Սահմանազատումը Տավուշից սկսելու հարցում վերջնական որոշում չկա, խորհրդարանում հայտարարեց փոխվարչապետ, սահմանազատման հարցերով հանձնաժողովի նախագահ Մհեր Գրիգորյանը:
«Հարցերը դեռ քննարկման փուլում են, որոշում դեռ չկա», - շեշտեց փոխվարչապետը՝ հավելելով, որ մինչև կարևորագույն սկզբունքների շուրջ վերջնական որոշում չլինի, սահմանազատման գործընթաց սկսել չեն կարող:
«Սահմանազատումն այդ հատվածից սկսելու որոշում կարող է լինել այն դեպքում, երբ մնացած սկզբունքային հարցերի շուրջ կոնսենսուս լինի», - «Ազատության» հարցին ի պատասխան ասաց Գրիգորյանը՝ շարունակելով. - «Այդ հարցերն են՝ անվտանգային, սոցիալ-կենցաղային և իրավական»։
Մհեր Գրիգորյանը միևնույն ժամանակ նշեց, որ բազմաթիվ հարցերի շուրջ ընկալումները նույնատիպ են։
Դիտարկմանը, թե տպավորություն է, որ հայկական կողմը պատրաստ է զիջել, իսկ Ադրբեջանն անգամ դրան համաձայն չէ, փոխվարչապետն արձագանքեց. - «Կարծում եմ՝ դա սխալ տպավորություն է»։
Օրերս արտգործնախարար Արարատ Միրզոյանը հայտարարել էր՝ մի քանի անգամ ամենաբարձր մակարդակով կողմերը պայմանավորվել են, որ սահմանազատումը տեղի է ունենալու Ալմա-Աթայի հռչակագրի հիման վրա, սակայն երբ հայկական կողմը փորձում է այս պայմանավորվածությունն արտացոլել, հռչակագրին հղում անել տարածքային ամբողջականության և սահմանազատման կոնտեքստում, տեսնում է Ադրբեջանի դժկամությունը։
Հարցին, թե Ադրբեջանը դե՞մ է Ալմա-Աթայի հռչակագրին հղմանը, Մհեր Գրիգորյանը չպատասխանեց, փոխարենը խորհուրդ տվեց հետևել պաշտոնական հայտարարություններին։
Նիստը փակ էր, մոտ մեկ տասնյակ ընդդիմադիրներ էլ չկարողացան մասնակցել
Խորհրդարանում արդեն ավարտվել է ընդդիմության նախաձեռնած՝ հայ - ադրբեջանական սահմանի սահմանազատման թեմայով հրատապ քննարկումը: Այն տևեց մեկուկես ժամ: Նիստին մասնակցում էին հայկական կողմից սահմանազատման հանձնաժողովի նախագահ Մհեր Գրիգորյանը և արտաքին գործերի նախարար Արարատ Միրզոյանը: Մինչ նիստի մեկնարկը լրագրողներին չհաջողվեց հարցեր ուղղել Միրզոյանին:
Նիստն ընթացավ փակ ձևաչափով՝ սա իշխանության որոշումն էր: Թեև ընդդիմությունը դեմ էր, իշխանությունը պատճառաբանեց, որ հնարավոր է ներսում քննարկվեն պետական գաղտնիքին առնչվող հարցեր, և հետևապես պետք է, որ այն անցկացվի փակ ֆորմատով:
Ընդդիմության մոտ մեկ տասնյակ պատգամավորներ զրկվեցին նաև նիստին մասնակցելու հնարավորությունից, որովհետև նրանք չունեին գաղտնիությունը հասանելիություն. - «Արմեն Գևորգյանը, Ասպրամ Կրպեյանը, Արման Ղազարյանը, Մհեր Մելքոնյանը, Արմեն Ռուստամյանը, Մհեր Սահակյանը, Արթուր Սարգսյանը, Լևոն Քոչարյանը, Սեյրան Օհանյանը: «Քաղաքացիական պայմանագիր» խմբակցությունից դա Դավիթ Կարապետյանն է», - հայտարարեց ԱԺ նախագահ Ալեն Սիմոնյանը:
Ե՛վ սա, և՛ նիստի ֆորմատը հարուցել էր ընդդիմության դժգոհությունը: Արմեն Ռուստամյանը հետո արդեն լրագրողների հետ զրույցում հայտարարեց, որ իրենց նպատակն էր հանրությանը իրազեկել սահմանազատման գործընթացի շուրջ տեղի ունեցող պրոցեսներից, սակայն փակ ֆորմատն իրենց զրկեց այդ հնարավորությունից:
«Հիմա, հասարակությունը սրանից ինչո՞վ է բավարարված լինելու՝ փակ նիստից, մանավանդ պատգամավորների մի մասին էլ դուրս են հանում, որ գաղտնիության հասանելիություն չունեն: Ես հատուկ չեմ դիմել, որովհետև ես չեմ գտնում, որ պատգամավորը պիտի դիմի խնդրի, որ իրեն հասանելի դառնան գաղտնիության նյութեր: Հրավիրել են, իբր թե մեր պահանջին համապատասխան հրավիրել են, բավարարել են, եկել են ներկայացուցիչներ՝ արտգործնախարարը և փոխվարչապետը, բայց տեսեք ինչ ձևով են անցկացնում», - ասաց դաշնակցական պատգամավորը:
«Մեկ անգամ ևս ակնհայտ դարձավ, որ իրականում սահմանագծման և սահմանազատման աշխատանք չկա»
Արդեն նիստից հետո լրագրողների հետ զրույցում քննարկումից որոշ մանրամասներ հայտնեց «Հայաստան» խմբակցության պատգամավոր Իշխան Սաղաթելյանը. - «Մեկ անգամ ևս ակնհայտ դարձավ, որ իրականում սահմանագծման և սահմանազատման աշխատանք չկա, իրականում Հայաստան - Ադրբեջան բանակցություններ չկա, կա Ադրբեջանի կողմից Հայաստանին ներկայացվող նոր կապիտուլյացիոն պահանջներ, որը էս իշխանությունը մտադիր է առնվազն տեղիք տալ և գնալ նոր կապիտուլյացիայի»:
Պատգամավորը նաև ակնարկեց, որ իր տպավորությամբ՝ հակասություններ կային Մհեր Գրիգորյանի հնչեցրած հայտարարությունների և Արարատ Միրզոյանի տեսակետների միջև:
«Մեզ ևս հավաստիացրել է Մհեր Գրիգորյանը, որ կոնկրետ պայմանավորվածություններ չկան սահմանագծման հատվածում Տավուշի և նաև գյուղերի հետ կապված: Արարատ Միրզոյանը այլ բան էր ասում», - նշեց Սաղաթելյանը:
Ընդդիմադիր մեկ այլ պատգամավոր Թագուհի Թովմասյանն էլ լրագրողների հետ զրույցում հայտարարեց, որ սահմանազատման գործընթացի վերաբերյալ ոչ մի նոր բան այդ փակ նիստից չիմացան. - «Ուղղակի գաղտնիության շղարշով իշխանությունները հերթական անգամ փորձեցին ինչ-որ խորհրդավորություն հաղորդել իրենց գործողություններին: Ոչ մի հուսադրող բան չեն ասել, էն բոլոր մտահոգությունները, որ մենք ունեինք, ուղղակի ամրապնդվեցին, ուրիշ ոչինչ: Էն մտահոգությունները, որ Հայաստանի Հանրապետությունը Արցախից հետո լրջագույնս վտանգված է»:
