախարարության տարածած հայտարարությունում։
ՀՀ կառավարությունն աշխատանքներ է իրականացնում՝ հնարավորության պարագայում օդային ճանապարհով Հայաստան փոխադրելու չեղարկված թռիչքների պատճառով Արաբական Միացյալ Էմիրություններում գտնվող ՀՀ քաղաքացիներին:
«Այն քաղաքացիները, որոնք ցանկություն կունենան կամավոր հիմունքներով Օմանի տարածքով մեկնել Հայաստան, կարող են լրացնել հայտը։ ԱՄԷ-ում ՀՀ դեսպանությունն, ըստ հնարավորության, կաջակցի նաև թռիչքի համար ԱՄԷ-ից Մասկատ տեղափոխման հարցում։
Թռիչքի կազմակերպման պարագայում առաջնահերթությունը կտրվի կանանց, երեխաներին և տարեց անձանց», - ասված է ԱԳՆ հայտարարության մեջ։
Իրանի պատասխան հարվածներից Արաբական Միացյալ Էմիրություններում 3 մարդ է զոհվել, հայտնում է երկրի պաշտպանության նախարարությունը։
Նրանք Պակիստանի, Նեպալի և Բանգլադեշի քաղաքացիներ են, որոնք զոհվել են իրանական անօդաչուների հարվածներից, որոնց հաջողվել էր շրջանցել ԱՄԷ-ի հակաօդային պաշտպանությունը։ Առնվազն 58 մարդ թեթև վնասվածքներ է ստացել։
Ընդհանուր առմամբ, Իրանը ԱՄԷ-ի վրա արձակել է 165 բալիստիկ հրթիռ, որոնցից 152-ը երկրի հակաօդային պաշտպանությունը ոչնչացրել է, իսկ 13-ն ընկել են ծովը:
Իրանի նախագահ Մասուդ Փեզեշքիանը հայտարարել է, որ «շարունակելու ենք մեր գերագույն առաջնորդի հետքերով գնալ»։
Իրանի Իսլամական Հանրապետության զինված ուժերը կշարունակեն ուժեղ հարվածներ հասցնել, «կշարունակեն ոչնչացնել իրենց թշնամիների ռազմական բազաները», ասել է նա։