Փետրվարի 28-ից Իրանի դեմ իսրայելա-ամերիկյան պատերազմի սկսվելուց ի վեր մինչև 3.2 միլիոն մարդ ստիպված է եղել լքել իրենց տները Իրանում, հայտնում է ՄԱԿ-ի փախստականների հարցերով գերագույն հանձնակատարի գրասենյակը (UNHCR):
Գործակալությունը նշում է, որ այս գնահատականը հիմնված է երկրի տարբեր մասերում տեղահանվածների մասին նախնական գնահատականների վրա։
«Այս թիվը, հավանաբար, կշարունակի աճել, քանի որ ռազմական գործողությունները շարունակվում են, ինչը վկայում է մարդասիրական կարիքների մտահոգիչ սրման մասին», - ասվում է գործակալության հայտարարությունում:
Իրաքի ափերի մոտ այսօր առավոտյան իրանական կողմից հարվածի է ենթարկվել Մալթայի դրոշի ներքո նավարկող տանկեր՝ վրացական անձնակազմով, որի բոլոր 23 անդամները փրկվել են, «Ազատության» վրացական ծառայությանը հայտնել է նավաստիներից մեկի հարազատը։
Միջադեպը տեղի է ունեցել այսօր առավոտյան, Մալթան ներկայացնող տանկերից բացի վնասվել է նաև մեկ այլ՝ Մարշալյան կղզիների դրոշի ներքո նավարկող, Իրաքի պետական կազմակերպության կողմից վարձակալված նավթատար նավ։ Բաղդադի հաղորդմամբ՝ նավաստիներից մեկը զոհվել է, 38-ը փրկվել են։
Իրանի պետական հեռուստատեսությունը հաստատել է, որ տանկերների վրա իրանական ուժերն են հարձակվել:
Ինջիրլիքում գտնվող ռազմակայանը թուրքական է, այսօր հայտարարել է Թուրքիայի պաշտպանության նախարարությունը։ «Այնտեղ ամերիկացի զինվորների ներկայությունը չի նշանակում, որ կայանը Ամերիկայինն է», - ընդգծել է գերատեսչությունը։
Իրանի խորհրդարանի խոսնակ Մոհամմադ Բաղեր Ղալիբաֆը զգուշացրել է, որ Թեհրանը մի կողմ կդնի «զսպվածությունը», եթե Միացյալ Նահանգները և Իսրայելը հարձակվեն Պարսից ծոցում գտնվող կղզիներից որևէ մեկի վրա։
«Իրանական հողի դեմ ցանկացած ագրեսիա հունից կհանի մեր զսպվածությունը, և Պարսից ծոցը կներկվի զավթիչների արյունով», - գրել է Ղալիբաֆը X-ում։
Գրառումից պարզ չէ, թե որ կղզիների մասին է խոսքը, սակայն մինչ այդ ամերիկյան Axios-ը, հղում անելով իր դիվանագիտական աղբյուրներին գրել էր, որ ԱՄՆ-ը դիտարկում է Խարկի գրավման հնարավորությունը։
Պարսից ծոցի հյուսիսում՝ Իրանի ափերից մոտ 25 կմ հեռու գտնվող այդ փոքր կղզին համարվում է Իրանի նավթային տնտեսության ողնաշարը. այստեղով է արտահանվում իրանական նավթի 90 տոկոսը:
Զուգահեռ Իսրայելը նաև հարվածում է Լիբանանին: Բանակը հայտարարել է, որ երկրի հարավում ոչնչացրել է Իրանի աջակցությունը վայելող «Հեզբոլա»-ի հրթիռների արձակման կետեր և զինապահեստներ: Իսրայելական հարվածներից զոհեր և վիրավորներ կան, այդ թվում՝ Բեյրութում:
Արևմուտքի կողմից ահաբեկչական ճանաչված շարժումն իր հերթին հայտարարել է, որ գիշերը 100 հրթիռ է արձակել իսրայելական քաղաքների և բազաների վրա՝ ամենամասշտաբային հարձակումը պատերազմի սկսվելուց հետո: Տուժածների մասին չի հաղորդվում, վնասվել է ռազմական տեխնիկա:
Լիբանանում պատերազմի ընթացքում սպանվել է 634, վիրավորվել ավելի քան 1500 մարդ:
UNICEF-ի տվյալներով՝ Մերձավոր Արևելքում պատերազմի ընթացքում ավելի քան 1100 երեխա է վիրավորվել կամ սպանվել:
Իրանն իր հերթին հայտարարել է, որ հարվածել է Իսրայելի անվտանգության գործակալության՝ Շին Բեթի գլխավոր շտաբին և իսրայելական երկու ավիաբազայի։ Իսրայելում իրանական հարվածներից առ այսօր սպանվել է 14 մարդ, վիրավորվել ավելի քան 2000-ը, որից 179-ը՝ վերջին 24 ժամում:
Իսրայելական բանակը հայտարարել է, որ նոր հարվածներ են հասցրել Իրանի կառավարական ենթակառուցվածքներին: Իրանական Mehr գործակալության փոխանցմամբ՝ հարձակման են ենթարկվել Արաք, Ֆարդիս քաղաքները, կա մեկ զոհ և վիրավորներ: Հարվածել են նաև Թեհրանից ոչ հեռու գտնվող Ռաբաթ Քարիմի արդյունաբերական գոտուն, այլ մանրամասներ չեն հաղորդվում: Այս հարվածների ֆոնին Շվեյցարիան ժամանակավորապես փակել է իր դեսպանատունը Թեհրանում:
Պատերազմի ընթացքում Իրանում ավելի քան 200 քաղաք է հարձակման ենթարկվել, զոհերի թիվն անցնում է 1300-ը, վիրավորներինը՝ 12,000-ը:
Շարունակվող պատերազմի ֆոնին դեռ փակ է Հորմուզի նեղուցը, որտեղով պատերազմից առաջ անցնում էր աշխարհում սպառվող նավթի մոտ 20 տոկոսը: Չնայած Միջազգային էներգետիկ գործակալությունը երեկ հայտարարեց, որ նավթի պահանջարկը բավարարելու համար 400 մլն բարել նավթ կօգտագործվի ռազմավարական պաշարներից, նավթի գինը կրկին բարձրացել է՝ անցնելով մեկ բարելի դիմաց 100 դոլարի շեմը:
Տարածաշրջանում ամերիկյան և իսրայելական բանկերին հարվածելու Իրանի երեկվա սպառնալիքից հետո, ամերիկյան խոշորագույն Citibank-ը Associated Press-ին հայտնել է, որ կփակի իր բոլոր մասնաճյուղերը Ծոցի երկրներում, բացառությամբ մեկի։
ՄԱԿ-ի Անվտանգության խորհուրդը չորեքշաբթի օրը դատապարտել է Իրանի հարձակումները Պարսից ծոցի պետությունների և տարածաշրջանի մյուս երկրների վրա:
Բանաձևը, որին Անվտանգության խորհրդի մշտական անդամներ Ռուսաստանը և Չինաստանը ձեռնպահ են քվեարկել, պահանջում է դադարեցնել «Բահրեյնի, Քուվեյթի, Օմանի, Կատարի, Սաուդյան Արաբիայի, Արաբական Միացյալ Էմիրությունների և Հորդանանի դեմ Իրանի Իսլամական Հանրապետության հարձակումները»:
ԱՄՆ նախագահ Դոնալդ Թրամփը հայտարարել է, որ Միացյալ Նահանգները «հաղթել է» Իրանի դեմ պատերազմում, սակայն ամերիկյան ուժերը կշարունակեն հարձակվել, մինչև գործն ավարտին հասցվի:
«Երբեք վաղաժամ չէիք հայտարարի, թե հաղթել եք: Մենք հաղթել ենք», - վստահեցրել է Թրամփը Կենտուկի նահանգում հանրային հանդիպման ժամանակ՝ հավելելով. - «Առաջին իսկ ժամին դա ավարտված էր»:
Այդուհանդերձ, Թրամփը և նրա վարչակազմի ներկայացուցիչները հասկացրել են, որ հարձակումների դադար չի լինելու:
«Մենք չենք ցանկանում շուտ հեռանալ, չէ՞: Մենք պետք է ավարտենք գործը», - ասել է Սպիտակ տան ղեկավարը:
Միջազգային էներգետիկ գործակալության անդամ 32 պետությունները համաձայնել են իրենց պահուստներից 400 միլիոն բարել նավթ բաց թողնել շուկա՝ Իրանի դեմ ԱՄՆ-ի ու Իսրայելի պատերազմի ֆոնին վառելիքի կտրուկ գնաճը զսպելու համար։
Սա նավթի ամենախոշոր բացթողումն է 50 տարուց ավելի գործող կազմակերպության պատմության մեջ։
Ըստ Գերմանիայի էկոնոմիկայի նախարարի՝ պահուստներից ամենամեծ բաժինը կտրամադրեն ԱՄՆ-ն և Ճապոնիան։
Այս հայտարարության ֆոնին միջազգային շուկաներում նավթի գինը սկսել է կայունանալ։