Կրթության, գիտության, մշակույթի և սպորտի նախարարությունը տեղեկացնում է, որ վերանորոգվելու են Տավուշի մարզի Ոսկեպար գյուղի 7-րդ դարի Սուրբ Աստվածածին եկեղեցու տանիքածածկերը:
Նախարարության «Պատմամշակութային-արգելոց թանգարանների և պատմական միջավայրի պահպանության ծառայություն» ՊՈԱԿ-ի մասնագետները հերթական շրջայցն են կատարել Տավուշի մարզի սահմանամերձ գյուղերի հուշարձաններ՝ ընթացիկ մշտադիտարկումներ կատարելու նպատակով։ Մշտադիտարկման արդյունքում պարզվել է, որ Ոսկեպարի Սբ. Աստվածածին եկեղեցու տանիքածածկերը խիստ քայքայված են, ծածկասալերը՝ մաշված և վնասված, մթնոլորտային տեղումների արդյունքում առաջացած խոնավությունը ներթափանցում է եկեղեցի, ասված է ԿԳՄՍՆ լրատվական վարչության հաղորդագրությունում:
Մշտադիտարկման արդյունքերի ամփոփումից հետո կազմվել են եկեղեցու տանիքածածկերի նորոգման գիտանախագծային փաստաթղթերը։ Սահմանված կարգով դրանք հաստատելուց և փորձաքննելուց հետո կհայտարարվի աշխատանքների իրականացման մրցույթը։
