եթերում Հեգսեթը հայտարարում է Իրանի դեմ ԱՄՆ և Իսրայելի վճռական հաղթանակի մասին

Ակտիվիստից մինչև դատապարտելի առաջնորդ. փաստեր Խամենեիի մասին

86-ամյա Խամենեին Իսլամական Հանրապետության գերագույն առաջնորդն էր 1989 թվականից։

Նրանք, ովքեր նախկինում ճանաչել են նրան, հիշում են որպես բարձրահասակ և բարեկազմ հոգևորական, ով սիրում էր պոեզիա և գրականություն:

Տասնամյակներ շարունակ նա լուծել է Իրանում գրեթե բոլոր հարցերը՝ սկսած, թե արդյոք կանայք կարող են հեծանիվ վարել հասարակական վայրերում, մինչև երկրի հարաբերությունների զարգացումը Միացյալ Նահանգների հետ:

Երբ Խոմեյնին մահացավ 1989 թվականին՝ առանց ակնհայտ հավանական ժառանգորդի, փորձագետների ասամբլեան՝ կրոնական մարմինը, ընտրեց Խամենեիին որպես Իրանի երկրորդ գերագույն առաջնորդ:

Այդ ընտրությունը զարմացրել էր շատերին, հավանաբար, նույնիսկ հենց նաև Խամենեիին։

Իսրայելը հայտարարել է, որ կիրակի օրը հարվածների հերթական ալիքն է հասցրել Իրանին: Զինված ուժերի հաղորդմամբ՝ հարվածել են իրանական բալիստիկ հրթիռների և հակաօդային պաշտպանության համակարգերին:

Իրանի զինված ուժերը շուտով կրկին պատասխան հարված կհասցնեն՝ ԱՄՆ-ի և Իսրայելի բազաների դեմ ամենամեծ հարձակումն իրականացնելով, հայտարարել է Իսլամական հեղափոխության պահապանների էլիտար կորպուսը:

Կիրակի վաղ առավոտյան Իսրայելի ողջ տարածքում բազմիցս հնչել են օդային տագնապի ազդանշաններ, իսկ Թել Ավիվում լսվել են մի շարք պայթյուններ:

Ավերածությունների կամ տուժածների մասին տեղեկություններ դեռ չեն ստացվել:

Իրանական հեռուստաընկերությունը հայտնել է, որ երկրի զինված ուժերի շտաբի պետ Աբդոլրահիմ Մուսավին սպանվել է Իրանի ուղղությամբ ավիահարվածների հետևանքով:

Սպանվել են նաև Իրանի գերագույն առաջնորդի խորհրդական Ալի Շամխանին, Իսլամական հեղափոխության պահապանների կորպուսի (ԻՀՊԿ) գլխավոր հրամանատար Մոհամմեդ Փաքփուրը:

Իրանում այսօր կստեղծվի ժամանակավոր ղեկավար խորհուրդ, հայտարարել է Ազգային անվտանգության գերագույն խորհրդի քարտուղար Ալի Լարիջանին։

Ժամեր շարունակ հերքումներից հետո Իրանը հաստատեց երկրի գերագույն հոգևոր առաջնորդ այաթոլլահ Ալի Խամենեիի մահը:

Սահմանադրության համաձայն՝ նախագահը, դատական իշխանության ղեկավարը և պահապանների խորհրդի բարձրաստիճան հոգևորականը ժամանակավորապես կկատարեն իրենց պարտականությունները, մինչև փորձագետների ժողով անունով հայտնի մարմինը ընտրի նրա իրավահաջորդին:

Խամենեիի իրավահաջորդը պետք է ընտրվի նույն այդ մարմնի կողմից, որն ընտրել է իրեն:

Հայաստանի անվտանգության խորհուրդը քննարկել է իրավիճակը Իրանում և Մերձավոր Արևելքում:

Կառավարությունից հայտնում են, որ Արտաքին հետախուզության ծառայության պետ Քրիստիննե Գրիգորյանը զեկուցել է տեղի ունեցող իրադարձությունների մասին, իսկ ԱԽ քարտուղար Արմեն Գրիգորյանը ներկայացրել է միջգերատեսչական աշխատանքային խմբի գործունեությունը:

Ցուցարարները փորձել են ներխուժել Պակիստանի հարավային Կարաչի քաղաքում ԱՄՆ հյուպատոսության շենք Իրանի վրա ԱՄՆ-ի և Իսրայելի հարվածներից հետո: Դրանց հետևանքով զոհվել է Իրանի գերագույն առաջնորդ այաթոլլա Ալի Խամենեին: Պակիստանի ոստիկանությունը, որ արցունքաբեր գազ է կիրառել՝ ցրելու ցուցարարներին, հաղորդել է, որ կա առնվազն 9 զոհ:

Reuters-ի թղթակիցը լսել է կրակոցների ձայներ, իսկ դեպքի վայրից տեսագրություններում երևում է, թե ինչպես են հյուպատոսության գլխավոր դարպասների մոտ մեքենաներ այրվում:

Իրանամետ ցուցարարները հավաքվել են նաև Իրաքի մայրաքաղաք Բաղդադի Կանաչ գոտուց դուրս, որտեղ գտնվում է ԱՄՆ դեսպանատունը:

Միացյալ Նահանգները երբևէ «չտեսնված ուժով» կհարվածի Իրանին, եթե Թեհրանը սրի ռազմական գործողությունները, հայտարարել է ԱՄՆ նախագահ Դոնալդ Թրամփը:

Իրանը՝ մարտի 1-ին

Իրանի նախագահ Մասուդ Փեզեշքիանը հայտարարել է, որ վրեժխնդիր լինելը Թեհրանի օրինական իրավունքը և պարտականությունն է, և Թեհրանը կանի հնարավորը այս պարտքը կատարելու համար, փոխանցում է Reuters-ը:

«Ֆրանս Պրես» գործակալության կիրակի Թեհրանից հրապարակած տեսանյութերում երևում է, որ ուժգին պայթյուններից հետո մայրաքաղաքի տարբեր հատվածներում բարձրանում է խիտ սև ծուխ։