Արցախի հիմնական քաղաքական ուժերի հետ համագործակցությամբ Արցախի ժողովրդի հավաքական հայրենադարձության և հիմնարար այլ իրավունքների պաշտպանության նպատակին կոչված հանձնախումբն արդեն ձևավորված է, այսօր տեղեկացրել է նախկին արտգործնախարար Վարդան Օսկանյանը։
Օսկանյանը նշել է, որ համաձայնել է հանձնախմբի անդամների առաջարկությանը՝ համակարգել դրա աշխատանքները։
«Առաջիկայում, երբ ամբողջանա Հանձնախմբի կազմը, կհրապարակվեն մյուս անդամների անունները, ինչպես նաև մանրամասներ անելիքների մասին։ Այս պահին կարող եմ ասել, որ Հանձնախմբի գլխավոր խնդիրը լինելու է միջազգային երաշխիքներով Արցախի ժողովրդի հավաքական հայրենադարձության և իր հայրենիքում ապահով, անվտանգ ու արժանապատիվ ապրելու իրավունքի պաշտպանությունը և հետապնդումը»,- ֆեյսբուքյան իր էջում գրել է նախկին արտգործնախարարը։
Վարդան Օսկանյանի համոզմամբ՝ Արցախի ժողովրդի հավաքական հայրենադարձության և իր հայրենիքում ապահով, անվտանգ ու արժանապատիվ ապրելու իրավունքի իրականացնումը կարող է տևական ու կայուն խաղաղություն բերել։
