Իսրայելի Պաշտպանության բանակը հայտարարել է, որ շարունակում է Լիբանանում հարվածներ հասցնել Իրանի աջակցությունը վայելող և Արևմուտքի կողմից ահաբեկչական ճանաչված «Հեզբոլա» խմբավորմանը պատկանող ենթակառուցվածքներին։
Իսրայելական բանակը հարվածել է Լիբանանի Ալ-Քաթրանի շրջանում գտնվող մի քանի արձակման կետերի՝ պնդելով, որ «Հեզբոլա»-ն պլանավորում էր «անմիջապես հրթիռներ արձակել» դրանցից։
Բանակը նաև հայտնում է, որ հարվածել է Լիբանանի մայրաքաղաք Բեյրութում գտնվող «Հեզբոլա»-ի «Ռադվան» հատուկ նշանակության ջոկատին պատկանող հրամանատարական կենտրոններին։
Իրանի զինվորականները խոստացել են սպանել Իսրայելի վարչապետ Բենյամին Նեթանյահուին, հաղորդում են իրանական պետական լրատվամիջոցները։
Իրանական կիսապաշտոնական Mehr լրատվական գործակալության փոխանցմամբ՝ Իսլամական հեղափոխության պահապանների կորպուսը (ԻՀՊԿ) հայտարարել է, որ «կշարունակի հետապնդել նրան և ուժով կսպանի»։
ԻՀՊԿ-ն նաև պնդել է, որ իր հարձակումների 52-րդ ալիքի ընթացքում ոչնչացվել են Իսրայելում գտնվող թիրախները և տարածաշրջանում երեք ամերիկյան բազաները։
Իրանի զինվորականները խոստացել են սպանել Իսրայելի վարչապետ Բենյամին Նեթանյահուին, հաղորդում են իրանական պետական լրատվամիջոցները։
Իրանական կիսապաշտոնական Mehr լրատվական գործակալության փոխանցմամբ՝ Իսլամական հեղափոխության պահապանների կորպուսը (ԻՀՊԿ) հայտարարել է, որ «կշարունակի հետապնդել նրան և ուժով կսպանի»։
ԻՀՊԿ-ն նաև պնդել է, որ իր հարձակումների 52-րդ ալիքի ընթացքում ոչնչացվել են Իսրայելում գտնվող թիրախները և տարածաշրջանում երեք ամերիկյան բազաները։
Դոնալդ Թրամփը NBC News-ին ասել է, որ մի քանի երկրներ պարտավորվել են օգնել Հորմուզի նեղուցի անվտանգության ապահովման հարցում, թեև հրաժարվել է անուններ նշել։
Սպիտակ տան ղեկավարը նաև անտեսել է նավթի գների բարձրացման վերաբերյալ մտավախությունները։ «Այնքան շատ նավթ, գազ կա, այնքան շատ կա այնտեղ, բայց գիտեք, դրանց մատակարարումը մի փոքր արգելափակվել է։ Դա շատ շուտով կվերականգնվի», - հայտարարել է ԱՄՆ նախագահը։
Իրանը ցանկանում է գործարք կնքել, բայց ԱՄՆ-ն չի ցանկանում, քանզի գործարքի «պայմանները դեռ բավականաչափ լավը չեն», Միացյալ Նահանգների նախագահն ասել է ամերիկյան NBC News հեռուստաալիքին։
Հրաժարվելով ասել, թե որոնք կլինեն այդ պայմանները, Դոնալդ Թրամփը նշել է, որ միջուկային ցանկացած նկրտումներից հրաժարվելու Իրանի պարտավորությունը հնարավոր գործարքի մաս կկազմի։
Reuters լրատվական գործակալությունն էլ իր աղբյուրները վկայակոչելով հաղորդում է, որ Թրամփի վարչակազմը մերժել է Իրանի հետ պատերազմին վերջ դնելուն ուղղված դիվանագիտական բանակցություններ սկսելու՝ մերձավորարևելյան դաշնակիցների, այդ թվում՝ Օմանի, Եգիպտոսի ջանքերը: Սպիտակ տունը հասկացրել է, որ հետաքրքրված չէ նման շփումներով:
«Այժմ նրան դա չի հետաքրքրում, և մենք շարունակելու ենք ռազմական գործողությունը: Հնարավոր է՝ նման օր կգա, բայց ոչ հիմա», - ասել է ամերիկացի բարձրաստիճան աղբյուրը:
Պաշտոնական Թեհրանը, իր հերթին, մերժել է կրակի դադարեցման հնարավորությունը, քանի դեռ չեն դադարել ԱՄՆ և Իսրայելի հարվածները, Reuters-ին ասել են իրանցի երկու բարձրաստիճան աղբյուրներ: Իրանական կողմը պնդում է, որ պետք է դադարեցվեն ավիահարվածները և կատարվեն իր պահանջները, այդ թվում՝ փոխհատուցումը հրադադարի շուրջ հնարավոր համաձայնության շրջանակում:
Գործակալության զրուցակիցների փոխանցմամբ՝ Իսլամական հեղափոխության կորպուսում համոզված են, որ Իրանը Հորմուզի նեղուցի նկատմամբ վերահսկողությունը կորցնելու դեպքում կպարտվի պատերազմում:
ԱՄՆ նախագահ Դոնալդ Թրամփը հայտարարել է, որ թեև Իրանի ռազմավարական Խարգ կղզու մեծ մասը ոչնչացվել է Միացյալ Նահանգների օդային հարվածներով, ինքը կարող է հրահանգել հետագա հարձակումներ՝ Իրանի պատասխան հարձակումների հետևանքով նավթային արդյունաբերության խափանումների վերաբերյալ արաբական երկրների հաղորդումների ֆոնին:
«Մենք կարող ենք հարվածել [կղզուն] ևս մի քանի անգամ, պարզապես զվարճանքի համար», - ասել է Թրամփը երեկ NBC News-ին:
Իրանի խորհրդարանի ազգային անվտանգության հարցերով հանձնաժողովի նախագահ Իբրահիմ Ազիզին հայտարարել է, որ Ուկրաինայի ամբողջ տարածքը հետայսու լեգիտիմ թիրախ է իր երկրի համար:
«Աջակցություն ցուցաբերելով իսրայելական ռեժիմին անօդաչու թռչող սարքերի միջոցով՝ ձախողված Ուկրաինան փաստացի ներգրավվել է պատերազմում և, համաձայն ՄԱԿ-ի Կանոնադրության 51-րդ հոդվածի, իր ամբողջ տարածքը վերածել է Իրանի համար օրինական թիրախի», - գրել է Ազիզին X սոցիալական ցանցում:
Հինգշաբթի օրը Ուկրաինայի նախագահ Վլադիմիր Զելենսկին Փարիզում հանդիպել է Իրանի վերջին շահի որդի Ռեզա Փահլավիի հետ: Զելենսկին սոցցանցերում հայտնել է, որ թագաժառանգ արքայազնի և նրա թիմի հետ հետ քննարկել է իրավիճակը Իրանում և ամերիկյան գործողության ընթացքը:
«Կարևոր է, որպեսզի իրանական ռեժիմը ոչ մի բանում չհաղթի, և որպեսզի մարդիկ Իրանում ավելի շատ հնարավորություններ ստանան պաշտպանելու իրենց կյանքը և որոշելու իրենց ճակատագիրը», - գրել է Զելենսկին:
Լիբանանի առողջապահության նախարարության տվյալներով՝ Բեյրութի արևելքում Իսրայելի հասցրած օդային հարվածի հետևանքով այսօր զոհվել է առնվազն մեկ մարդ, ևս չորսը վիրավորվել են։
Իսրայելական բանակը պատերազմի ընթացքում ուժեղ հարվածներ է հասցրել Լիբանանին այն բանից հետո, երբ անցյալ շաբաթ «Հեզբոլա» զինյալ խմբավորումը հրթիռներ արձակեց Իսրայելի դեմ՝ ի պատասխան Իրանի գերագույն հոգևոր առաջնորդ Ալի Խամենեիի սպանության։
Իսրայելը պնդում է, որ հարվածում է Իրանի աջակցությունն ստացող և Արևմուտքի կողմից ահաբեկչական ճանաչված «Հեզբոլա»-ի հրամանատարական կետերին և ենթակառուցվածքներին, որոնք օգտագործվում են Իսրայելին հարվածելու համար։
Իրանի վրա ԱՄՆ-ի և Իսրայելի հարձակման հետևանքով Մերձավոր Արևելքում արդեն երկու շաբաթ ընթացող պատերազմում հազարավոր մարդիկ են սպանվել։
Ստորև՝ զոհերի թիվն ըստ երկրների, որ ի մի է բերել Al Jazeera-ն.
Իրան – 1444 զոհ;
Լիբանան – 773 զոհ;
Իսրայել – 14 զոհ;
ԱՄԷ – 6 զոհ;
Բահրեյն – 2 զոհ;
Սաուդյան Արաբիա – 2 զոհ;
Քուվեյթ – 6 զոհ;
Օման – 3 զոհ;
ԱՄՆ զինուժ -11 զոհ;
Իրաք – 26 զոհ:
Ֆրանսիայի նախագահ Էմանյուել Մակրոնը Իսրայելին կոչ է արել ուղիղ բանակցություններ վարել Լիբանանի հետ և առաջարկել է դրանք անցկացնել Փարիզում։
X-ում գրառման մեջ նա նշել է, որ խոսել է Լիբանանի նախագահ Ժոզեֆ Աունի, վարչապետ Նաուաֆ Սալամի և խորհրդարանի խոսնակ Նաբիհ Բըրրիի հետ, հավելելով, որ «պետք է ամեն ինչ արվի, որպեսզի Լիբանանը չընկնի քաոսի մեջ»։
Մակրոնն Իրանի աջակցությունը վայելող և Արևմուտքի կողմից ահաբեկչական ճանաչված «Հեզբոլա» զինյալ խմբավորմանը կոչ է արել չսրել իրավիճակը, իսկ Իսրայելին՝ զերծ մնալ իր «ինտենսիվ ռմբակոծություններից» և «լայնածավալ հարձակումից», ինչի պատճառով հարյուր հազարավոր մարդիկ են ստիպված եղել տեղահանվել։
«Լիբանանի գործադիր իշխանությունը հայտնել է իր պատրաստակամությունը՝ Իսրայելի հետ ուղիղ բանակցություններ սկսելու»,- նշել է Ֆրանսիայի նախագահը՝ պնդելով, որ Իսրայելը պետք է փորձի հրադադարի հասնել։