ԱՄՆ նախագահը հայտարարել է, որ Իրանի հետ պատերազմը կարող է «շուտով» ավարտվել, պնդելով, որ «գործնականում ոչինչ չի մնացել թիրախավորելու»։
Ամերիկյան Axios լրատվական կայքին տված հարցազրույցում Դոնալդ Թրամփն ասել է, որ պատերազմը «հիանալի է ընթանում», և ամերիկյան ուժերը ավելի շատ վնաս են պատճառել, քան ի սկզբանե ակնկալվում էր։
«Մենք ժամանակացույցից շատ առաջ ենք անցել։ Մենք ավելի շատ վնաս ենք հասցրել, քան հնարավոր էինք համարում նույնիսկ սկզբնական վեցշաբաթյա ժամանակահատվածում», - պնդել է Միացյալ Նահանգների նախագահը։
Իսրայելի պաշտպանության նախարար Իսրայել Կացը, մինչդեռ, այսօր պնդել է, թե պատերազմը կշարունակվի «առանց որևէ ժամանակային սահմանափակման» և «այնքան, որքան անհրաժեշտ է», քանի դեռ չեն հասել իրենց նպատակներին։
Իրանի ռազմական հրամանատարությունը հայտարարել է, թե աշխարհը պետք է պատրաստ լինի 200 դոլար վճարել նավթի մեկ բարելի համար, քանի դեռ ԱՄՆ-ի ու Իսրայելի պատերազմը չի ավարտվել։ Անցած գիշեր Իրանի բանկերին հասցված հարվածներից հետո երկրի ռազմական հրամանատարության խոսնակ Էբրահիմ Զոլֆագարին նաև սպառնացել է համարժեք պատասխանով՝ ԱՄՆ-ի կամ Իսրայելի հետ համագործակցող բանկերի վրա։
Վերջին օրերի ինտենսիվ հարվածների ֆոնին՝ Ռուսաստանի Ատոմային էներգիայի պետական կորպորացիան գիշերը Բուշերի ատոմակայանի ևս 150 աշխատակցի է տարհանել երկրից: Նրանք Հայաստանով վերադառնում են Ռուսաստան: «Ռոսատոմ»-ը հայտնել է, որ մոտ 450 աշխատակից դեռ աշխատում է Իրանի միակ գործող ատոմակայանում:
Ճապոնիան և Գերմանիան հայտարարել են, որ պատրաստ են նավթ բաց թողնել իրենց պաշարներից՝ Մերձավոր Արևելքում շարունակվող պատերազմի պատճառով շարունակվող գնաճը կանգնեցնելու համար։ Ըստ պաշտոնական Բեռլինի Միջազգային էներգետիկ գործակալությունը, որ ստեղծվել է նման ճգնաժամերին հակազդելու համար, խնդրել է անդամ պետություններին 400 միլիոն բարել նավթ տրամադրել։
Նավթի գինը միջազգային շուկայում բարձրանում է, մինչ Իսրայելն ու ԱՄՆ-ը շարունակում են պատերազմը Իրանի դեմ, Թեհրանն էլ շարունակում է փաստացի փակ պահել էներգակիրների տարանցման համար առանցքային նշանակություն ունեցող Հորմուզի նեղուցը։
Աշխարհի երկրները ստիպված են արտակարգ քայլեր ձեռնարկել։ Բանգլադեշը նավթի պահեստները պաշտպանելու համար բանակն է գործի դրել, Հնդկաստանը ավելի խիստ վերահսկողություն է սահմանել բնական և խոհանոցային գազի նկատմամբ, իսկ Ֆրանսիայում ստուգումներ են սկսել բենզալցակայաններում և տուգանել գները բարձրացնողներին։
Դոնալդ Թրամփն ինքն է որոշելու, թե որ դեպքում է Իրանը «լիակատար հանձնված» համարվելու, հայտարարել է Սպիտակ տունը։
Մամուլի քարտուղար Քերոլայն Լևիթի խոսքով՝ ռազմական գործողությունները կավարտվեն այն ժամանակ, երբ Թրամփը որոշի, որ ռազմական նպատակները կատարված են, և Իրանը այլևս սպառնալիք չի ներկայացնում ԱՄՆ-ի ու նրա դաշնակիցների համար։
Թուրքիայի նախագահը հայտարարել է, որ Իրանում պատերազմը պետք է դադարեցվի, նախքան ամբողջ տարածաշրջանը «կրակի մեջ կհայտնվի»։ Ելույթ ունենալով խորհրդարանում՝ Ռեջեփ Էրդողանը նշել է՝դա հնարավոր կլինի, եթե դիվանագիտությանը հնարավորություն տրվի, հավելելով՝ Թուրքիան այդ հարցով համագործակցում է բոլոր կողմերի հետ։
«Եթե այս պատերազմը շարունակվի, կաճի ոչ միայն զոհերի ու ավերածությունների թիվը, այլև համաշխարհային տնտեսության կորուստները», - ասել է Էրդողանը։
ՌԴ նախագահ Վլադիմիր Պուտինը զանգահարել է Ադրբեջանի նախագահին, երախտագիտություն հայտնել Իրանից Ռուսաստանի քաղաքացիների տարհանմանը աջակցելու, ինչպես նաև Ռուսաստանի կողմից Ադրբեջանի միջոցով Իրան ուղարկված մարդասիրական օգնության տեղափոխման պայմաններ ստեղծելու համար, հաղորդում է Բաքուն։
Հեռախոսազրույցի ընթացքում առաջնորդները ընդգծել են Մերձավոր Արևելքում ռազմական գործողությունների արագ դադարեցման և հակամարտության քաղաքական-դիվանագիտական կարգավորման կարևորությունը, նշված է Կրեմլի հաղորդագրության մեջ։
Իտալիայի վարչապետ Ջորջիա Մելոնին այսօր դատապարտել է Իրանի դեմ պատերազմի առաջին օրը օրիորդաց դպրոցին հասցված մահացու հրթիռային հարվածը՝ կոչ անելով բացահայտել մեղավորներին։
«Կառավարության անունից ես վճռականորեն դատապարտում եմ աղջիկների կոտորածը Մինաբ քաղաքում», - Սենատում ասել է ծայրահեղ աջ առաջնորդը։
Մելոնին այսօր հայտարարել է նաև, թե չի կարելի թույլ տալ, որպեսզի Իրանը ձեռք բերի միջուկային զենք՝ հրթիռային կարողությունների հետ մեկտեղ, ինչը շուտով կարող է հնարավորություն տալ նրան հարվածել Եվրոպային։
«Մենք չենք կարող թույլ տալ, որ այաթոլլայի ռեժիմը ունենա միջուկային զենք՝ զուգորդված հրթիռային կարողություններով, որոնք շուտով կարող են ուղղակիորեն հարվածել Իտալիային և Եվրոպային», - ասել է Իտալիայի վարչապետը։
Դուբայի օդանավակայանի մերձակայքում ՀՕՊ-ը երկու անօդաչու սարք է խոցել, ինչի հետևանքով չորս մարդ է վիրավորվել, X-ում հայտնել է Դուբայի կառավարությունը։
Թեթև վնասվածքներ են ստացել Գանայի երկու քաղաքացի և Բանգլադեշի մեկ քաղաքացի, իսկ Հնդկաստանի մեկ քաղաքացի ստացել է միջին ծանրության վնասվածք։
Օդային երթևեկությունն իրականացվում է բնականոն ռեժիմով, հայտնում են կառավարությունից։
Մեծ Բրիտանիայի Ծովային առևտրի գործողությունների կենտրոնը (UKMTO), որը բրիտանական ռազմածովային համակարգող կառույց է և հետևում է առևտրային նավերի անվտանգության սպառնալիքներին, նախազգուշացում է տարածել՝ հայտնելով, որ Հորմուզի նեղուցի մոտ «կասկածելի, սակայն դեռևս չպարզված արկից վնասվել է կոնտեյներային նավ»։
Կենտրոնը նաև նշել է, որ «անձնակազմի բոլոր անդամները անվտանգ են, և նրանց գտնվելու վայրը հայտնի է»։