Բարձրագույն դատական խորհրդի (ԲԴԽ) նախագահ Կարեն Անդրեասյանը, Հակակոռուպցիոն կոմիտեի նախագահ Սասուն Խաչատրյանը, տարածքային կառավարման և ենթակառուցվածքների նախարար Գնել Սանոսյանը, ներքին գործերի նախարար Վահե Ղազարյանը, քննչական կոմիտեի նախագահ Արգիշտի Քյարամյանը, Պետական եկամուտների կոմիտեի (ՊԵԿ) նախագահ Ռուստամ Բադասյանը լքում են պաշտոնները։
Վարչապետ Նիկոլ Փաշինյանն այսօր ավելի վաղ հաստատել էր տեղեկությունները, որ մի շարք բարձրաստիճան պաշտոնյաների խնդրել է թողնել իրենց պաշտոնները՝ նշելով՝ պատճառներն անձնավորված չեն, այլ համակարգային, որոնց մասին հրապարակային խոսել է։ Պաշտոնյաների անուններ հայտարարությունում գործադիրի ղեկավարը չէր նշել։
Օրեր առաջ կառավարության նիստին Փաշինյանը խիստ և կտրուկ դժգոհություն էր հայտնել իրավապահ համակարգից՝ շեշտելով՝ դատական և ուժային կառույցներում բարեփոխումների արդյունքները չի տեսնում, իսկ իր համբերության բաժակը լցվել է։
Իսկ մեկ ամիս առաջ Քննչական կոմիտեի 10-ամյակի առթիվ շնորհավորելով կառույցին, Փաշինյանը հայտարարել էր՝ «արդարություն հաստատելու օրակարգն այսօր նույնքան հրատապ է, որքան հրատապ էր 2018 թվականին կամ 2019 թվականին: Բայց սա չի նշանակում, թե մենք արդարության հաստատման ուղղությամբ ոչինչ չենք արել»։
