Առողջապահության համաշխարհային կազմակերպությունն (ԱՀԿ) այսօր զգուշացրել է վերջին օրերին Իրանում առողջապահական համակարգի վրա բազմաթիվ հարձակումների մասին, ինչպես նաև տեղեկացրել է, որ օդային հարվածի հետևանքով ոչնչացվել է Պաստերի ինստիտուտը։
ԱՀԿ գլխավոր տնօրեն Թեդրոս Ադհանոմ Գեբրեյեսուսը X-ում գրել է, ինստիտուտը լուրջ վնասներ է կրել և այլևս չի կարող առողջապահական ծառայություններ մատուցել։ Թեհրանի այս կենտրոնը, որը հիմնադրվել է 1920 թվականին և կապ չունի Փարիզի համանուն ինստիտուտի հետ, համարվում է Իրանի ամենահին գիտահետազոտական և հանրային առողջապահական հաստատություններից մեկը։ Այն կարևոր դեր է խաղում բնակչության առողջության պաշտպանության և խթանման գործում, այդ թվում՝ արտակարգ իրավիճակներում։
Փարիզի Պաստերի ինստիտուտն աջակցություն է հայտնել հարվածներից տուժած հետազոտողներին, ուսանողներին և քաղաքացիական անձնակազմին։
Համաշխարհային պարենային գները մարտ ամսին հասել են անցած տարվա սեպտեմբերից ի վեր ամենաբարձր մակարդակին և կարող են շարունակել աճել, եթե Մերձավոր Արևելքում հակամարտությունը շարունակվի։
Այս մասին հաղորդում է ՄԱԿ-ի Պարենի և գյուղատնտեսության կազմակերպությունը՝ ընգծելով, եթե հակամարտությունը տևի ավելի քան 40 օր և մուտքային ծախսերը (օրինակ՝ պարարտանյութերը) մնան բարձր, ֆերմերները կարող են կրճատել ներդրումները, նվազեցնել ցանքատարածությունները կամ անցնել ավելի քիչ պարարտանյութ պահանջող մշակաբույսերի։
Պատերազմի թեժ պահին ԱՄՆ բանակի շտաբի պետ Ռենդի Ջորջը նախօրեին պաշտոնանկ է արվել պաշտպանության նախարար Փիթ Հեգսեթի կողմից, հայտնում է Reuters-ը:
Պենտագոնը հաստատել է, որ Ջորջը, որի պաշտոնավարման ժամկետի ավարտին դեռ մեկ տարուց ավելի կար, թոշակի կանցնի:
Պատերազմի 35-րդ օրը կողմերը շարունակել են փոխադարձ հարվածները: Իրանը հայտարարել է, որ ամերիկյան F-35 կործանիչ է խոցել՝ երկրորդը այս պատերազմի ընթացքում: ԱՄՆ-ն չի հաստատել դա: Իրանը շարունակել է նաև հարվածները ծոցի երկրներին, Քուվեյթում նավթավերամշակման գործարանի է հարվածել: Եմենի հութիներն իրենց հերթին հայտարարել են, որ հրթիռներով հարվածել են Իսրայելին:
Միացյալ Նահանգները վերահաստատել է, որ Վաշինգտոնը բաց է Թեհրանի հետ դիվանագիտության համար, Al Jazeera-ի հետ հարցազրույցում հայտարարել է Պետդեպարտամենտի խոսնակի տեղակալ Թոմի Փիգոթը։
«Նախագահը մշտապես բաց է դիվանագիտության համար, բայց նաև հստակորեն ասել է, որ իր նպատակներն այնտեղ [Իրանում] կիրագործվեն», - ասել է Փիգոթը։
Իրանն արձագանքում է
Քաղաքացիական ենթակառուցվածքներին, այդ թվում՝ անավարտ կամուրջներին հարվածելը, իրանցիներին չի ստիպի հանձնվել, հայտարարել է Իրանի արտաքին գործերի նախարար Աբբաս Արաղչին՝ արձագանքելով ԱՄՆ նախագահ Դոնալդ Թրամփի՝ Իրանի կամուրջները և էլեկտրակայանները թիրախավորելու սպառնալիքին։
«Յուրաքանչյուր կամուրջ և շենք ավելի ամուր կվերականգնվի»,- ասել է Արաղչին:
Լավրովը և Արաղչին քննարկել են Մերձավոր Արևելքում տիրող իրավիճակը
«Նախարարները մանրամասն քննարկել են Մերձավոր Արևելքում նոր հակամարտության շուրջ զարգացումները, լարվածության թուլացման ուղղությամբ մի շարք պետությունների կողմից ձեռնարկվող ջանքերը, ինչպես նաև մտքեր են փոխանակել ՄԱԿ-ի Անվտանգության խորհրդում Հորմուզի նեղուցում նավարկության անվտանգությունն ապահովելու ուղիների վերաբերյալ», - ասվում է Ռուսաստանի արտաքին գործերի նախարարության հայտարարության մեջ։
Հաղորդվում է, որ զրույցը տեղի է ունեցել իրանական կողմի նախաձեռնությամբ։
Հորմուզի նեղուցը բաց է Ռուսաստանի համար. Ուշակով
Հորմուզի նեղուցը բաց է մնում ռուսական կողմի համար, հայտարարել է Ռուսաստանի նախագահ Վլադիմիր Պուտինի օգնական Յուրի Ուշակովը։
«Հորմուզը բաց է մեզ համար», - ռուսական ՏԱՍՍ-ի փոխանցմամբ ասել է Ուշակովը։
ԱՄՆ նախագահը սպառնացել է հարվածել և ոչնչացնել Իրանի կամուրջներն ու էլեկտրակայանները
Դոնալդ Թրամփը նշել է, որ ԱՄՆ զինված ուժերը «դեռ չեն էլ սկսել ոչնչացնել այն ամենն, ինչ մնացել է Իրանում։ Հաջորդիվ կամուրջներն են, հետո՝ էլեկտրակայանները»,- սոցցանցում գրել է Միացյալ Նահանգների նախագահը:
Նա հավելել է՝ Իրանի ղեկավարությունը «գիտի՝ ինչ պետք է արվի, և դա պետք է շատ արագ արվի»։
Իրանի նախագահ Մասուդ Փեզեշքիանը զանգահարել է Ադրբեջանի նախագահ Իլհամ Ալիևին, հաղորդում են ադրբեջանական լրատվամիջոցները, մանրամասնելով՝ Փեզեշքիանը շնորհակալություն է հայտնել պետության ղեկավարին Ադրբեջանի կողմից Իրանին տրամադրված մարդասիրական օգնության համար։
Իլհամ Ալիևը խոստացել է շարունակել մարդասիրական օգնության տրամադրումը, «մաղթել, որ հակամարտությունը հնարավորինս շուտ ավարտվի»։
Հեռախոսազրույցի ընթացքում ընդգծվել է տարածաշրջանում հնարավորինս շուտ խաղաղության հասնելու անհրաժեշտությունը, ասված է Ադրբեջանի նախագահականի տարածած հաղորդագրության մեջ։