ԵՄ-ն պատրաստվում է ուսումնասիրել Հայաստանի հետ վիզայի ազատականացման տարբերակները, «Արմենպրեսի» հետ զրույցում ասել է ԵՄ բարձր ներկայացուցիչ Ժոզեպ Բորելի խոսնակ Պետեր Ստանոն՝ շեշտելով՝ սա նշանակում է, որ կսկսեն գործընթաց՝ տեսնելու, թե արդյոք դա իրագործելի՞ է, հնարավո՞ր է։
Ստանոյի խոսքով՝ վիզաների ազատականացումը շատ կարևոր է, այն շոշափելի և տեսանելի է մարդկանց համար, բայց, նրա խոսքով, դրան բոլոր անդամ պետությունները պետք է համաձայնություն տան։
«Կան նաև առաջադրանքներ, որոնք պետք է կատարվեն գործընկեր երկրի կողմից, այս դեպքում՝ Հայաստանի», - ասել է ԵՄ բարձր ներկայացուցչի խոսնակը՝ մանրամասնելով․ -«Ընդհանուր առմամբ, ազատականացման համար կան տեխնիկական պահանջներ, որոնցից է, օրինակ, կենսաչափական անձնագրերի պահանջը։ Բայց նաև քաղաքական պահանջներ՝ համոզվելու, որ երկրում քաղաքական շրջանակը թույլ չի տալիս մարդկանց չարաշահել ապաստանի համակարգը, որ մարդկանց չեն ստիպում լքել երկիրը և ապաստան հայցել»։
Ստանոն ընդգծել է՝ չեն ցանկանում, որ հանկարծակի ավելանան ապաստան հայցողները, պետք է կանխել առանց վիզայի կամ ազատականացված ճանապարհորդության ռեժիմի չարաշահումը։
Նա նշել է՝ եթե ամեն ինչ լավ ընթանա, դա կարող է մեծ օգուտ բերել Հայաստանի քաղաքացիներին։
ԵՄ հետ վիզաների ազատականացման առաջարկը հաստատվել է նոյեմբերի 13-ին՝ ԵՄ անդամ երկրների արտգործնախարարների նիստում։
Առաջիկայում այս որոշումը պետք է հաստատի Եվրահանձնաժողովը, բանակցությունների ավարտին էլ որոշումը վավերացվի անդամ երկրների կողմից։
Փոխարտգործնախարար Պարույր Հովհաննիսյանն ասել էր, որ Երևանը հնարավոր է համարում, որ առաջիկա ամիսներին սկսվեն Եվրամության հետ վիզաների ազատականացման շուրջ բանակցությունները։
«Չէր եղել որևէ երկիր, որ առարկել էր, բարդ էր ապահովել այդ կոնսենսուսը բոլոր անդամ երկրների մեջ, բայց շատ դրական զարգացում է: Կշարունակենք ակտիվ աշխատել Եվրամիության ու անդամ երկրների հետ՝ հնարավորինս արագացնելու այդ գործընթացը», - ԵՄ անդամ երկրների արտգործնախարարների նիստից մեկ օր անց՝ լրագրողների հետ ճեպազրույցում ասաց Հովհաննիսյանը։
Դեռ 2016-ին Հայաստանում Եվրամիության պատվիրակության ղեկավարը հայտարարել էր, թե մոտ ժամանակներում Հայաստանն և Եվրամիությունը կհասնեն վիզաների ազատականացմանը։ Դա նախատեսված է նաև Եվրամիության հետ 2017-ին Հայաստանի կնքած Համապարփակ և ընդլայնված գործընկերության համաձայնագրով։ Վիզաների ազատականացման հարցում տարիներ շարունակ, սակայն, էական առաջընթաց չի արձանագրվում։
