Ռուսաստանը կխնդրի Միացյալ Նահանգներին և Իսրայելին հրադադար ապահովել՝ Իրանի Բուշերի ատոմակայանից ռուս աշխատակիցներին տարհանելու համար։
«Որոշված երթուղիները հաղորդվելու են Իսրայելի և ԱՄՆ-ի իշխանություններին, և մենք բոլոր միջոցներով կհամաձայնեցնենք, որպեսզի շարասյան շարժման ընթացքում խստորեն պահպանվի հրադադարը»,- «ՌԻԱ Նովոստի»-ին ասել է «Ռոսատոմի» ղեկավար Ալեքսեյ Լիխաչովը:
Նա հավելել է, որ վերջին տարհանումն ընդգրկելու է մոտ 200 մարդ և նախատեսված է հաջորդ շաբաթ:
Չինաստանը մեղադրել է ԱՄՆ-ին և Իսրայելին Հորմուզի նեղուցի փաստացի փակման համար, ինչը խաթարել է այդ կարևոր ջրային ճանապարհով համաշխարհային նավթի և գազի արտահանումները։
Չինաստանի ԱԳՆ խոսնակ Մաո Նինը հայտարարել է, որ շրջափակման «արմատական պատճառը» «ԱՄՆ-ի և Իսրայելի անօրինական ռազմական գործողություններն են Իրանի դեմ»։
Մաոյի խոսքով՝ միջազգային ծովային ուղիների անվտանգությունը կարող է ապահովվել միայն հրադադարի և Պարսից ծոցի տարածաշրջանում խաղաղության ու կայունության հաստատման միջոցով։
Ռուսաստանի նախագահ Վլադիմիր Պուտինը կոչ է արել ակտիվացնել քաղաքական և դիվանագիտական ջանքերը Մերձավոր Արևելքի պատերազմի ավարտի համար։
Այսօր ՌԴ նախագահը հեռախոսազրույց է ունեցել Սաուդյան Արաբիայի գահաժառանգ Մոհամմեդ բին Սալմանի հետ, որի ընթացքում էլ ընդգծել է Մերձավոր Արևելքում պատերազմն ավարտելուն ուղղված ջանքերի կարևորությունը։
ԱՄՆ դեսպանությունը Բաղդադում կոչ է արել իր քաղաքացիներին լքել Իրաքը՝ նախազգուշացնելով, որ առաջիկա 24-48 ժամվա ընթացքում Իրանի աջակից զինված խմբավորումները կարող են հարձակվել մայրաքաղաքի վրա։
Անվտանգության հուշագրում դեսպանությունը նշում է, որ զինված խմբավորումները կարող են թիրախավորել ամերիկացի քաղաքացիներին, դիվանագիտական օբյեկտներ, բիզնեսներ և այլ վայրեր, որոնք կապ ունեն Միացյալ Նահանգների հետ, ինչպես նաև Իրաքի քաղաքացիական ու պետական կառույցներ։
«Ահաբեկչական զինված խմբավորումները թիրախավորել են ամերիկացիներին՝ առևանգման համար», - հավելել է դեսպանությունը։
Իրանը չի ձգտում ուրանը հարստացնել այն մակարդակների, որոնք անհրաժեշտ են միջուկային զենք ստեղծելու համար, հայտարարել է ՄԱԿ-ի միջուկային գործակալությունում Իրանի ներկայացուցիչը։
Ատոմային էներգիայի միջազգային գործակալությունում Իրանի դեսպան Ռեզա Նաջաֆին նաև հայտարարել է, որ Իրանի Բուշերի ատոմակայանին ԱՄՆ-ի և Իսրայելի հարվածները «պատերազմական հանցագործություն» են։
Ռուսաստանի նախագահ Վլադիմիր Պուտինն այսօր ընդունել է Եգիպտոսի արտգործնախարար Բադր Աբդելաթիին։
Կրեմլի խոսնակի փոխանցմամբ՝ բանակցությունները կկենտրոնանան Իրանի պատերազմի և Մերձավոր Արևելքի իրավիճակի վրա։
«Բացի Ռուսաստանի և Եգիպտոսի միջև լայնածավալ երկկողմ հարաբերություններից, նախատեսվում է մանրամասն քննարկել Մերձավոր Արևելքում, Պարսից ծոցում տեղի ունեցող զարգացումները՝ կապված Իրանի շուրջ ընթացող պատերազմի հետ», - պարզաբանել է Դմիտրի Պեսկով՝ չբացառելով, որ նախագահը երեկոյան «միջազգային հեռախոսազրույց» կունենա։ Թե ում հետ մասնավորապես, Պեսկովը չի նշել։
«Այդ մասին ևս ձեզ կտեղեկացնենք»,- եզրափակել է Պեսկովը։
Պատերազմի 34-րդ օրը Իսրայելը շարունակել է հարվածներն Իրանին ու Լիբանանին: Պաշտոնական տվյալներով՝ առ այսօր ամերիկա-իսրայելական հարձակումների հետևանքով միայն Թեհրանում 33 հազար տուն է վնասվել:
Իրանն ու Արևմուտքի կողմից ահաբեկչական ճանաչված «Հեզբոլա»-ն իրենց հերթին հարվածել են Իսրայելին: Կան վիրավորներ:
Պատերազմի հետևանքով զոհերի ընդհանուր թիվը անցել է 5000-ը: Միայն Իրանում զոհվել է 3519 մարդ, Լիբանանում՝ 1318 մարդ, իսկ Իսրայելում զոհերի թիվը 19 է, 13 զոհ էլ ունի ԱՄՆ-ն: Զոհեր և վիրավորներ կան նաև Պարսից ծոցի երկրներում:
Պաշտոնական Թեհրանն արձագանքել է Թրամփին: Արտգործնախարարության խոսնակն ասել է, որ Իրանը չի հանդուրժի ԱՄՆ սպառնալիքները և կշարունակի հակահարված տալ այնքան, քանի դեռ ԱՄՆ-ն և Իսրայելը շարունակում են հարվածները:
«Մենք չենք հանդուրժի պատերազմի, բանակցությունների, հրադադարի և այնուհետև նույն օրինաչափության կրկնության այս արատավոր ցիկլը: Սա անարդար պատերազմ է, որը պարտադրվել է Իրանի ժողովրդին։ Մենք այլընտրանք չունենք, քան վճռական հակահարված տալը», - ասել է Էսմայիլ Բաղային:
ԱՄՆ նախագահը կրկին քննադատել է ՆԱՏՕ-ի դաշնակիցներին Իրանում Վաշինգտոնի գործողությունների ընթացքում ցուցաբերած անբավարար աջակցության համար:
Դոնալդ Թրամփը պնդել է, թե ԱՄՆ նպատակն Իրանում ռեժիմի փոփոխությունը չէր, սակայն դա արդեն տեղի է ունեցել: Նա պնդել է, թե Իրանի դեմ ռազմական գործողությունն անհրաժեշտություն էր, քանզի եթե չմիջամտեին, Իրանը կարող էր միջուկային զենք ստեղծել: Իսկ միջուկային Իրանն «անընդունելի սպառնալիք» է ԱՄՆ համար:
Թեհրանը կշարունակի պատերազմը Մերձավոր Արևելքում այնքան ժամանակ, քանի դեռ ԱՄՆ-ն և Իսրայելը չեն բախվել «ափսոսանքի» և չեն հանձնվել:
Թեհրանի զինված ուժերի միացյալ հրամանատարության ներկայացուցիչ Էբրահիմ Զոլֆաքարիի հայտարարությունը հաջորդել է ԱՄՆ նախագահ Դոնալդ Թրամփի ելույթին, որում նա հայտնել է՝ Վաշինգտոնը մի քանի շաբաթվա ընթացքում «չափազանց ուժեղ հարված» կհասցնի Իրանին:
Զոլֆաքարին պնդել է, որ ԱՄՆ-ի և Իսրայելի կողմից Իրանի ռազմական ներուժի գնահատականները «թերագնահատված» են եղել:
«Իրանն ակտիվացնում է իր ռազմական գործողությունները՝ իր հակառակորդների համար նախապատրաստելով «ավելի ջախջախիչ, մասշտաբային և կործանարար» հարձակումներ», - հավելել է նա: