ԱՄՆ նախագահ Դոնալդ Թրամփը Fox news-ին ասել, որ կարծում է՝ Իրանի հետ կկարողանան համաձայնության գալ վաղը:
«Կարծում եմ՝ վաղը լավ հնարավորություն կա, նրանք հիմա բանակցություններ են վարում», - ասել է նախագահը։
Եթե Իրանը համաձայնության չգա, ասել է Թրամփը, «դուք կտեսնեք կամուրջներ և էլեկտրակայաններ, որոնք կփլուզվեն նրանց ամբողջ երկրում»։
«Եթե նրանք արագ համաձայնության չգան, ես մտածում եմ ամեն ինչ պայթեցնելու և նավթը վերցնելու մասին», - ասել է նա։
«Իրանի սարերի խորքից փրկել ենք լուրջ վիրավորում ստացած և F-15-ի անձնակազմի անդամ, շատ խիզախ զինվորականին» - սոցցանցային հերթական գրառման մեջ հայտարարել է ԱՄՆ նախագահ Դոնալդ Թրամփը և մանրամասներ փոխանցել Իրանում ամերիկյան ռազմական օդանավի օդաչուին հայտնաբերելու գործողության մասին
«Իրանի մեծ թվով զինվորականները շատ էին փնտրում, մոտենում էին։ Նա շատ հարգարժան գնդապետ է։ Նման օդային հարձակումը հազվադեպ է ձեռնարկվում «մարդուն և տեխնիկային սպառնացող վտանգի համար»։ Պարզապես չի լինում։ Երկրորդ հարձակումը առաջինից հետո եղավ, երբ մենք օրը ցերեկով փրկեցինք օդաչուին, տարօրինակ էր նաև յոթ ժամ Իրանում անցկացնելը։ Խիզախության և տաղանդի դրսևորում բոլորի կողմից», - նշել է Թրամփը։
Նախագահը տեղեկացրել է նաև, որ վաղը Օվալաձև աշխատասենյակից մամուլի ասուլիս է անցկացնելու։
Իրանը և Օմանը արտաքին գործերի փոխնախարարների մակարդակով Հորմուզի նեղուցով բեռների սահուն տեղաշարժի վերաբերյալ քննարկումներ են անցկացրել, տեղեկացնում է Օմանի արտաքին գործերի նախարարությունը։
Հանդիպումն անցկացվել է ապրիլի 4-ին «Արտաքին գործերի փոխնախարարների մակարդակում», նշվում է X-ում գերատեսչության տարածած գրառման մեջ։ Երկու կողմից նաև համապատասխան մասնագետներ են մասնակցել հանդիպմանը։
«Քննարկվել են տարածաշրջանային ներկա հանգամանքների ժամանակահատվածում Հորմուզի նեղուցով սահուն տեղաշարժի հնարավոր տարբերակները, - փոխանցում են Օմանի ԱԳՆ-ից - Հանդիպման ընթացքում երկու կողմի մասնագետները ներկայացրել են մի շարք տեսլականներ և առաջարկներ, որոնք կուսումնասիրվեն»։
ԱՄՆ նախագահ Դոնալդ Թրամփը Truth Social էջում արած գրառմամբ դիմել է Իրանին՝ պահանջելով բացել Հորմուզի նեղուցը։
«Երեքշաբթի օրը Իրանում կլինի էլեկտրակայանի և կամրջի օր, բոլորը միասին։ Նման բան չի լինի։ Բացեք գրողի տարած նեղուցը, խելագար սրիկաներ, թե չէ կապրեք դժոխքում։ Պարզապես նայեք: Փառք Ալլահին», - գրել է Թրամփը։
Իրանի զինվորականները հայտարարել են, որ Հորմուզի նեղուցում սահմանափակումները չեն տարածվում Իրաքի վրա։
«Եղբայրական Իրաքը ազատված է Հորմուզի նեղուցում մեր կողմից սահմանված ցանկացած սահմանափակումից», - ասվում է հայտարարության մեջ։
Bloomberg-ի տվյալներով՝ այս որոշումը կարող է հնարավորություն տալ շուկա դուրս բերել օրական մինչև երեք միլիոն բարել իրաքյան նավթ։ Սակայն իրաքցի պաշտոնյան գործակալությանը հայտնել է, որ գործնական ազդեցությունը կախված կլինի նրանից, թե արդյոք նավագնացության ընկերությունները պատրաստ են մտնել նեղուց՝ շարունակվող ռիսկերի պայմաններում։
Սպահանի հարավային հատվածում Իրանի զինուժը ամերիկյան երկու C-130 օդանավ և երկու Black Hawk ուղղաթիռ է կործանել։
«Մասնագետների կողմից գետնի վրա իրականացված փորձաքննությունների արդյունքում պարզ է դարձել, որ մեր ուժերի կողմից կործանվել են ԱՄՆ զինուժին պատկանող ռազմական տրանսպորտային երկու C-130 օդանավ և երկու Black Hawk ուղղաթիռ», - ասել է Իրանի զինված ուժերի միասնական շտաբի խոսնակը։
Իրանի արտաքին գործերի նախարար Աբբաս Արաղչին զգուշացրել է Իրանի քաղաքացիական միջուկային օբյեկտների, այդ թվում՝ Բուշերի էլեկտրակայանի մոտ տեղի ունեցած հարձակումների հնարավոր հետևանքների մասին։
ՄԱԿ-ի գլխավոր քարտուղար Անտոնիու Գուտերեշին ուղղված նամակում նա ընդգծել է, որ նման հարձակումները «ամբողջ տարածաշրջանը ենթարկում են ռադիոակտիվ արտանետման ռիսկի՝ լուրջ մարդասիրական և բնապահպանական հետևանքներով»։
Արաբական Միացյալ Էմիրությունների իշխանությունները հայտարարել են, որ փորձում են մեկուսացնել նավթաքիմիական գործարաններից մեկում բռնկված հրդեհը՝ Իրանի կողմից Պարսից ծոցի հարևանների տարածքում օդային շարունակական հարվածների ֆոնին։
«Իշխանություններն արձագանքում են «Բորուժ» նավթաքիմիական գործարանի տարածքում մի քանի հրդեհի, որը բռնկվել է ՀՕՊ համակարգի կողմից հաջող խոցումից հետո ընկած բեկորներից», - ասվում է Էմիրությունների լրատվական ծառայության այսօր տարածած հաղորդագրության մեջ։
Ըստ հաղորդագրության՝ Աբու Դաբիում գտնվող գործարանում աշխատանքներն «անմիջապես դադարեցվել են, կատարվում է հասցված վնասների գնահատում»։ Աշխատակիցների շրջանում վիրավորներ չկան։
ԱՄԷ պաշտպանության նախարարությունն ավելի վաղ տեղեկացրել էր, որ պատասխանում է իրեն հասցվող հրթիռային և դրոնային հարվածներին։
Իրանի Ղոդս ուժերի հանգուցյալ գեներալ-մայոր Քասեմ Սուլեյմանիի զարմուհին և նրա դուստրը զրկվել են ԱՄՆ մշտական բնակության իրավունքից, հայտարարել է Միացյալ Նահանգների պետքարտուղարությունը։
Սուլեյմանին առաջնորդել է Իսլամական հեղափոխության պահապանների կորպուսի արտաքին թևը 1998-ից մինչև 2020 թվականին ԱՄՆ զինուժի կողմից իր սպանությունը՝ Թրամփի նախագահության առաջին ժամկետում։
Ըստ Պետքարտուղարության՝ Համիդե Սուլեյմանի Աֆշարը դստեր հետ ձերբակալվել է ապրիլի 3-ի գիշերը։ Մինչև վերջնական որոշման կայացումը՝ արդյոք նրանք պետք է լքեն ԱՄՆ տարածքը, կանայք կպահվեն ԱՄՆ միգրացիոն և մաքսային ոստիկանությունում։
Վկայակոչելով սոցիալական մեդիայի հրապարակումներ՝ գերատեսչությունը Սուլեյմանի Աֆշարին բնութագրել է որպես «Իրանի ահաբեկչական և ամբողջատիրական ռեժիմի անթաքույց աջակից»։
Իրանի լրատվական դաշտում, սակայն, շրջանառվել է Քասեմ Սուլեյմանիի դստեր՝ Զեյնաբ Սուլեյմանիի հայտարարությունը, ըստ որի՝ ԱՄՆ-ում ձերբակալված կանայք որևէ կապ չունեն իր հոր հետ։
«Միացյալ Նահանգներում ձերբակալված անձինք որևէ կապ չունեն նահատակ Սուլեյմանիի հետ, իսկ ԱՄՆ պետքարտուղարության պնդումը կեղծ է», - ասել է Զեյնաբ Սուլեյմանին։
Եգիպտոսի արտաքին գործերի նախարար Բադր Աբդելատին հեռախոսազրույցներ է ունեցել ԱՄՆ-ի ներկայացուցիչ Սթիվ Ուիթքոֆի և Իրանի արտգործնախարար Աբբաս Արաղչիի, ինչպես նաև իր թուրք և պակիստանցի գործընկերների հետ և քննարկել Մերձավոր Արևելքում լարվածությունը նվազեցնելու ուղիները:
Associated Press-ի փոխանցմամբ՝ Եգիպտոսի ԱԳ նախարարությունը հայտնել է, որ Աբդելատին զգուշացրել է Մերձավոր Արևելքում «աննախադեպ պայթյունի» վտանգի մասին։
Այլ մանրամասներ չեն հաղորդվում