Իսրայելի հարվածները Իրանին
Ու մինչ Թրամփը փորձում է ապահովել Հորմուզի նեղուցի անվտանգությունը, որտեղով բեռնափոխադրումները խաթարվել են պատերազմից հետո, Իսրայելը շարունակել է հարվածներն Իրանին: Ըստ իրանական լրատվամիջոցների՝ հարվածել են Թեհրանին, Խոմեյն քաղաքի տղաների դպրոցին, տուժածների մասին չի հաղորդվում:
Մարկազի նահանգում առնվազն հինգ մարդ է սպանվել հարվածներից: «Ամերիկայի ձայն»-ի պարսկերեն ծառայության փոխանցմամբ՝ ամերիկյան կործանիչները հարվածել են Չաբահար քաղաքի մոտ գտնվող ռազմական օբյեկտներին: Իսրայելի բանակը պնդում է, որ ոչնչացրել է Իրանի սպանված գերագույն առաջնորդի կողմից օգտագործված ինքնաթիռը:
ՆԱՏՕ-ին շատ վատ ապագա է սպասվում, եթե դաշինքի անդամներն ԱՄՆ-ին չօգնեն՝ ապահովելու Հորմուզի նեղուցի անվտանգությունը, Իրանի դեմ պատերազմի 16-րդ օրը հայտարարել է ԱՄՆ նախագահը` սպառնալով, որ ԱՄՆ-ն չի մոռանա դա:
Դոնալդ Թրամփն ասել է, որ հիմա յոթ երկրի հետ բանակցում է, որպեսզի իրանական ուժերից պաշտպանեն նեղուցը, որտեղով պատերազմից առաջ անցնում էր աշխարհում սպառվող նավթի մոտ 20 տոկոսը: Նա նշել է, որ «հետաքրքիր կլինի տեսնել», թե որ երկրներն են իրականում օգնում ԱՄՆ-ին:
Իսրայելի բանակը հայտարարել է, որ Թեհրանի «Մեհրաբադ» օդանավակայանում գիշերը ոչնչացրել են Իրանի հանգուցյալ գերագույն առաջնորդ Ալի Խամենեիի կողմից օգտագործված ինքնաթիռը։
Նշվում է, որ ինքնաթիռն օգտագործվել է Իրանի բարձրաստիճան պաշտոնյաների և ռազմական գործիչների կողմից՝ երկրի ներսում և միջազգային շրջագայությունների համար:
Այս օդանավակայանում տեղակայված են նաև ռազմաօդային ուժերի ակտիվները:
ԵՄ անդամ պետությունները կքննարկեն, թե եվրոպական կողմից ինչ կարելի է անել Հորմուզի նեղուցը բաց պահելու համար, այսօր հայտարարել է ԵՄ արտաքին քաղաքականության ղեկավար Կայա Կալլասը։
«Մեր շահերից է բխում Հորմուզի նեղուցը բաց պահելը, և այդ պատճառով մենք նաև քննարկում ենք, թե եվրոպական կողմից այս առումով ինչ կարող ենք անել», - Բրյուսելում լրագրողների հետ զրույցում ասաց ԵՄ արտաքին գործերի ու անվտանգության քաղաքականության հարցերով բարձր ներկայացուցիչը:
Ֆրանսիայի նախագահ Էմանյուել Մակրոնը հայտնում է, որ հեռախոսազրույց է ունեցել Իրանի նախագահ Մասուդ Փեզեշքիանի հետ:
«Ես նրան կոչ արեցի անհապաղ դադարեցնել այն անընդունելի հարձակումները, որոնք Իրանն իրականացնում է տարածաշրջանի երկրների դեմ՝ թե՛ ուղղակիորեն, թե՛ իր դաշնակից ուժերի միջոցով»,- X-ում գրել է Մակրոնը, շարունակելով. «Ես նրան հիշեցրի, որ Ֆրանսիան գործում է խիստ պաշտպանողական շրջանակում, որը նպատակ ունի պաշտպանել իր շահերը, տարածաշրջանային գործընկերներին և նավարկության ազատությունը, և որ անընդունելի է, որ մեր երկիրը թիրախավորվում է»։
Միացյալ Նահանգների նախագահ Դոնալդ Թրամփը հույս է հայտնել, որ Չինաստանը, Ֆրանսիան, Ճապոնիան, Հարավային Կորեան, Մեծ Բրիտանիան և այլ երկրներ ռազմանավեր կուղարկեն Հորմուզի նեղուցի շրջան՝ ապահովելու նեղուցով առևտրական նավերի անվտանգ անցումը: Այդ մասին նա գրել է իր Truth Social սոցցանցում:
Ըստ Թրամփի՝ ԱՄՆ-ը «անողոք ռմբակոծելու է առափնյա գիծը և մշտապես գնդակոծելու է իրանական նավակներն ունավերը ջրում»: «Այսպես թե այնպես, շուտով Հորմուզի նեղուցը լինելու է ԲԱՑ, ԱՆՎՏԱՆԳ և ԱԶԱՏ», - պնդում է Սպիտակ տան ղեկավարը:
Մեկ այլ գրառմամբ Թրամփը վստահեցնում է, որ ԱՄՆ-ը արդեն «ջախջախել և ամբողջությամբ ոչնչացրել է Իրանը՝ ռազմական, տնտեսական և մյուս բոլոր առումներով», իսկ Հորմուզի նեղուցով անցնող նավթը գնող երկրներն «իրենք պետք է հոգան իրենց այդ անցման մասին»:
Իրանի առողջապահության նախարարության տվյալներով՝ ամերիկա-իսրայելական հարձակումների հետևանքով Իրանում զոհվել է առնվազն 202 երեխա, որոնցից 12-ը՝ հինգ տարեկանից ցածր։ Զոհվել է նաև 223 կին, նրանցից երեքը հղի են եղել։
Բացի այդ, ԱՄՆ-ի և Իսրայելի հասցրած հարվածների հետևանքով երկրում վնասվել է առնվազն 153 առողջապահական հաստատություն, որոնցից 56-ը առողջապահական համալիր ծառայությունների կենտրոններ են, հայտնում է Tasnim լրատվական գործակալությունը։
Բժշկական համալսարանները նույնպես տուժել են։ «Քերմանշահի համալսարանն ամենաշատ վնասն է կրել՝ 42 վնասված մասնաշենքով, որին հաջորդում է Սպահանը՝ 19 մասնաշենքով», - նշում է գործակալությունը։
«Ցավոք, այս միջադեպերի հետևանքով զոհվել է 10 մարդ, իսկ 248 մարդ բուժօգնություն է ստացել և դուրս է գրվել», - հաղորդում է Tasnim-ը։
Իրանի նոր գերագույն առաջնորդ Մոջթաբա Խամենեիի «առողջական վիճակը լավ է», և նա «լիովին վերահսկում է իրավիճակը», Alaraby Aljadeed հեռուստաալիքին տված հարցազրույցում հայտարարել է Իրանի արտգործնախարարը։
Մոջթաբա Խամենեին, որը վիրավորվել է պատերազմի առաջին օրը, դեռ չի ներկայացել հանրությանը։ Պատերազմի ընթացքում նա մեկ անգամ ուղերձ է հղել մարտի 12-ին, ընդ որում՝ միայն տեքստային, ինչը հարցեր է առաջացրել նրա առողջական վիճակի մասին։
Աբբաս Արաղչին ասել է, որ Իրանը ողջունում է ցանկացած «տարածաշրջանային նախաձեռնություն, որը կհանգեցնի պատերազմի արդարացի ավարտին», իսկ Հորմուզի նեղուցը «բաց է բոլորի համար` բացառությամբ ամերիկյան նավերի և [ԱՄՆ] դաշնակիցների նավերի»։
Արաղչիի հավաստմամբ՝ «մինչ օրս պատերազմը դադարեցնելու որևէ հատուկ նախաձեռնություն սեղանին չկա»։
Այսօր ավելի վաղ ԱՄՆ նախագահը NBC-ին տված հարցազրույցում ասել էր, թե Իրանի գերագույն առաջնորդը գուցե ողջ չէ։ «Ես չգիտեմ՝ նա ողջ է, թե ոչ։ Մինչև հիմա ոչ ոք չի կարողացել նրան ցույց տալ։ Ես լսել եմ, որ նա ողջ չէ, և եթե ողջ է, ապա պետք է իր երկրի համար շատ խելացի բան անի, և դա կլինի հանձնվելը», - ասել է Թրամփը։
Իսրայելի առողջապահության նախարարությունը հայտարարել է, որ Իրանի հարվածների հետևանքով վերջին 24 ժամում 108 մարդ տարբեր վնասվածքներով տեղափոխվել է հիվանդանոց։ Նշվում է, որ նրանցից 96-ը ստացել են թեթև վնասվածքներ, երկուսի վիճակը միջին ծանրության է, իսկ 9-ը դեռ բուժզննում են անցնում։
Հակամարտության սկսվելուց ի վեր, ըստ պաշտոնական տվյալների, Իսրայելում 3 հազար 195 մարդու է բուժօգնություն է ցուցաբերվել ստացած վնասվածքների համար։ Նրանցից 81-ը կիրակի դեռ հիվանդանոցում են։
Նախարարությունը զոհերի թվի մասին տեղեկություն չի հրապարակել։ Al-Jazeera-ի տվյալներով՝ պատերազմում Իսրայելի զոհերի թիվն առնվազն 14 է:
Իսրայելի բանակը հայտնել է, որ այսօր «լայնածավալ» հարվածներ է հասցրել Իրանին։
Իրանի Ուրմիա քաղաքում 20 մարդ է ձերբակալվել, որոնք մեղադրվում են երկրի զինված ուժերի, ոստիկանության և անվտանգության ստորաբաժանումների գտնվելու վայրերի մասին Իսրայելին տեղեկություններ տրամադրելու համար։
Իսլամական հեղափոխության պահապանների կորպուսին կից Tasnim լրատվական գործակալությունը, հղում անելով Իրանի Արևմտյան Ադրբեջան նահանգի կենտրոնական դատախազին, հայտնում է, որ նաև հարվածներ են հասցվել «Իսրայելի գործակալների հետ կապված մի քանի վարձկանների ցանցերի»։