Իրանի տարածքում ամերիկյան F-15 կործանիչի խոցման արդյունքում անհետացած ամերիկացի օդաչուին Միացյալ Նահանգները կարողացել է փրկել, հայտարարել է ԱՄՆ իշխանությունը։
«Վերջին ժամերին Միացյալ Նահանգների զինուժը իրականացրել է ամերիկյան պատմության ամենահամարձակ որոնողափրկարարական գործողություններից մեկը», - Սպիտակ տան խոսնակ Քերոլայն Լևիթի փոխանցմամբ՝ ասել է ԱՄՆ նախագահ Դոնալդ Թրամփը։
Օդաչուն գնդապետ է, վիրավոր է, բայց նրա հետ «ամեն ինչ կարգին կլինի», հայտնել է ԱՄՆ նախագահը։
Իսրայելը կշարունակի ուժեղ հարվածներ հասցնել Իրանին, Times of Israel-ի փոխանցմամբ՝ ասել է վարչապետ Բենիամին Նեթանյահուն։
«Այն բանից հետո, երբ մենք ոչնչացրինք նրանց պողպատի արտադրության կարողությունների 70 տոկոսը, որը օգտագործվում է մեր դեմ կիրառվող զենքերի հումք լինելու համար, մենք հարվածել ենք նրանց նավթաքիմիական գործարաններին: Այս երկուսը նրանց ֆինանսավորման հիմնական աղբյուրներն են, որոնք սնուցում են իրենց ահաբեկչական պատերազմը մեր և ամբողջ աշխարհի դեմ», - նշել է Նեթանյահուն՝ հավելելով, որ «կշարունակենք հարվածել նրանց, ինչպես ես խոստացել եմ»:
Իրանը զգուշացնում է ԱՄՆ-ին և Իսրայելին, որ «ամբողջ տարածաշրջանը դժոխքի կվերածվի ձեզ համար», եթե լարվածությունը շարունակվի, հաղորդում են իրանական լրատվամիջոցները։
Իսրայելը պատրաստվում է հարձակվել իրանական էներգետիկ օբյեկտների վրա, բայց սպասում է ԱՄՆ-ի կանաչ լույսին
Այս մասին Reuters-ի փոխանցմամբ այսօր ասել է Իսրայելի պաշտպանության բարձրաստիճան պաշտոնյան՝ հավելելով, որ նման հարձակումները, հավանաբար, կիրականացվեն հաջորդ շաբաթվա ընթացքում։
Այս հայտարարությունը հնչում է ԱՄՆ նախագահ Դոնալդ Թրամփի կողմից Իրանին 48-ժամյա վերջնագիր ներկայացնելուց հետո:
ԱՄՆ նախագահ Դոնալդ Թրամփն այսօր հայտարարել է, որ Իրանն ունի 48 ժամ՝ կարևորագույն նշանակություն ունեցող Հորմուզի նեղուցը բացելու վերաբերյալ համաձայնության գալու համար, հակառակ դեպքում կհայտնվի «դժոխքում»։
«Հիշո՞ւմ եք, երբ ես Իրանին տասը օր տվեցի գործարք կնքելու կամ Հորմուզի նեղուցը բացելու համար»,-սոցցանցում գրել է Թրամփը՝ անդրադառնալով մարտի 26-ին իր կողմից տրված վերջնագրին։
«Ժամանակը սպառվում է. 48 ժամ է մնացել, մինչև ամբողջ դժոխքը կտիրի նրանց վրա»,- հայտարարել է ԱՄՆ նախագահ Դոնալդ Թրամփը:
Ադրբեջանը Իրան է ուղարկել մարդասիրական օգնության հերթական խմբաքանակը
Ադրբեջանական APA-ի փոխանցմամբ՝ օգնություն ուղարկելու որոշումը կայացվել է Ադրբեջանի նախագահի և Իրանի նախագահի միջև հեռախոսազրույցից հետո։
Ընդհանուր 200 տոննա քաշով մարդասիրական բեռը ներառում է սննդամթերք, դեղորայք և բժշկական պարագաներ:
Իրանի և ԱՄՆ-ի պաշտոնյաները նախօրեին հայտարարել են, որ Իրանի և Պարսից ծոցի երկնքում խոցվել են երկու ամերիկյան ռազմական ինքնաթիռներ, երկու օդաչու փրկվել է, իսկ երրորդը դեռևս անհետ կորած է և որոնվում է Թեհրանի ուժերի կողմից։
Հաղորդվում է, որ խոցվել է ամերիկյան F-15E ինքնաթիռն ու A-10 կործանիչը:
Միացյալ Նահանգների նախագահ Դոնալդ Թրամփը հայտարարել է, որ ամերիկյան ռազմական ինքնաթիռի խոցումը չի ազդի Իրանի հետ մեկ ամիս շարունակվող հակամարտությունը դադարեցնելու շուրջ բանակցությունների վրա, հաղորդում է NBC News-ը։
Իսրայելի զինված ուժերը շաբաթ առավոտյան հայտարարել են, որ սկսել են հարվածել Բեյրութում գտնվող լիբանանյան «Հեզբոլլա» զինյալ խմբավորման ենթակառուցվածքներին։
Իրանական բանակը որոնողական գործողություններ է սկսել՝ ԱՄՆ կործանիչի օդաչուին գտնելու համար, որի ինքնաթիռը խոցվել է այսօր ավելի վաղ հակաօդային պաշտպանության համակարգով, գրել է «Ֆարս» գործակալությունը:
Տեղական հեռուստաալիքները կադրեր են ցուցադրել, որոնք, ըստ հաղորդագրության, խոցված ինքնաթիռի բեկորներն են։
Ոստիկանությունը կոչ է արել բնակիչներին միանալ օդաչուի կամ օդաչուների որոնմանը՝ առաջարկելով պարգևատրում ամերիկացի զինծառայողներին հայտնաբերելու համար։
Միևնույն ժամանակ, ԱՄՆ կենտրոնական հրամանատարությունը, որը պատասխանատու է Մերձավոր Արևելքում ամերիկյան ռազմական գործողությունների համար, դեռևս չի արձագանքել այս տեղեկությանը։
Սա առաջին դեպքն է, երբ Իրանի տարածքում խոցվել է ԱՄՆ կործանիչ՝ փետրվարի 28-ին ԱՄՆ-ի և Իսրայելի կողմից սկսված ռազմական գործողություններից ի վեր։
Իրանի հարձակումների հետևանքով այսօր մի շարք արաբական երկրներում տուժել են ավելի քան մեկ տասնյակ մարդիկ։ Արաբական Միացյալ Էմիրություններում, մասնավորապես Աբու Դաբիի Աջբան շրջանում ընկնող բեկորների հետևանքով վիրավորվել է 12 մարդ։
Վիրավորները Նեպալի և Հնդկաստանի քաղաքացիներ են։
Բացի այդ, բեկորների ընկնելու պատճառով դադարեցվել է Հաբշան գազի գործարանի աշխատանքը։ Էմիրությունների զինված ուժերը հայտնել են, որ խոցել են ընդհանուր առմամբ՝ 18 բալիստիկ, 4՝ թևավոր հրթիռներ, 47 անօդաչու սարք։
Հորդանանում բանակը խոցել է երկրի ներսում թիրախավորված երկու հրթիռ։ Արդյունքում երկու մարդ վիրավորվել է, սակայն նրանց վիճակը կայուն է։
Քուվեյթը, Բահրեյնը և Սաուդյան Արաբիան նույնպես հայտնել են, որ խոցել են իրենց տարածք ուղղված անօդաչու սարքեր։