Վերջին շրջանում «հայ-ադրբեջանական պայմանական սահմանի տարբեր ուղղություններում նկատվում է կենդանի ուժի», «զրահատեխնիկայի կենտրոնացում», «զինված ուժերի զորքերի ինտենսիվ տեղաշարժ», պնդում է Ադրբեջանի պաշտպանության նախարարությունը։
Բաքուն հայտարարում է, թե իբր Հայաստանում նկատվում է «ռևանշիստական ուժերի ակտիվացում», զգուշացնելով, որ «ռազմական սադրանքի ցանկացած փորձ կճնշվի ադրբեջանական բանակի կողմից»։
«Եվս մեկ անգամ հայտարարում ենք, որ իրավիճակի սրման և ցանկացած հնարավոր սադրանքի ողջ պատասխանատվությունն ամբողջությամբ ընկնելու է Հայաստանի և նրա հովանավորների վրա», - ասված է ադրբեջանական պաշտպանական գերատեսչության հաղորդագրության մեջ։
Հայկական կողմը դեռ չի արձագանքել այս հայտարարությանը։
Վերջին օրերին Բաքուն քննադատում էր Երևանին բրյուսելյան եռակողմ հանդիպման համար։
Հայաստանի խորհրդարանի նախագահ Ալեն Սիմոնյանը չէր չբացառել, որ ապրիլի 5-ին Բրյուսելում կայանալիք Փաշինյան-Ֆոն դեր Լայեն-Բլինքեն հանդիպումից առաջ Բաքուն իր հայտարարությամբ հնարավոր սադրանքի համար հող է նախապատրաստում։
Չնայած Երևանը հայտարարել է՝ այդ հանդիպումը նվիրված է լինելու Հայաստան-ԵՄ-ԱՄՆ համագործակցության ամրապնդմանը և որևէ երրորդ կողմի դեմ չէ, Բաքուն Բրյուսելին ու Վաշինգտոնին կոչ է արել ձեռնպահ մնալ քայլերից, որոնք կարող են վնասել խաղաղության ջանքերին, տարածաշրջանում էսկալացիայի և լարվածության նոր ալիք հրահրել։
