Ավելի քան կես տարվա դադարից հետո այսօր գերմանական Մյունխենում կանցլեր Օլաֆ Շոլցի միջնորդությամբ բանակցեցին Հայաստանի վարչապետն ու Ադրբեջանի նախագահը: Արևմտյան հարթակում Փաշինյանն ու Ալիևը վերջին անգամ հանդիպել էին անցած տարվա հուլիսին:
Շաբաթասկզբի սահմանային լարվածությանը հաջորդած եռակողմ բանակցությունները տևեցին մոտ 45 րոպե, որից հետո պաշտոնական Երևանը հաղորդեց՝ առաջնորդները քննարկել են Հայաստան-Ադրբեջան հարաբերությունների կարգավորումը, տարածաշրջանում խաղաղության ու կայունության ապահովման քայլերը և որ կողմերը պայմանավորվել են շարունակել աշխատանքները խաղաղության պայմանագրի շուրջ: Այլ մանրամասներ Երևանը չի հայտնում։
Ադրբեջանական լրատվամիջոցները մինչդեռ Փաշինյան- Ալիև երկկողմ բանակցությունների մասին են հաղորդում: Ըստ պետական APA գործակալության՝ եռակողմից հետո Գերմանիայի կանցլերը բանակցությունների սրահում մենակ է թողել երկու առաջնորդներին ու նրանց պատվիրակություններին։
Ուղիղ բանակցություններից, սակայն, ո՛չ լուսանկար, ո՛չ տեսանյութ չհրապարակվեց, ընդ որում, ըստ ադրբեջանական աղբյուրների, այս հանդիպումը տևեց մոտ տասը րոպե։
APA-ի փոխանցմամբ՝ հենց երկկողմ բանակցությունների ընթացքում են Հայաստանի և Ադրբեջանի ղեկավարները իրենց արտգործնախարարներին հանձնարարել շարունակել խաղաղության պայմանագրի շուրջ բանակցությունները։ Արարատ Միրզոյանին և Ջեյհուն Բայրամովին նաև հանձնարարվել է շարունակել սահմանազատման շուրջ աշխատանքը:
Հայաստանի ու Ադրբեջանի ղեկավարներին հյուրընկալած Գերմանիայի կանցլեր Շոլցն, իր հերթին, X-ում գրել է, որ կողմերը պայմանավորվել են հարցերը լուծել առանց նոր բռնությունների:
«Գերմանիան և Եվրոպան պատրաստ են իրենց հնարավորությունների սահմաններում աջակցել Հայաստանի և Ադրբեջանի միջև խաղաղ բանակցություններին։ Ես դա հաստատել եմ երկու երկրների հետ քննարկումներում», - նշել է Շոլցը:
Անցած տարվա հոկտեմբերին Գրանադայում Ալիևի բացակայությամբ տեղի ունեցած քառակողմ հանդիպմանը ևս կոչ էր արվել կողմերին խստորեն պահպանել ուժի և ուժի սպառնալիքի չկիրառման սկզբունքը: Մինչդեռ անցած շաբաթ հայ-ադրբեջանական սահմանային լարվածության պատճառով հայկական կողմը 4 զոհ ունեցավ:
Գերմանիայի կանցլերը մինչ եռակողմ բանակցությունները առանձին հանդիպեց Փաշինյանին և Ալիևին, սակայն կողմերի տարածած հաղորդագրություններում սահմանային վերջին լարվածությանն անդրադարձ չկար։
«Հայաստանի և Ադրբեջանի միջև առկա է լարվածության նոր փուլ». Փաշինյանը՝ Բլինքենին
Թեման վարչապետ Փաշինյանը քննարկել է Մյունխենում գտնվող ԱՄՆ պետքարտուղար Էնթոնի Բլինքենի հետ:
«Դժբախտաբար, այս պահին Հայաստանի և Ադրբեջանի միջև առկա է լարվածության նոր փուլ, վերջերս տեղի ունեցավ լարվածության նոր աճ, որը պատճառ դարձավ մեծ կորուստների։ Հայ դիրքապահներ սպանվեցին Ադրբեջանի հետ սահմանին։ Ես կցանկանայի այս իրավիճակը ևս քննարկել Ձեզ հետ», - նշել է վարչապետը:
Հրապարակված կարճ տեսանյութում պետքարտուղար Բլինքենը սրան որևէ կերպ չարձագանքեց, իսկ ավելի ուշ X-ում գրեց, թե վարչապետ Փաշինյանի հետ արդյունավետ զրույց են ունեցել, քննարկել՝ ինչպես կարող են աջակցել Հայաստան-Ադրբեջան խաղաղության գործընթացին:
«Հայաստանը շատ արժեքավոր գործընկեր է Միացյալ Նահանգների համար, և մենք ողջունում ու գնահատում ենք նրա՝ արժանապատիվ և ամուր խաղաղության հանդեպ հանձնառությունը։ Քննարկելով և աշխատելով դրա վրա՝ մենք նաև աշխատում ենք ուժեղացնել մեր երկրների միջև հարաբերությունները տարբեր ուղղություններով», - նշել է նա։
Անցած տարեվերջին Միացյալ Նահանգների միջնորդությունը մերժած Ադրբեջանի նախագահը ևս հանդիպել է ԱՄՆ պետքարտուղարի հետ: Իսկ արտգործնախարար Ջեյհուն Բայրամովի և պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենի հանդիպմանը ադրբեջանական կողմը կրկին խոսել է Հայաստանի Սահմանադրության, օրենսդրական ակտերի, միջազգային կազմակերպություններում և դատարաններում, Բաքվի ձևակերպմամբ, Ադրբեջանի տարածքային ամբողջականության և ինքնիշխանության դեմ շարունակվող պահանջներից և ընդգծել դրանցից հրաժարվելու կարևորությունը:
