Վերջին շրջանում մարդիկ պարբերաբար ահազանգում են , որ ֆինանսական խարդախության զոհ են դարձել. բանկ չեն ներկայացել, բաց իրենց անձնական տվյալներն ապօրինի օգտագործելով՝ իրենց անունից բանկերում վարկեր են ձևակերպվել։
Գլխավոր դատախազության շենքի դիմաց այսօր բողոքի ակցիա էր:
«2-3 րոպեի ընթացքում առանց ինձ տեղյակ պահելու վարկ տրամադրել մի հատ 330 հազար, ի հատ 500 հազար, երրորդը նույնպես ուզեցել է քաղաքացին վերցնի, նոր ինձ զանգել են, բա ՝ «Արմենուհի Հարությունյանը Դուք չե՞ք», ասում եմ՝ «Ոչ», բա՝ «Ձեր քարտով գողություն է տեղի ունեցել, վարկ են վերցրել ու անմիջապես կանխիկացրել են, մենք էլ ոչ մի բան չենք կարող անել, դիմեք ոստիկանություն»: Դիմել եմ արդեն երկու տարի է ոստիկանություն, բայց ընդհանրապես ոչ մի ձևով չեն լուծում տալիս իմ հարցին», - պատմեց ակցիայի մասնակիցներից մեկը:
«Իմ անունով վարկ են հաստատել, ես վարկի մասին իմացել եմ էլեկտրոնային փոստին եկած հաղորդագրության միջոցով: Դեկտեմբերի 14-ին վարկը հաստատել են, ես հաղորդագրությունը 16-ին եմ տեսել, որ՝ «Ձեր վարկը հաստատված է»: Ես զանգեցի IDBank, ինձ ասացին՝ «Դուք 2 միլիոն դրամ վարկ եք վեցրել», դե խուճապից հասկացան, որ ես չեմ, ուղարկեցին ոստիկանություն: Ու բացի այդ, ես մինիմալ աշխատավարձց ցածր եմ ստանում՝ 67 հազար դրամ է իմ աշխատավարձը, սեփականություն չունեմ, վարկային թույլ պատմություն, ապառիկ չնչին՝ 50-60 հազար դրամ հեռախոս եմ գնել՝ միակ վարկային պատմությունն այ է, ինչի՞ հիման վրա 2 միլիոն դրամ վարկը բանկում հաստատվեց», - ասաց մյուսը:
Չնայած հարուցված քրեական գործերին, ակցիայի մասնակիցները պնդում էին, որ բանկերը շարունակում են իրենց պահանջել մարել ուրիշի վարկերը։ 200-ից ավելի բողոք է ստացել «Հանրային վերահսկողություն» կազմակերպությունը. իրավապաշտպան Մհեր Կարագոզյանն այսօր ցուցարարների հետ էր, պնդում էր՝ տարեցտարի բողոքների թիվն աճում է։
«Այս դիմումը ես և քաղաքացիները ստորագրեցինք՝ Գլխավոր դատախազությունում մուտք անելու համար, նաև ակնկալելով, որ այսօր հանդիպում կունենանք պատկան մարմինների հետ և կքննարկենք քննչականների գործողությունները»,- «Ազատությանն» ասաց Կարագոզյանը:
Դատախազությունից հետո ցուցարարները շարժվեցին դեպի Կենտրոնական բանկ՝ բացատրություն պահանջելու՝ ինչպես է տեղի ունենում բանկերի վերահսկողությունը, ինչու Կենտրոնական բանկը չի կանխում բանկային զեղծարարությանը։
«Եվ մենք ունենք կասկածներ, որ կա բանկերի շահագրգռվածությունը, և դա հնարավոր է, որ տեղի է ունենում նույնիսկ բանկերի միջոցով», - ընդգծեց Մհեր Կարագոզյանը: