Բաքուն հաղորդում է հումանիտար օգնություն Արցախ ուղարկելու մասին։
Ադրբեջանական լրատվամիջոցները, վկայակոչելով երկրի Արտակարգ իրավիճակների նախարարությունը, նշում են, որ այսօր Ստեփանակերտ է ուղարկվել 20 տոննայանոց երկու բեռնատար՝ տարբեր պարենային ապրանքներով և հիգիենայի պարագաներով և 2 ավտոմեքենա՝ բեռնված հացով։
Ըստ ադրբեջանական մամուլի՝ Աղդամի շրջանով մեքենաները շարժվում են դեպի Ասկերան։
Ադրբեջանական լրատվամիջոցները թելեգրամյան ալիքներում նկարներ են նաև հրապարակում։
Սեպտեմբերի 18-ին Կարմիր Խաչի բեռնատարները միաժամանակ մուտք գործեցին Լեռնային Ղարաբաղ Լաչինի և Աղդամի ճանապարհներով։ Լաչինի միջանցքով Ստեփանակերտ տեղափոխվեց մոտ 23 տոննա հայկական արտադրության ալյուր, իսկ Աղդամով՝ ռուսական, շվեյցարական արտադրության բժշկական և հիգիենայի պարագաներ։
Իսկ ադրբեջանական 40 տոննա ալյուրը Արցախ չմտավ․ Աղդամն ու Ստեփանակերտն իրար կապող Ասկերանի ճանապարհին արցախցիները հերթապահություն էին իրականացնում՝ մերժելով Բաքվի առաջարկած օգնությունը։
