Մերձավոր Արևելքում պատերազմը չպետք է երեխաների վրա ազդի, ՄԱԿ-ի Երեխաների իրավունքների հանձնաժողովն է այս հայտարարությունն արել՝ մատնանշելով Իրանում դպրոցի ուղղությամբ ավիահարվածը։
Իրանն Իսրայելին և Միացյալ Նահանգներին է մեղադրել Մինաբ քաղաքի դպրոցի վրա շաբաթ օրը տեղի ունեցած հարձակման համար։ Զոհերի թիվն անցել է 150-ը։
«Հանձնաժողովը մտահոգված է քաղաքացիական ենթակառուցվածքների, այդ թվում՝ դպրոցների և հիվանդանոցների վրա հարվածների մասին հաղորդումներով, որոնք վնասել երեխաներին, խլել բազմաթիվ երիտասարդ կյանքեր։ Սա հիշեցում է, որ զինված հակամարտություններում երեխաներն ամենախոցելի խմբերից են, սա չպետք է երբեք դիտարկվի որպես պատահական կորուստ», - ասված է հայտարարությունում։
Վատիկանի բարձրաստիճան դիվանագետը նախազգուշացրել է, որ ԱՄՆ–իսրայելական հարձակումները Իրանի վրա խաթարում են միջազգային իրավունքը՝ ընդգծելով՝ որևէ երկիր իրավունք չունի «նախազգուշական պատերազմներ» սկսելու։
«Եթե պետություններին տրվի այդ նախազգուշական պատերազմի իրավունքն… ամբողջ աշխարհը վտանգի տակ կհայտնվի», - Vatican News-ին տված հարցազրույցում ասել է Վատիկանի պետնախարար կարդինալ Պիետրո Պարոլինը։
Հաճախ Վատիկանի դիվանագետները բացահայտ չեն քննադատում կոնկրետ ռազմական արշավները։
«Ուժի իշխանությունը փոխարինել է իրավունքի ուժը»,- ասել է կարդինալը։
Թուրքիայի պաշտպանության նախարարության հաղորդմամբ՝ Իրանից արձակված բալիստիկ հրթիռը, որը անցել էր Սիրիայով և Իրաքով և ուղղված էր թուրքական օդային տարածք, ոչնչացվել է ՆԱՏՕ-ի օդային և հրթիռային պաշտպանության համակարգերի կողմից։
Հայտարարությունում նշվում է, որ Թուրքիան իրեն իրավունք է վերապահում պատասխանել իր վրա ուղղված ցանկացած թշնամական գործողության։ Այդուհանդերձ միևնույն ժամանակ կոչ է անում բոլոր կողմերին զերծ մնալ քայլերից, որոնք կարող են սրել հակամարտությունը։
Կատարում ԱՄՆ դեսպանատունն ԱՄՆ քաղաքացիներին կոչ է արել «հենց հիմա լքել» երկիրը։
«Մարտի 3-ին Պետդեպարտամենտը կարգադրել է ԱՄՆ կառավարության ոչ արտակարգ իրավիճակների հետ առնչվող աշխատակիցներին և նրանց ընտանիքների անդամներին լքել Կատարը՝ զինված հակամարտության սպառնալիքի պատճառով։ Եթե դա անվտանգ է, ամերիկացիները պետք է հիմա լքեն Կատարը», - ասվում է X-ում դեսպանատան գրառման մեջ։
«Կատարի օդային տարածքը և ծովային ճանապարհները մնում են փակ։ Սաուդյան Արաբիայի հետ Սալվա ցամաքային սահմանային անցակետը ներկայումս բաց է», - ասվում է հաղորդագրությունում։
Իսրայելի բանակը պնդում է, որ Իրանը դեռ հրթիռային «զգալի» զինանոց ունի նույնիսկ այն բանից հետո, երբ իսրայելական բանակը հրթիռների արձակման իրանական տասնյակ կայաններ ոչնչացրեց:
«Մենք ոչնչացրել ենք տասնյակ հրթիռային կայաններ, որոնք լուրջ սպառնալիք էին իսրայելական ճակատի համար»,- ճեպազրույցի ժամանակ ասել է Իսրայելի բանակի խոսնակ Էֆի Դեֆրինը։
«Մենք կշարունակենք հարվածել հրթիռների արձակման կայաններին և նվազեցնել նրանց կրակային կարողությունները, բայց ռեժիմը դեռ զգալի կարողություններ ունի, և ես կցանկանայի հիշեցնել ձեզ, որ մեր պաշտպանությունը անխոցելի չէ»,- ասել է նա։
Իրանական Tasnim լրատվական գործակալության փոխանցմամբ՝ Թեհրանում Իրանի հանգուցյալ գերագույն առաջնորդ այաթոլլա Ալի Խամենեիի հիշատակին նվիրված եռօրյա արարողությունը, որը նախատեսված էր սկսել երեկոյան, հետաձգվել է։
Իրանցի պաշտոնյան գործակալությանն ասել է, որ հետաձգման պատճառը լոգիստիկ խնդիրներն են, այդ թվում՝ տարբեր նահանգների բնակիչների կողմից արարողությանը մասնակցելու խնդրանքները։
Ռուսաստանի արտաքին գործերի նախարարությունը նախազգուշացրել է, որ ԱՄՆ-ի ու Իսրայելի ավիահարվածների հետևանքով Իրանի Բուշեհր միջուկային կայանը վտանգի տակ է։
Նախարարության խոսնակ Մարիա Զախարովան այսօր Մոսկվայում կայացած մամուլի ասուլիսի ընթացքում հայտնել է, որ ռմբակոծությունները լուրջ խոչընդոտներ են ստեղծում ՄԱԿ-ի միջուկային հսկողության մարմնի համար՝ գնահատելու իրավիճակը։
Մոսկվան հույս է հայտնել, որ Ատոմային էներգիայի միջազգային գործակալությունը (ԱԷՄԳ) օբյեկտիվ գնահատական կտա ամերիկաիսրայելական հարվածներից առաջացած միջուկային ռիսկերի վերաբերյալ։
Իրանի գերագույն առաջնորդ այաթոլլա Ալի Խամենեիի հուղարկավորությունը, որը նախատեսված էր այսօր երեկոյան Թեհրանում, հետաձգվել է։
Պետական հեռուստատեսությունը հաղոդրում է, որ հետաձգման պատճառը «նախատեսվող աննախադեպ մասնակցությունն» է՝ հավելելով, որ նոր ամսաթվի մասին ավելի ուշ կհաղորդվի։
Տարածաշրջանում լարվածության աճի, Լիբանանում զարգացումների ֆոնին լիբանանյան կողմի հետ խորհրդակցությունների արդյունքում որոշում է կայացվել Երևանի քաղաքապետարանի «Երևան» երիտասարդական նվագախումբ-համույթի (ուղեկիցներով՝ 87 անձ) ժամանակից շուտ դեպի Հայաստան վերադարձի վերաբերյալ, հաղորդում է Լիբանանում Հայաստանի դեսպանությունը:
Middle East Airlines ավիաընկերության հետ դեսպանության բանակցությունների արդյունքում, ավիաընկերությունը որոշել է հավելյալ, հատուկ այդ նպատակի համար չվերթ կազմակերպել։
Դեսպանության կողմից գործարկված թեժ գծի միջոցով Լիբանանից այդ պահին մեկնել ցանկացող քաղաքացիներն ուղղորդվել են ցուցակագրվել տվյալ չվերթին՝ Հայաստան մեկնելու նպատակով։
Դեսպան Սարմեն Բաղդասարյանը և դեսպանության դիվանագետներն իրականացրել են ռմբահարվող տարածքներով դեպի օդանավակայան համույթի տեղափոխման և ուղեկցման աշխատանքներ։
Թռիչքը կատարող օդանավն արդեն վայրէջք է կատարել Երևանում:
