Մարտի 13-ի վաղ առավոտյան Իրանը կրկին մի քանի հրթիռ է արձակել Իսրայելի ուղղությամբ, հաղորդել է Թել Ավիվը: Արտակարգ ծառայությունները հայտնում են, որ երկրի հյուսիսում երկու մարդ վիրավորվել է:
Իսրայելի վարչապետ Բենյամին Նեթանյահուն փետրվարի 28-ին պատերազմի սկսվելուց ի վեր իր առաջին մամուլի ասուլիսում կրկին հայտարարել է, որ անհրաժեշտ է օգնել իրանցի ժողովրդին տապալել Թեհրանի ռեժիմը:
«Մենք օպտիմալ պայմաններ ենք ստեղծում ռեժիմը տապալելու համար», - նշել է նա:
Ժամեր անց իրանական ԶԼՄ-ները հաղորդել են երկրի մայրաքաղաք Թեհրանում տեղի ունեցած մի քանի պայթյունների մասին:
Իսրայելը նաև հարվածել է Լիբանանին՝ Բեյրութի հյուսիսային հատվածին։ Տուժածների մասին չի հաղորդվում:
Դուբայում ԱԹՍ-ները հարվածել են առևտրային օդանավակայանին կից ֆինանսական ենթակառուցվածքը: Տուժածներ չկան:
Իրաքի Էրբիլ շրջանում անօդաչու թռչող սարքի հարձակման հետևանքով վիրավորվել է ֆրանսիացի վեց զինվոր, որոնք ահաբեկչության դեմ պայքարի պատրաստություն էին անցնում իրաքցի գործընկերների հետ: Այս մասին հայտնում են Ֆրանսիայի զինված ուժերը:
Ֆրանսիայի նախագահ Էմանյուել Մակրոնը ավելի ուշ տեղեկացրել է, որ զինվորներից մեկը մահացել է՝ դրա համար մեղադրելով «Իսլամական պետություն» ծայրահեղական խմբավորմանը:
Սպիտակ տան ղեկավարի կարծիքով՝ Իրանի նոր գերագույն առաջնորդ Մոջթաբա Խամենեին, որի հայրը՝ նախկին գերագույն առաջնորդը, սպանվել Է Իրանի դեմ ԱՄՆ-ի և Իսրայելի պատերազմի առաջին օրը, ողջ է, բայց «վիրավոր»:
Խամենեիի առաջին մեկնաբանությունները հինգշաբթի օրը ընթերցվել են հեռուստահաղորդավարի կողմից:
ԱՄՆ նախագահ Դոնալդ Թրամփը հայտարարել է, որ Իրանի ֆուտբոլի հավաքականը կարող է մասնակցել 2026 թվականի ֆուտբոլի աշխարհի առաջնությանը, սակայն, նրա կարծիքով, նրանց ներկայությունն այնտեղ տեղին չէ «իրենց իսկ անվտանգության համար»:
Հինգշաբթի ուշ երեկոյան Իրանի ֆուտբոլի ասոցիացիան սոցիալական ցանցերում հայտարարություն է տարածել, որում ասվում է, որ Միացյալ Նահանգներին չպետք է թույլատրվի անցկացնել աշխարհի առաջնությունը, քանի դեռ նրանք չեն կարող երաշխավորել խաղացողների անվտանգությունը:
«Ֆուտբոլի աշխարհի առաջնությունը պատմական միջազգային իրադարձություն է, և դրա կազմակերպիչը ՖԻՖԱ-ն է, այլ ոչ թե որևէ այլ երկիր»,-ասվում է դրանում:
Իրաքում ամերիկյան լիցքավորող ինքնաթիռ է օդում վթարի ենթարկվել:
ԱՄՆ կենտրոնական հրամանատարությունը, որը պատասխանատու է Մերձավոր Արևելքում ամերիկյան ուժերի համար, մարտի 12-ի ուշ երեկոյան հայտնել է, որ KC-135 լիցքավորող ինքնաթիռի վթարը «թշնամու կամ ընկերական կրակի արդյունք չի եղել»: Նշվում է, որ երկրորդ նման ինքնաթիռը բարեհաջող վայրէջք է կատարել Իսրայելում:
«Միջադեպը տեղի է ունեցել բարեկամական օդային տարածքում «էպիկական զայրույթ» գործողության ժամանակ»,- հայտնել է Կենտրոնական հրամանատարությունը՝ օգտագործելով Իրանի դեմ ԱՄՆ-ի գործողության ռազմական անվանումը:
Իրանը կլուծի իր նահատակների արյան վրեժը և փակ կպահի Հորմուզի նեղուցը՝ որպես ճնշման միջոց, իր ելույթում նաև սա է հայտարարել Մոջթաբա Խամենեին:
Խամենեին ասել է, որ տարածաշրջանում ամերիկյան բոլոր բազաները պետք է անհապաղ փակվեն, այլապես դրանք հարձակման կենթարկվեն. «Մենք հավատում ենք հարևանների հետ բարեկամությանը և թիրախավորում ենք միայն բազաները, և մենք անխուսափելիորեն կշարունակենք այդ հարվածները»:
Իրանի նոր գերագույն առաջնորդ Մոջթաբա Խամենեին այսօր հայտարարել է, որ Հորմուզի նեղուցը պետք է փակ մնա՝ որպես ճնշման գործիք։
Ընտրությունից հետո հրապարակված առաջին ուղերձում, որը ընթերցվել է հեռուստատեսության մեկնաբանի կողմից, Մոջթաբան ասել է, որ տարածաշրջանում գտնվող բոլոր ամերիկյան բազաները պետք է փակվեն, զգուշացրել՝ դրանք կարող են հարձակման ենթարկվել։
Իրանի նոր գերագույն առաջնորդ Մոջթաբա Խամենեին «մի քանի րոպեից» իր առաջին ուղերձը կհրապարակի, հաղորդել է նրա պաշտոնական Տելեգրամ ալիքը՝ առանց մանրամասնելու՝ դա կլինի ձայնագրված ուղերձ, թե գրավոր հայտարարություն։
Նավթի գները այսօր կրկին բարձրացել են՝ մի քանի ժամ մեկ բարելը վաճառվել է ավելի քան 100 դոլարով, չնայած ռազմավարական պահուստներից 400 միլիոն բարել բաց թողնելու՝ Միջազգային էներգետիկ գործակալության երեկվա որոշմանը։
Դրանից հետո՝ անցած ժամերին, Իրանը նոր հարձակումների ալիք է սկսել, Իրաքի ջրերում հարձակման է ենթարկել նավթատար երկու տանկեր՝ է՛լ ավելի խորացնելով շուկայի անհանգստությունն ու անորոշությունը։