Միջազգային Ատոմային Էներգիայի Գործակալությունն այսօր հայտնել է, որ Իրանում միջուկային նյութ պարունակող օբյեկտները չեն վնասվել և այս պահին ռադիոլոգիական վտանգ չկա։ Այս պնդումն արվել է՝ վերջին արբանյակային պատկերներին հղում անելով։
Հայ-իրանական սահմանը իրանական կողից՝ Նորդուզի անցակետից փակ է։
Պետական եկամուտների կոմիտեն հայտնում է, թե խնդիրն իրանական կողմում է, տեխնիկական խափանում կա։
Գիշերվանից ցամաքային սահմանը փակ է քաղաքացիների համար, բեռնատարները, սակայն անցնում են։
Հայաստանից Իրան և հակառակ ուղղությամբ բեռնափոխադրումների ծավալում վերջին օրերին էական փոփոխություններ չկան։
«Ագարակ» մաքսային անցակետն աշխատում է սովորական ռեժիմով՝ սպասարկելով թե՛ Հայաստանից Իրան, թե՛ Իրանից Հայաստան բեռնատարների անցումը։ Օրական միջինը սպասարկվում է.400-450 բեռնատար, հաղորդում են ՊԵԿ-ից:
Սիրիայի ցամաքային և ծովային նավահանգիստների վարչությունը հայտարարել է, որ փակել է Լիբանանի հետ սահմանային անցակետը ելքերի համար։ Ավելի վաղ Իսրայելից նախազգուշացում են ստացել, ըստ որի՝ իսրայելական ուժերը կարող են թիրախավորել այդ անցակետը։
Ըստ իրանական լրատվամիջոցների՝ այսօր երեկոյան կսկսվի սպանված գերագույն առաջնորդի հոգեհանգստի արարողությունը, որը երեք օր կտևի: Ալի Խամանեիին փոխարինողի մի քանի հնարավոր թեկնածուների անուններ են շրջանառվում, այդ թվում՝ որդու՝ Մոջթաբա Խամենեիի անունը:
Սակայն Իսրայելի պաշտպանության նախարարը հայտարարել է՝ ով էլ փոխարինի Խամենեիին և շարունակի նույն քաղաքականությունը, «անվիճելի թիրախ» կդառնա իրենց համար: «Կարևոր չէ՝ ով է կամ որտեղ է թաքնվում»,- սոցցանցում գրել է Իսրայել Կացը:
Շրի Լանկայի ափերի մոտ իրանական նավի վրա սուզանավի հարձակման հետևանքով առնվազն 101 մարդ անհետ կորել է, իսկ 78-ը՝ վիրավորվել։ Լուրը հայտնում է Reuters գործակալությունը՝ հղում անելով Շրի Լանկայի ռազմածովային ուժերի և պաշտպանության նախարարության աղբյուրներին։
Իրանի արտգործնախարարը հայտարարել է, որ ԱՄՆ նախագահը «դավաճանել է դիվանագիտությանը և իրեն ընտրած ամերիկացիներին»՝ հարձակվելով Իրանի վրա բանակցությունների ընթացքում:
«Երբ բարդ միջուկային բանակցություններին վերաբերվում են որպես անշարժ գույքի գործարքի, և երբ մեծ ստերը մթագնում են իրականությունը, անիրատեսական սպասումները երբեք չեն կարող արդարացվել: Արդյունքը՞։ Չարությունից դրդված ռմբակոծել բանակցությունների սեղանը», - սոցցանցում գրել է Աբբաս Արաղչին:
Իսպանիայի վարչապետ Պեդրո Սանչեսը պատասխանել է ԱՄՆ նախագահ Դոնալդ Թրամփի քննադատություններին։ Մադրիդը հրաժարվել է թույլ տալ ԱՄՆ ինքնաթիռներին օգտագործել իր ռազմաբազաները Իրանի դեմ հարվածներ իրականացնելու համար։
«Իսպանիայի կառավարության դիրքորոշումը կարելի է ամփոփել 2 բառով՝ ոչ պատերազմին», - հեռուստատեսությամբ հայտարարել է նա:
Թրամփը նախօրեին սպառնացել էր դադարեցնել Իսպանիայի հետ ողջ առևտուրը։
«Մենք չենք դառնա այնպիսի գործողությունների մասնակից, որոնք վնասակար են աշխարհի համար և հակասում են մեր արժեքներին ու շահերին», - ասել է Իսպանիայի վարչապետն՝ ընդգծելով՝ վախից դրդված քայլերի չեն դիմի։
Իրանը որևէ մտադրություն չունի բանակցելու Միացյալ Նահանգների հետ և կարող է Մերձավոր Արևելքում պատերազմը շարունակել այնքան ժամանակ, որքան անհրաժեշտ լինի։ Այս մասին պետական հեռուստատեսությանը հայտարարել է Իրանի հանգուցյալ գերագույն առաջնորդ Այաթոլլա Ալի Խամենեիի ավագ խորհրդական Մոհամմադ Մոխբերը։
«Իրանը չի վստահում ամերիկացիներին և որևէ հիմք չունի նրանց հետ բանակցելու համար։ Մենք կարող ենք շարունակել պատերազմը այնքան ժամանակ, որքան ցանկանանք», - պետական հեռուստաալիքով հայտնել է Մոխբերը։
Կանադայի վարչապետ Մարկ Քարնին հայտարարել է, որ ԱՄՆ-ի և Իսրայելի կողմից Իրանի վրա իրականացված հարվածները կարող են հակասել միջազգային իրավունքին։
«Առաջին հայացքից թվում է, որ դրանք չեն համապատասխանում միջազգային իրավունքին», — ասել է Քարնին Սիդնեյում անցկացվող Lowy Institute-ի միջոցառման ժամանակ։
Շրի Լանկայի զինվորականները փրկել են առնվազն 30 մարդու, որոնք եղել են Շրի Լանկայի ջրերին մոտ խորտակվող իրանական նավի վրա, խորհրդարանում հայտարարել է երկրի արտգործնախարար Վիջիթա Հերաթը։
Պաշտպանության նախարարության ներկայացուցիչը հայտնել էր, որ Շրի Լանկայի ռազմածովային ուժերը փրկարարական գործողություն են սկսել այն բանից հետո, երբ իրանական նավից օգնության ազդանշան էր ստացվել։
Արտգործնախարարը հավելյալ մանրամասներ չի հայտնել, միայն նշել է, որ Շրի Լանկան կձեռնարկի համապատասխան քայլեր։
Տեղական լրատվամիջոցների փոխանցմամբ՝ նավը օգնության ազդանշան էր ուղարկել երկրի հարավում գտնվող Գալլե քաղաքի մոտ, իսկ տուժածներին տեղափոխել են Գալլեի հիվանդանոց։