Իսրայելը շարունակել է հարվածները Լիբանանում, կան զոհեր և վիրավորներ:
Իրանի խորհրդարանի նախագահն ԱՄՆ առաջնորդ Դոնալդ Թրամփին մեղադրել է «անխոհեմ քայլեր» անելով ԱՄՆ-ին «դժոխքի մեջ ներքաշելու» համար:
«Ողջ տարածաշրջանը կայրվի», քանի դեռ ԱՄՆ նախագահը հետևում է Իսրայելի վարչապետ Բենյամին Նեթանյահուի հրահանգներին, սոցցանցում զգուշացրել է Մոհամմադ Բաղեր Ղալիբաֆը: «Մի՛ սխալվեք. դուք ոչինչ չեք շահի պատերազմական հանցագործություններով: Միակ իրական լուծումը Իրանի ժողովրդի իրավունքները հարգելն ու այս վտանգավոր խաղը դադարեցնելն է»,- հավելել է նա:
Իրանի արտգործնախարարության խոսնակ Էսմայիլ Բաղային, իր հերթին, զգուշացրել է՝ Իրանն արագ հակահարված կտա ԱՄՆ ցանկացած հարձակմանը:
«Մեր զինուժը հստակ հայտարարել է՝ եթե իրանական ենթակառուցվածքները հարձակման ենթարկվեն, մենք նույն կերպ կպատասխանենք։ Մեր զինուժը կհարվածի նմանատիպ ենթակառուցվածքների, որոնք պատկանում են ԱՄՆ-ին կամ նպաստում Իրանի դեմ նրա ագրեսիային», - ասել է նա։
Իսլամական հեղափոխության պահապանների կորպուսը հայտարարել է, որ Հորմուզի նեղուցը երբեք չի վերադառնա իր նախկին վիճակին, հատկապես ԱՄՆ-ի և Իսրայելի համար։ Կորպուսը նաև հայտնել է, որ իր ռազմածովային ուժերը Պարսից ծոցում են՝ նեղուցում նոր կարգն ապահովելու նախապատրաստական աշխատանքների համար:
ԱՄՆ-ն և Իրանը ստացել են ռազմական գործողությունները դադարեցնելու ծրագրի շրջանակը, հայտնում է Reuters-ը՝ խնդրին ծանոթ աղբյուրին հղումով:
Ամերիկյան Axios-ը գրել էր, որ առաջարկվում է անմիջապես 45 օրով հրադադար հաստատել: Այդ ընթացքում կողմերը կբանակցեն խաղաղության համաձայնագրի շուրջ, որը կկնքվի երկրորդ փուլում: Ընդ որում, հրադադարը կարող է երկարաձգվել, եթե բանակցությունների համար լրացուցիչ ժամանակ պահանջվի:
Իրանցի բարձրաստիճան պաշտոնյան, ում անունը չի նշվում, Reuters-ին հաստատել է՝ ստացել են առաջարկը և քննարկում են այն: Սակայն, Թեհրանը չի վերաբացի Հորմուզի նեղուցը հրադադարի դիմաց, քանզի կարծում է, որ Վաշինգտոնը պատրաստ չէ մշտական հրադադարի, ասել է պաշտոնյան: Նա հավելել է՝ Թեհրանը նաև չի հանդուրժի, եթե փորձեն ճնշում բանեցնել, որպեսզի համաձայնի վերջնաժամկետներին:
Իսլամական հեղափոխության պահապանների կորպուսի հետախուզական կազմակերպության ղեկավար Մաջիդ Խադեմին սպանվել է: Նրա մահվան մասին լուրը հայտնել են իրանական պետական լրատվամիջոցները՝ առանց լրացուցիչ մանրամասների:
Թեհրանը Սպիտակ տան ղեկավարի հայտարարությունները որակել է հստակ ապացույց «պատերազմական հանցագործություն կատարելու մտադրության» մասին:
«Եվս մեկ անգամ ԱՄՆ նախագահը բացահայտ կերպով սպառնում է ոչնչացնել Իրանում քաղաքացիական գոյատևման համար էական նշանակությամբ ենթակառուցվածքները», - հայտարարել է ՄԱԿ-ում Իրանի ներկայացուցչությաունն՝ ի պատասխան ԱՄՆ նախագահ Դոնալդ Թրամփի՝ երեքշաբթի Իրանի կամուրջներին և էլեկտրակայաններին հարվածելու հայտարարությանը:
Ներկայացուցչությունը շեշտել է, որ եթե ՄԱԿ-ի խղճի զգացողությունը կենդանի լիներ, չէր լռի քաղաքացիական ենթակառուցվածքները թիրախավորելու՝ ԱՄՆ-ի «պատերազմատենչ նախագահի բացահայտ և անամոթ սպառնալիքի ֆոնին»:
Թեհրանի նահանգում գիշերն ամերիկա-իսրայելական հարվածների հետևանքով կան զոհեր, այդ թվում՝ 10 տարին չլրացած չորս աղջիկ և երկու տղա, հայտնում է իրանական Fars լրատվական գործակալությունը։
Լրատվամիջոցի փոխանցմամբ՝ Բահարեստանի շրջանում բնակելի շենքին հասցված հարվածից առնվազն 13 մարդ է զոհվել։
Իրանն, իր հերթին, հարվածել է Իսրայելին. Հայֆա քաղաքում հրթիռը խոցել է բնակելի շենքերից մեկը, տարածքում որոնողափրկարարական աշխատանքները դեռ ընթացքի մեջ են։
Հաղորդվում է երկու զոհի, երկու անհետ կորածի մասին: Ըստ իսրայելական իշխանությունների՝ Իրանն արձակել է միայն մեկ, ծանր հրթիռ։
Իրանի համաձայնությունը ստանալուց հետո մեկ օրում 15 նավ հատել է Հորմուզի նեղուցը, հաղորդում է Fars գործակալությունը:
Առնվազն 13 մարդ է զոհվել Թեհրանից հարավ-արևելք գտնվող բնակելի տարածքի վրա իրականացված հարձակման հետևանքով՝ հայտնում է «Fars» լրատվական գործակալությունը։
Իսրայելցի փրկարարները Հայֆայում բնակելի շենքի փլատակներից երկու մարմին են դուրս բերել այն բանից հետո, երբ կիրակի դրա վրա իրանական հրթիռ է ընկել, հայտնում են իսրայելական լրատվամիջոցները: